ރާއްޖެ އާއި ލަންކާގެ ވިޔަފާރީގެ ގުޅުން ބަދަހިކުރުމަށް ދެ ގައުމުގެ ޗެމްބަރ އޮފް ކޮމާސް އިން އެއްބަސްވުމެއްގައި ސޮއިކޮށްފި

ސްރީލަންކާ އާއި ދިވެހިރާއްޖޭގެ ވިޔަފާރިތަކަށް، ވިޔަފާރި އާއި އިންވެސްޓްމަންޓް އަދި އިގްތިސާދީ ގުޅުންތައް ފުޅާކުރުމަށް އާ ފުރުސަތުތަކެއް ހުޅުވާލުމުގެ ގޮތުން، ސިލޯން ޗެމްބަރ އޮފް ކޮމާސް އާއި މޯލްޑިވްސް ބިޒްނަސް ޗެމްބަރާ ދެމެދު ފަހުމުނާމާއެއްގައި (އެމް.އޯ.ޔޫ) ސޮއިކޮށްފި އެވެ.

މި ފަހުމުނާމާގައި ސޮއިކުރުމުގެ ރަސްމިއްޔާތު ބާއްވާފައިވަނީ ސްރީލަންކާގެ މިނިސްޓަރ އޮފް ޓްރޭޑް، ކޮމާސް، ފުޑް ސެކިއުރިޓީ އެންޑް ކޯޕަރޭޓިވް ޑިވެލޮޕްމަންޓް ވަސަންތަ ސަމަރަސިންހަ އާއި، ދިވެހިރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ހައިކޮމިޝަނަރު މަސްއޫދު އިމާދު ހާޒިރުވި ރަސްމިއްޔާތެއްގަ އެވެ. މި އެއްބަސްވުމުގައި ސިލޯން ޗެމްބަރ އޮފް ކޮމާސްގެ ފަރާތުން ސޮއިކުރެއްވީ އެ އިދާރާގެ ޗެއަރޕާސަން މިސްޓަރ ކްރިޝަން ބަލެންދްރަ އެވެ. އަދި މޯލްޑިވްސް ބިޒްނަސް ޗެމްބަރުގެ ފަރާތުން ސޮއިކުރެއްވީ އެ ޗެމްބަރުގެ ރައީސް އަހުމަދު އަމްޖަދެވެ.

މި އިއްތިހާދުގެ ސަބަބުން ދެ ޗެމްބަރުގެ ދެމެދުގައި ދެމެހެއްޓެނިވި ގޮތެއްގައި ގުޅުން ބަދަހިކުރުމަށް މަގުފަހިވެގެންދާނެ ކަމަށް ސްރީލަންކާގެ މީޑިއާ ރިޕޯޓުތަކުގައިވެ އެވެ. މީގެ ތެރޭގައި ވިޔަފާރިތަކުގެ މެދުގައި ގުޅުން ގާއިމުކޮށްދިނުމާއި، ވިޔަފާރި އާއި އިންވެސްޓްމަންޓްގެ ފުރުސަތުތައް އިތުރުކުރުމާއި، ވިޔަފާރި ވަފުދުތަކުގެ ދަތުރުތަކާއި ނެޓްވޯކިންގ ހަރަކާތްތަކަށް އެހީތެރިކަން ފޯރުކޮށްދިނުން ހިމެނެ އެވެ. މީގެ އިތުރުން މާކެޓް އިންޓެލިޖެންސް ނުވަތަ ބާޒާރުގެ މައުލޫމާތު ހިއްސާކުރުމާއި، ދެ ގައުމުންވެސް ޝައުގުވެރިވާ ދާއިރާތަކުން އެއްބާރުލުން އިތުރުކުރުމަށް މި ފަހުމުނާމާގެ ދަށުން މަސައްކަތް ކުރެވޭނެ އެވެ.

ދިވެހިރާއްޖެއާއި ސްރީލަންކާއަކީ އިގްތިސާދީ ގޮތުންނާއި ރައްޔިތުންގެ މެދުގައި އޮންނަ ގުޅުމުގެ ގޮތުން ޒަމާންވީ ގާތް ގުޅުމެއް އޮންނަ ދެ ގައުމެވެ. އަދި ފަތުރުވެރިކަމާއި، ލޮޖިސްޓިކްސް، އިމާރާތްކުރުމުގެ ދާއިރާ، ސިއްހީ ހިދުމަތް، ކާބޯތަކެއްޗާއި ދަނޑުވެރިކަން، މާލީ ހިދުމަތްތައް އަދި ފަންނީ ހިދުމަތްތަކުގެ ދާއިރާއިން ދެ ގައުމުގެ މެދުގައި އޮތް ގުޅުން އިތުރަށް ފުޅާކުރުމުގެ ބޮޑު ފުރުސަތެއް އެބައޮތެވެ. މި ފަހުމުނާމާގެ ސަބަބުން، މުއައްސަސާތަކުގެ މެދުގައި އޮންނަ ގާތް ގުޅުމުގެ ތެރެއިން މި ފުރުސަތުތަކުގެ ބޭނުން ހިފުމަށް ވިޔަފާރިތަކަށް އަމަލީ މަގުތަކެއް ފަހިވެގެންދާނެ ކަމަށް ވެސް ބުނެފައިވެ އެވެ.

މި އެއްބަސްވުމުގައި ސޮއިކުރުމާއެކު، ސިލޯން ޗެމްބަރ އޮފް ކޮމާސްގެ ދަށުން ހިންގާ "ސްރީލަންކާ-މޯލްޑިވްސް ބިޒްނަސް ކައުންސިލް" އިން ދެ ގައުމުގެ ދެމެދުގައި އޮންނަ ވިޔަފާރީގެ ގުޅުން ކުރިއެރުވުމަށް ކުރާ މަސައްކަތްތައް އިތުރަށް ވަރުގަދަވެގެންދާނެ އެވެ. މީގެ ތެރޭގައި ވިޔަފާރިތައް ގުޅުވައިދިނުމާއި، މަޝްވަރާތަކަށް މަގުފަހިކުރުމާއި، ދެ ގައުމުގެ އިގްތިސާދީ ކުރިއެރުމަށް އެހީތެރިވެދޭނެ ފަދަ ބައިވެރިވުންތައް އުފެއްދުން ހިމެނޭ ކަމަށް ސިލޯން ޗެމްބަރ އޮފް ކޮމާސް އިން ބުނެފައިވެ އެވެ.