އިދިކޮޅު މައި ކެންޑިޑޭޓް ގައުމަށް ޣައްދާރުވުމުގެ ތުހުމަތުގައި ހައްޔަރުކޮށް، ޒެމްބިއާގެ ރައީސް ހިޗިލެމާ ދެވަނަ ދައުރަށް ހުވާކުރައްވައިފި

ޒެމްބިއާގެ ރިޔާސީ އިންތިޚާބުގެ ނަތީޖާއާ މެދު ސުވާލު އުފެދިފައިވަނިކޮށް އަދި އިދިކޮޅު މައި ކެންޑިޑޭޓް ގައުމަށް ޣައްދާރުވުމުގެ ތުހުމަތުގައި ހައްޔަރުކޮށްފައިވާ ދަނޑިވަޅެއްގައި، އެ ގައުމުގެ ރައީސް ހަކައިންޑޭ ހިޗިލެމާ ދެވަނަ ދައުރަކަށް މިއަދު ހުވާކުރައްވައިފި އެވެ.

އިގްތިސާދު ހަމަޔަކަށް އެޅުއްވި ބޭފުޅެއްގެ ގޮތުގައި ފާހަގަކުރެވޭ ހިޗިލެމާ، އޮގަސްޓް މަހުގެ 13 ވަނަ ދުވަހު ބޭއްވި އިންތިޚާބު ކާމިޔާބު ކުރެއްވީ ރަސްމީ ނަތީޖާ ދައްކާގޮތުން 60 އިންސައްތަ ވޯޓާއެކުގަ އެވެ. ނަމަވެސް 38 އިންސައްތަ ވޯޓު ހޯއްދަވައިގެން ދެވަނައަށް ދިޔަ ބްރަޔަން މުންޑުބިލޭ ވަނީ އިންތިޚާބުގެ ނަތީޖާއަށް އޮޅުވާލާފައިވާ ކަމަށް ތުހުމަތު ކުރައްވާފަ އެވެ.

އިންތިޚާބުގެ މައްސަލަ ކޯޓަށް ހުށަހެޅުމަށް އޮތް އެންމެ ފަހު ދުވަހު ކޯޓުތައް ބަންދުކޮށްފައި ހުރުމުގެ ސަބަބުން، މުންޑުބިލޭއަށް ނަތީޖާ ގޮންޖަހައި ގާނޫނީ މައްސަލައެއް ހުށަހެޅޭގޮތް ވަނީ ނުވެފަ އެވެ.

އިންތިޚާބު އޮބްޒާވްކުރި ފަރާތްތަކުން ބުނި ގޮތުގައި، ވޯޓުލީ ދުވަހު އާންމުކޮށް އަމާންކަން އޮތް ނަމަވެސް، ވޯޓު ގުނުމުގެ މަރުހަލާއާ މެދު ބައެއް ފަރާތްތަކުން ވަނީ ސުވާލު އުފައްދާފަ އެވެ.

ޔޫރަޕިއަން ޔޫނިއަން (އީޔޫ) ގެ އޮބްޒާވަރުން ފާހަގަކުރި ގޮތުގައި، ވޯޓު ގުނާ ގިނަ މަރުކަޒުތަކުގައި ނަތީޖާ އިއުލާންކުރުމާއެކު ޓެލީ ޝީޓްތަކުގައި އެ ނަތީޖާތައް ރެކޯޑުކޮށްފައެއް ނުވެ އެވެ. އަދި ޑިޖިޓަލްކޮށް އެންޓަރކުރި ނަތީޖާތަކާއި ކަރުދާހުގައި ހުރި ރެކޯޑުތައް އަޅާކިޔައި ކަށަވަރުކުރުމުގެ ނިޒާމު ބަލިކަށިކަން އީޔޫއިން ފާހަގަކުރި އެވެ.

މީގެ އިތުރުން، އިންތިޚާބާ ބެހޭ އޮފިޝަލުން މައި މަރުކަޒުން އިރުޝާދެއް ލިބެންދެން މަސައްކަތްތައް މެދުކަނޑާލައިގެން ތިބިކަން ވެސް އީޔޫގެ ރިޕޯޓުގައި ބަޔާންކޮށްފައިވެ އެވެ.

އިންތިޚާބަށްފަހު ޖެހިގެން އައި ދުވަހު، ސަލާމަތީ ބާރުތަކުން ވަނީ ވެރިރަށް ލުސާކާގައި ހުންނަ މުންޑުބިލޭއާ ގުޅުންހުރި އިމާރާތަކަށް ވަދެގަނެ، ކުރީގެ ކެބިނެޓް މިނިސްޓަރަކު މަރާލައި، އިދިކޮޅު ސިޔާސީ ބައެއް ފަރާތްތައް ހައްޔަރުކޮށްފަ އެވެ.

