ވޯލްޑް ކަޕް: ބަންގްލަދޭޝްގެ ރައްޔިތުންގެ މެދުގައި ބްރެޒިލާއި އާޖެންޓީނާގެ ފުޓްބޯޅައަށް އޮންނަ ފޯރިގަދަ ލޯތްބަކީ އާދައިގެ ކަމެއް ނޫނެވެ!

170 މިލިއަން މީހުންގެ އާބާދީއެއް އޮންނަ ބަންގްލަދޭޝްއަށް 2026 ވަނަ އަހަރުގެ ވޯލްޑް ކަޕަށް ކޮލިފައި ނުވެވުނު ނަމަވެސް، އެއީ އާދަޔާ ޚިލާފަށް ފުޓްބޯޅަ އަށް ފޯރި ހުންނަ ބައެކެވެ. ވަކިން ޚާއްސަ ކޮށް އެކަން ވޯލްޑްކަޕްގެ ދުވަސް ވަރު އެގައުމުން ފެނެ އެވެ. އެ ގައުމަކީ ދުނިޔޭގެ ފުޓްބޯޅައިގެ ގަދަ ދެ ބާރު ކަމަށްވާ ބްރެޒިލް އަދި އާޖެންޓީނާއަށް ނިސްބަތްވާ އެންމެ ފޯރިގަދަ ސަޕޯޓަރުން އުޅޭ އެއް ގައުމެވެ.

މިދިޔަ މެއި މަހުން ފެށިގެން އެ ގައުމުގެ ފުޓްބޯޅަ ސަޕޯޓަރުން އަންނަނީ ވާދަވެރި ދެ ގައުމުގެ ބޮޑެތި ދިދަތައް ހަރުކޮށް، އެއް ބަޔަކު އަނެއް ބަޔަކަށްވުރެ ކުރިހޯދުމަށް މަސައްކަތް ކުރަމުންނެވެ. މިއީ ގައުމީ ވަންތަކަމަށް މަރުދޭ ކަމަށް ބުނާ ބަންގްލަދޭޝްގެ ރައްޔިތުން ބޭރު ގައުމެއްގެ ކުލަތަކަށް މިހާ ބޮޑު ތަރުހީބެއް ދޭ މަދު ހާލަތުތަކުގެ ތެރެއިން ހާލަތެކެވެ.

ލިއޮނަލް މެސީގެ ބިޔަ ކަޓްއައުޓްތައް މަގުތަކުގައި ބަހައްޓާފައިވާއިރު، ވެރިރަށް ޑާކާގެ މުއްސަނދި އަވަށެއް ކަމަށްވާ ގުލްޝާންގެ ކުޅިވަރު މާރުކޭޓުތަކަށް ސަޕޯޓަރުން އެއްވަނީ ގާތްގަނޑަކަށް 500 ޓާކާ (3 ޕައުންޑް) އަށް ލިބޭ އާޖެންޓީނާ އަދި ބްރެޒިލްގެ ޖާޒީތައް ގަތުމަށެވެ.

ފީފާ ވޯލްޑް ކަޕް 2026 ގެ ސެމީ ފައިނަލް މެޗު ބޮޑު ސްކްރީނުން ބެލުމަށްޓަކައި، މިދިޔަ ބުދަ ދުވަހު ވެރިރަށް ޑާކާގެ މުނިޝީގަންޖްގައި ހުންނަ ސުޕަރ މާކެޓް ޗޮއްތޯރު ސަރަހައްދަށް އެތައް ހާސް ސަޕޯޓަރުންނެއް އެއްވި އެވެ. އެޓްލާންޓާގައި ކުޅުނު މެޗުން އާޖެންޓީނާ 2-1 އިން އިންގްލެންޑް ބަލިކޮށް، ޖުލައި 19 ގައި އޮންނަ ފައިނަލަށް ދަތުރުކުރުމާއެކު، އާޖެންޓީނާގެ ޖާޒީ ލައިގެން ތިބި ސަޕޯޓަރުން އުފާފާޅުކޮށް އަތްޖަހާ މަންޒަރު ފެންނަ ވީޑިއޯތައް ސޯޝަލް މީޑިއާގައި ވަނީ މީހުން ހައިރާން ކޮށްލުވާފަ އެވެ.

