ބްރެޒިލްގެ ލެޖެންޑު ރޮބާޓޯ ކާލޯސް އިސްލާމްދީން ޤަބޫލުކޮށްފި
19 އޯގަސްޓު 2026 | ބުދަ 04:37ޝެއިޚް ޖިހާދާ ހަވާލާދީ އަލީ ޝާހިން ވިދާޅުވީ، ކާލޯސް އިސްލާމްދީނާ ގުޅޭ ގޮތުން މައުލޫމާތު ހޯދުމަށް ޝެއިޚްއާ ގުޅަމުންދާތާ ދުވަސް ތަކެއް ވެފައިވާ ކަމަށް. އަދި މީގެ ހަތަރު ހަފުތާ ކުރިން ކާލޯސް ޝެއިޚްއާ ބައްދަލުކޮށް، ޝަހާދަތުގެ ދެކަލިމަ ކިޔައި އިސްލާމްދީން ޤަބޫލު ކޮށްފައިވާ ކަމަށް ޝާހިން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވި.
ބްރެޒިލްްގެ ލެޖެންޑު ރޮބާޓޯ ކާލޯސް | ގެޓީ އިމޭޖަސް
ބްރެޒިލްގެ ފުޓުބޯޅަ ލެޖެންޑު އަދި ރެއާލް މެޑްރިޑުގެ ކުރީގެ ތަރި ރޮބާޓޯ ކާލޯސް އިސްލާމްދީން ޤަބޫލުކޮށްފައިވާ ކަމަށް ތުރުކީގެ ޤާނޫނު ހަދާ މަޖިލީހުގެ މެންބަރަކު ހާމަކުރައްވައިފި އެވެ.
މިކަން ހާމަކުރެއްވީ ތުރުކީގެ ވެރިކަންކުރާ އޭކޭ ޕާޓީގެ މެންބަރެއް ކަމަށްވާ އަލީ ޝާހިން، ބްރެޒިލްގެ ސައޮ ޕައުލޯގައި އެ ޤައުމުގެ މުސްލިމް މުޖުތަމައުގެ އިސްވެރިންނާ ބައްދަލު ކުރެއްވުމަށްފަހު އެވެ.
އަލީ ޝާހިން ވިދާޅުވި ގޮތުގައި ކާލޯސް އިސްލާމްދީން ޤަބޫލުކުރި ކަމުގެ މައުލޫމާތު އޭނާ އަށް ދެއްވީ ބްރެޒިލްގެ މުސްލިމް މުޖުތަމައުގެ އިސް ފަރާތެއް ކަމަށްވާ ޝެއިޚް ޖިހާދު ހައްމާދޭ އެވެ. ޝެއިޚް ޖިހާދަކީ ނޭޝަނަލް އެސޯސިއޭޝަން އޮފް އިސްލާމިކް ޖޫރިސްޓްސް (އަނާޖީ) ގެ ނައިބު ރައީސްގެ އިތުރުން، އެ ޖަމިއްޔާގެ ދީނީ މުޝީރު އެވެ.
ޝެއިޚް ޖިހާދާ ހަވާލާދީ އަލީ ޝާހިން ވިދާޅުވީ، ކާލޯސް އިސްލާމްދީނާ ގުޅޭ ގޮތުން މައުލޫމާތު ހޯދުމަށް ޝެއިޚްއާ ގުޅަމުންދާތާ ދުވަސްތަކެއް ވެފައިވާ ކަމަށެވެ. އަދި މީގެ ހަތަރު ހަފުތާ ކުރިން ކާލޯސް ޝެއިޚްއާ ބައްދަލުކޮށް، ޝަހާދަތުގެ ދެކަލިމަ ކިޔައި އިސްލާމްދީން ޤަބޫލު ކޮށްފައިވާ ކަމަށް ޝާހިން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވި އެވެ. މި ޕޯސްޓުގައި އޭނާ ވަނީ ކާލޯސް އަށް މަރުހަބާ ދަންނަވައި، އޭނާ އާއި އޭނާގެ އާއިލާ އަށް ބާއްޖަވެރިކަމާއި ދުޅަހެޔޮކަމަށް އެދިވަޑައިގެންފައި އެވެ.
މި ބައްދަލުވުން ބާއްވާފައިވަނީ ސައޮ ޕައުލޯގައި ހުންނަ އިސްލާމިކް ޗެރިޓަބަލް ޔޫތު ލީގު އޮފް ބްރެޒިލްގައި އެވެ. މި ބައްދަލުވުމުގައި އެ ލީގުގެ ރައީސް ޝަރީފް ނެޓޯ އާއި ޕާރީ މޮސްކް ފައުންޑޭޝަންގެ ރައީސް އުމަރު އާރިފްގެ އިތުރުން ބްރެޒިލްގެ އިސްލާމީ އެކި ޖަމިއްޔާތަކުގެ މަންދޫބުން ބައިވެރިވެ ވަޑައިގެންނެވި އެވެ.
މީގެ އިތުރުން، އުމުރުން 53 އަހަރުގެ ކާލޯސް ދާދި ފަހުން ވަނީ ސްޕެއިންގައި މަސައްކަތް ކުރާ މޮރޮކޯ އަށް އުފަން ފުޓުބޯޅަ އެޖެންޓެއް ކަމަށްވާ ސުހައިލާ އަތު ތޮހީރީއާ ކައިވެނި ކޮށްފައި އެވެ. ނަމަވެސް، އިސްލާމްދީން ޤަބޫލުކުރިކަމާ ގުޅޭ ގޮތުން ކާލޯސް މިހާތަނަށް ރަސްމީކޮށް އެއްވެސް އެއްޗެއް ބުނެފައި ނުވެ އެވެ.
ދުނިޔޭގައި އުފެދުނު އެންމެ މޮޅު ލެފްޓް ބެކުންގެ ތެރޭގައި ހިމެނޭ ކާލޯސް ވަނީ އޭނާގެ ކެރިއަރުގެ ބޮޑު ބައެއް ރެއާލް މެޑްރިޑުގައި ހޭދަކޮށްފައި އެވެ. އޭގެ ފަހުން 2007 ވަނަ އަހަރު އޭނާ ވަނީ ތުރުކީގެ ފެނަބާޗޭ އަށް ބަދަލުވެ، އެ ކުލަބަށް ވެސް ކުޅެދީފައި އެވެ. ކާލޯސް އަކީ ބްރެޒިލް އާއެކު 2002 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޓީމުގެ މުހިންމު ކުޅުންތެރިއެކެވެ.