ކަމާބެހޭ އިދާރާތަކުން ތުހުމަތުކުރި ގޮތުގައި އިދިކޮޅު ފަރާތްތަކުން ދިޔައީ ހަތިޔާރު އެޅި ބަޣާވާތެއް ކުރަން ރާވަމުންނެވެ. ނަމަވެސް އިދިކޮޅު ފަރާތްތަކުން މި ތުހުމަތުތައް ދޮގުކުރެ އެވެ. މުންޑުބިލޭ އާއި އޭނާގެ ރަނިންގ މޭޓް މަކެބީ ޒޫލޫ ފިލައިގެން އުޅުމަށްފަހު، މިދިޔަ ހަފުތާގައި ފުލުހުން ވަނީ އެ ދެ ބޭފުޅުން ހައްޔަރުކޮށް، ހަފުތާ ބަންދުގައި ދައުވާ އުފުލާފަ އެވެ.

އުމުރުން 64 އަހަރުގެ ހިޗިލެމާ 2021 ވަނަ އަހަރު ބޮޑު ތަފާތަކުން އިންތިޚާބު ކާމިޔާބު ކުރެއްވިއިރު، ޒެމްބިއާ އޮތީ ބޭރުގެ ދަރަނި ނުދެއްކި، ބައިނަލްއަގުވާމީ މާލީ ބާޒާރުގައި އިތުބާރު ގެއްލިފަ އެވެ. އަދި އެ ދުވަސްވަރު އެ ގައުމުގެ އިންފްލޭޝަން ރޭޓް ހުރީ 24 އިންސައްތައަށްވުރެ މަތީގަ އެވެ.

އިންތިޚާބުގެ ކުރިން ލުސާކާގައި ބީބީސީއަށް ދެއްވި އިންޓަވިއުއެއްގައި ހިޗިލެމާ ވިދާޅުވީ، އޭނާއާ ހަވާލުވީ އިގްތިސާދު އިނދަޖެހި، ބަނގުރޫޓުވެފައިވާ ގައުމެއް ކަމަށެވެ.

ކުރިން ވިޔަފާރިވެރިއެއްގެ ގޮތުގައި އުޅުއްވި ހިޗިލެމާ ވަނީ ދަރަނި ރީސްޓްރަކްޗަރ ކުރުމަށް މަޝްވަރާކޮށް، ބޭރުގެ ދަރަނިވެރިންނާއެކު އޮތް ގުޅުން އަލުން ބަދަހިކުރައްވާފަ އެވެ. މީގެ ސަބަބުން އިންފްލޭޝަން ރޭޓް ދަށްވި ނަމަވެސް، ތަކެތީގެ އަގު އަދިވެސް އުފުލެމުންދާތީ އާންމު ރައްޔިތުން ދިރިއުޅުމުގެ ޚަރަދުތައް ހަމަޖެއްސުމުގައި ދަތިތަކާ ކުރިމަތިލާން ޖެހިފައިވެ އެވެ.

ހިޗިލެމާ މިހާރު އަމާޒު ހިފާފައިވަނީ ފާއިތުވި ފަސް އަހަރު ދުވަހު އޭނާ އެޅުއްވި ބިންގަލުގެ މަތީގައި ގައުމު އިތުރަށް ބިނާކުރުމަށެވެ.

އަންގާރަ ދުވަހު ބޭއްވި ހުވާކުރުމުގެ ރަސްމިއްޔާތުގައި ހިޗިލެމާއަށް ތާއީދުކުރާ އެތައް ހާސް ބަޔަކު އެއްވެ އުފާފާޅުކޮށްފައިވެ އެވެ.

ވެރިރަށުގެ ނޭޝަނަލް ހީރޯސް ސްޓޭޑިއަމްގައި ބޭއްވި މި ރަސްމިއްޔާތުގައި ކެންޔާ، ބޮޓްސްވާނާ، ޒިމްބާބުވޭ، ނެމީބިއާ އަދި ޓެންޒޭނިއާގެ ރައީސުން ހިމެނޭހެން އެފްރިކާގެ ގިނަ ގައުމުތަކެއްގެ ވެރިން ބައިވެރިވެވަޑައިގެންނެވި އެވެ.

ހިޗިލެމާ ރައީސްކަމުގެ ހުވާކުރެއްވީ އޭނާގެ ރަނިންގ މޭޓް މުތާލޭ ނަލުމަންގޯއާ އެކުގަ އެވެ.