ބަންގްލަދޭޝްގެ ރައްޔިތުން ފުޓްބޯޅައަށް ބަހައްޓާ ލޯބި ފީފާ އާއި އާޖެންޓީނާގެ ކުޅުންތެރިން 2022 ވަނަ ހިސާބުން  ބަލައިގަނެފައިވެ އެވެ. އަމިއްލަ ގައުމާ 17،000 ކިލޯމީޓަރު ދުރުގައި އޮތް ގައުމަކުން ލިބޭ މި ބޮޑު ތަރުހީބުން އާޖެންޓީނާގެ ކުޅުންތެރިން ތިބީ ހައިރާންވެފަ އެވެ. އަދި އާޖެންޓީނާއަށް އޮތް މި ލޯބީގެ މައި ތަނބަކީ ޑިއޭގޯ މަރަޑޯނާ އެވެ.

ލެޓިން އެމެރިކާގެ މި ގައުމަށް ބަންގްލަދޭޝްގެ ރައްޔިތުންގެ ހިތުގައި އޮތް ލޯތްބަކީ ޖިއޮގްރަފީ ގޮތުން ނުވަތަ ސިޔާސީ ގޮތުން އެއްވެސް ގުޅުމެއް އޮވެގެން އުފެދުނު ލޯތްބެއް ނޫނެވެ. މިއީ ޖީލުތަކުން ފެށިގެން އަންނަ ލޯތްބެކެވެ. 

އިންޑިއާ ބައިބައިވުމުގެ ކުރިން، 19 ވަނަ ގަރުނުގައި އޭރުގެ ވެރިރަށް ކަލްކަތާއަށް ފުޓްބޯޅަ ތައާރަފްކުރީ އިނގިރޭސި އިސްތިއުމާރީ ބާރުތަކުންނެވެ. 60 އާއި 70 ގެ އަހަރުތަކުގައި، އޭރުގެ އިރުމަތީ ޕާކިސްތާން (މިހާރުގެ ބަންގްލަދޭޝް) ސިޔާސީ ހަލަބޮލިކަމެއްގެ ތެރޭގައި އޮތްއިރު، އެ ގައުމުގެ ޒުވާނުން ތިބީ އުންމީދަކަށާއި ބަތަލަކަށް ފެންބޮވައިގެންފަ އެވެ.

އެ ދުވަސްވަރު ޒުވާނުންނަށް އެ އުންމީދު ލިބުނީ އޭރުގެ އެންމެ ވަރުގަދަ ޓީމު ކަމަށްވާ ބްރެޒިލްގެ ފަރާތުންނެވެ. ޕެލޭ ވެގެންދިޔައީ ބަންގްލަދޭޝްގެ އެތައް ޖީލެއްގެ ފުޓްބޯޅަ ކުޅުންތެރިންނަށް ނަމޫނާ ދެއްކި، އެންމެ މަގުބޫލު ޝަޚުސިއްޔަތަށެވެ.

ކްރިކެޓަށް ލޯބިކުރާ މި ގައުމުގައި ފުޓްބޯޅަ އާންމުވެގެންދިޔައީ 1980 ގެ މެދުތެރޭގައި ގޭގެއަށް ޓީވީ ތައާރަފްވި ދުވަސްވަރު އެވެ. ގިނަ ބަޔަކަށް 1986 ގެ ވޯލްޑް ކަޕަކީ ކުލަކޮށް ފެނުނު ފުރަތަމަ މުބާރާތެވެ. އެ މުބާރާތުގައި އިންގްލެންޑް ކޮޅަށް މަރަޑޯނާ ޖެހި ލަނޑުތަކަކީ ހަމައެކަނި ފުޓްބޯޅަ ލަނޑުތަކެއް ނޫނެވެ. އެއީ ކުރީގެ އިސްތިއުމާރީ ބާރެއްގެ މައްޗަށް ލިބުނު ރަމްޒީ ކާމިޔާބީއެއްގެ ގޮތުގައި ބަންގްލަދޭޝްގެ ރައްޔިތުން ބަލައިގަތެވެ.

