ހައްޔަރު ކޮށްފައިވާ ކެމްބޯޑިއާގެ އިދިކޮޅު ލީޑަރު، ކެމް ސޯކާގެ އިސް ނައިބެއް ކަމުގައިވާ، މޫ ސޯޗުއާ އެޤައުމު ދޫކުރައްވައި ފިއްލަވައިފިއެވެ.
އެކަމަނާ ފިއްލަވާފައި މިވަނީ، ނިމިގެންދިޔަ ސެޕްޓެމްބަރު މަހުގެ 3 ވަނަ ދުވަހު ކެމްބޯޑިއާ ނޭޝަނަލް ރެސްކިއު ޕާޓީގެ ލީޑަރު ކެމް ސޯކާ ހައްޔަރުކޮށް، އިދިކޮޅު އެހެން ލީޑަރުންނަށްވެސް ބޮޑުވަޒީރު، ހުން ސެންގެ ސަރުކާރުން ގިނަ ފިއްތުންތަކެއް ކުރިމަތިކޮށްފައި ވަނިކޮށެވެ. ކެމް ސޯކާ ހައްޔަރުކޮށް، އެމަނިކުފާނުގެ މައްޗަށް ޤައުމަށް ޤައްދާރުވުމުގެ ތުޙުމަތު ކޮށްފައިވާއިރު، އިދިކޮޅު ފަރާތްތަކުން ބުނަމުންދަނީ، އެފަރާތްތަކަށް ސަރުކާރުން ކުރިމަތި ކުރަމުންދާ ހުރަސްތަކަކީ އަންނަ އަހަރުގެ ރިޔާސީ އިންތިޚާބުގެ ކުރިން ސަރުކާރާއި އިދިކޮޅު ހުރިހާ ފަރާތްތައް "ހުސްކޮށްލުމަށް" ކުރަމުންދާ ކަންކަން ކަމަށެވެ.
ޤައުމު ދޫކުރެއްވުމަށް ފަހު ރޮއިޓަރޒްއަށް ދެއްވި އިންޓަރވިއުއެއްގައި، އުމުރުފުޅުން މިހާރު 63 އަހަރުފުޅު ވެފައިވާ މޫ ސޯޗުއާ ވިދާޅުވީ، އިދިކޮޅު ފަރާތްތަކެއް ނެތި، ޤައުމަށް ބިރުވެރިކަން ފެތުރިފައިވާ ކަމަށާ، އަންނަ އަހަރުގެ ރިޔާސީ އިންތިޚާބާއި މެދުވެސް މާބޮޑު އުއްމީދެއް ނެތް ކަމަށެވެ.
އެކަމަނާ ވިދާޅުވީ، މިހާރު ޤާއިމް ވެފައިވާ ޑިކްޓޭޓަރޝިޕާއި ދެކޮޅަށް ބަހެއް ބުނުމުގެ ފުރުސަތު އެއްކޮށް ގެއްލިގެންދާ ވަރަށް އެ ޤައުމުގެ ޑިމޮކްރަސީ ގެއްލިގެން ގޮސްފައިވާ ކަމަށެވެ.
މިކަމާއި ގުޅިގެން ކެމްބޯޑިއާ ސަރުކާރުގެ ތަރުޖަމާނު، ފޭ ސައިފަން ވިދާޅުވީ، މޫ ސޯޗުއާ ޤައުމު ދޫކުރައްވައި ފިއްލެވުމަކީ އެކަމަނާގެ އަމިއްލަފުޅު ނިންމެވުމެއް ކަމަށާ، އެކަމަނާ ހައްޔަރުކުރުމަށް ސަރުކާރުން މަސައްކަތްކުރާކަން އެނގިވަޑައިގެންފައިނުވާ ކަމަށެވެ.
ނިމިގެންދިޔަ މަހު މޫ ސޯޗުއާ ހައްޔަރުކުރި ފަހުން، ސަރުކާރުގެ އަނިޔާވެރިކަމަށް ފިއްލެވުމަށް، ކެމްބޯޑިއާގެ ޤާނޫނު ހަދާ މަޖިލީހުގައި ހިމެނިވަޑައިގަންނަވާ ކެމްބޯޑިއާ ނޭޝަނަލް ރެސްކިއު ޕާޓީގެ މެންބަރުންގެ ތެރެއިން ގިނަ މެންބަރުން ވަނީ ފިއްލަވައިގެން އެ ޤައުމުން ބޭރަށް ވަޑައިގެންފައެވެ.
ކެމްބޯޑިއާ ސަރުކާރުން ހިންގަމުންދާ ކަންކަމާއި ދެކޮޅަށް ހުޅަނގުގެ ބާރުތަކުން ވާހަކަ ދައްކާފައިވާއިރު، ސަރަހައްދީ އެންމެ ބޮޑު އެއް ބާރު ކަމުގައިވާ ޗައިނާއިން ވަނީ ކެމްބޯޑިއާ ސަރުކާރަށް ތާޢިދުކޮށް ވާހަކަ ދައްކާފައެވެ.