އެ ދުވަސްވަރު އުމުރުން އެންމެ 12 އަހަރުގެ މަޝިއުރް ހަނދާން ހުންނަ ގޮތުގައި، އަމިއްލަ ގައުމަށް ފުޓްބޯޅައިގައި ކާމިޔާބީއެއް ނުލިބޭތީ، ބަންގްލަދޭޝްގެ ގިނަ އާއިލާތަކެކޭ އެއްފަދައިން އޭނާގެ އާއިލާ ވެސް ތިބީ އާ ބަތަލަކު ބަލައިގަންނަން ތައްޔާރަށެވެ. އެއީ އެކަމަށް އެންމެ މުނާސަބު ވަގުތެވެ.

"އަހަރެމެންގެ ގޭގައި ޓީވީއަކީ އެންމެންގެ ސަމާލުކަން ހުއްޓޭ އެއްޗެއް. އާޖެންޓީނާގެ ފުޓްބޯޅައަށް އަހަރެމެން ތިބީ އާޝޯޚުވެފައި،" އޭނާ ބުންޏެވެ.

"އަހަރެންގެ ބޮޑުބޭބެމެންނަކީ ހުސް އާޖެންޓީނާ ސަޕޯޓަރުން. އަހަރެމެން ތިންބެއިން ތިބޭއިރު، އެންމެ ހަގު ކޮއްކޮ ފިޔަވައި ދެން ތިބި އެންމެންނަކީ ވެސް އާޖެންޓީނާ ސަޕޯޓަރުން."

"ފުޓްބޯޅައަކީ ކޮބައިކަން އެނގުނު ދުވަހުން ފެށިގެން އަހަރެން ސަޕޯޓްކުރަނީ އާޖެންޓީނާ އަށް."

ނަމަވެސް، ފުޓްބޯޅައަށް އޮތް މި ފޯރީގެ ސަބަބުން ބައެއް ފަހަރު ހަމަނުޖެހުންތައް ވެސް ހިނގަ އެވެ.

ލިއޮނަލް މެސީ އަތުން ޕެނަލްޓީއެއް ނާކާމިޔާބުވުމާ ގުޅިގެން ހިނގި ދެބަސްވުމެއްގައި މީހަކު މަރާލާފައިވާއިރު، ވޯލްޑް ކަޕާ ގުޅުންހުރި ހަމަނުޖެހުންތަކުގައި މިހާތަނަށް މަދުވެގެން 12 މީހުން ވަނީ މަރުވެފަ އެވެ.

ލޯކަލް ރިޕޯޓްތައް ބުނާ ގޮތުގައި، ސައި ހޮޓަލެއްގައި ތިބެގެން މެޗު ބަލަން އިން ރިކްޝާ ދުއްވާ މީހަކަށް "އާޖެންޓީނާ ސަޕޯޓަރުން" ހަމަލާދިނީ، އާޖެންޓީނާގެ ތަރި މެސީ އަތުން ޕެނަލްޓީ ނާކާމިޔާބުވުމުން އެކަމަށް މަލާމާތް ކުރުމުންނެވެ.

މީގެ އިތުރުން، ޖުލައި 8 ވަނަ ދުވަހު ޗައްޓޮގްރާމްގައި އާޖެންޓީނާ އާއި މިސްރު ބައްދަލުކުރި މެޗު ބަލަން އަވަސްއަރުވާލައިގެން ދަނިކޮށް ހިނގި ސައިކަލް އެކްސިޑެންޓެއްގައި ފަޔާޒް ތަޖްރިއާން ވަނީ މަރުވެފަ އެވެ.

ނަރައިލްގައި ފުޓްބޯޅައާ ގުޅިގެން ހިނގި ދެބަސްވުމެއްގައި މުސްތަފާ ކާޒީ ނަމަކަށް ކިޔާ މީހަކު ވަނީ ހަމަލާދީ މަރާލާފަ އެވެ.

އެހެން ހާދިސާތަކަށް ބަލާއިރު، ޗައްޓޮގްރާމްގައި އުފާފާޅުކުރުމުގެ ތެރޭގައި ގޯލްޕޯސްޓެއް ވެއްޓި މަހީދުލް އިސްލާމް މަރުވެފައިވެ އެވެ.

މި މަހުގެ ކުރީކޮޅު ހަބީގަންޖްގައި ބްރެޒިލް އާއި އާޖެންޓީނާ ސަޕޯޓަރުންގެ މެދުގައި ހިނގި ކުރިމަތިލުންތަކެއްގައި އެތައް ބަޔަކަށް ވަނީ އަނިޔާވެފަ އެވެ.

ޝަރިއަތުޕޫރު ސަރަހައްދުގެ ބައެއް ޒުވާނުން ވަނީ، 2002 ވަނަ އަހަރަށްފަހު ބްރެޒިލުން ތަށި ހޯދަން ކުރާ އިންތިޒާރު ނިމުމަކަށް ނާންނަނީސް ކައިވެނި ނުކުރާނެ ކަމަށް ވައުދުވެފަ އެވެ.

ބަންގްލަދޭޝްގެ ޒުވާން ސަޕޯޓަރުންނަށް ބަލާއިރު، މަރަޑޯނާ ދޫކޮށްދިޔަ ހުސްތަން ފޫބައްދައިދިނީ އާޖެންޓީނާގެ ތަރި ލިއޮނަލް މެސީ އެވެ. އަދި ބްރެޒިލްގެ ސަޕޯޓަރުންގެ އެންމެ މަގުބޫލު ކުޅުންތެރިއަކީ ނޭމާ އެވެ.

ބްރެޒިލް އާއި އާޖެންޓީނާއަކީ އެންމެ ބޮޑު ތަރުހީބެއް އޮތް ދެ ގައުމު ކަމުގައި ވިޔަސް، އެހެން ގައުމުތަކަށް ވެސް ބައެއް ފަހަރު ސަމާލުކަން ލިބެއެވެ. އުމުރުން 72 އަހަރުގެ އަމްޖަދު ހުސައިން ވަނީ އޭނާގެ ބިމުން ބައެއް ވިއްކާލައިގެން ލިބުނު ފައިސާއިން 7.5 ކިލޯމީޓަރު ދިގު ޖަރުމަނު ދިދައެއް ތައްޔާރުކޮށްގެން ސަމާލުކަން ހޯދާފައެވެ. "ޕްރޮތޮމް އާލޯ" ނޫހުން ރިޕޯޓްކޮށްފައިވާ ގޮތުގައި އޭނާގެ ހުވަފެނަކީ އެ ބިޔަ ދިދަ ޖަރުމަނުގެ މިއުޒިއަމަކުން ޖާގަ ހޯދުމެވެ.

މުޅިން އަލަށް ކުއާޓާ ފައިނަލަށް ދަތުރުކޮށް ތާރީޚު ހެދި ނޯވޭއިން ވެސް ވަނީ ބަންގްލަދޭޝްގެ ފުޓްބޯޅަ ފޯރީގެ ބޭނުން ހިފުމަށް މަސައްކަތްކޮށްފަ އެވެ. އެގޮތުން އެ ގައުމުގެ ޓީމަށް ސަޕޯޓްކުރުމަށް ބަންގްލަދޭޝްގެ ސަޕޯޓަރުންގެ ކިބައިން ވަނީ އެދިފަ އެވެ.

ނޯވޭ އެމްބަސީން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ބަންގްލަދޭޝް މިނިވަންވުމަށްފަހު އެ ގައުމު އެންމެ ފުރަތަމަ ބަލައިގަތް ގައުމުތަކުގެ ތެރޭގައި ނޯވޭ ހިމެނޭ ކަމަށާއި، ދެ ގައުމުގެ ދެމެދުގައި އޮތީ ވަރަށް ބަދަހި ގުޅުމެއް ކަމަށެވެ. "ވީމާ، ބަންގްލަދޭޝްގެ ރައްޔިތުން ބުނަނީ ކީކޭ؟ ކުޑަ ޓީމަކަށް ސަޕޯޓްކުރަންވީ ވަގުތު މިއީ! އެންމެން އެކުގައި ބޮޑު ހުވަފެނެއް ދެކެންވީ ވަގުތު މިއީ،" އެމްބަސީގެ ޕޯސްޓުގައިވެ އެވެ.

ބަންގްލަދޭޝްގެ ސަޕޯޓަރުން ބުނާ ގޮތުގައި މިހާރު ކުރެވެން އޮތް ހަމައެކަނި ކަމަކީ އިންތިޒާރު ކުރުމެވެ. ބަންގްލަދޭޝްގައި ތިބި އާޖެންޓީނާގެ ކޮންމެ ސަޕޯޓަރަކަށް ވެސް ޔަގީންވަނީ ވޯލްޑް ކަޕް ފައިނަލުގައި އާޖެންޓިނާ އަށް ކާމިޔާބު ލިބޭނެ ކަމެވެ.