ކުރުދިސްތާނުގެ ރިޔާސީ އިންތިޚާބު ނޮވެމްބަރަށް ތާވަލް ކޮށްފި

އިރާޤުން ވަކިވެ، މިނިވަން ދައުލަތެއް އިޢުލާނު ކޮށްފައިވާ ކުރުދިސްތާނުގެ ރިޔާސީ އިންތިޚާބާއި އާންމު އިންތިޚާބު އަންނަ ނޮވެމްބަރު މަހު ބާއްވަން ތާވަލް ކޮށްފިއެވެ.

ކުރުދިސްތާނުގެ ވެރިރަށް އަރްބިލަށް ނިސްބަތްވާ ރޫޑޯ ޓީވީން ހާމަކޮށްފައިވާ ގޮތުގައި މި އިންތިޚާބުތައް ބޭއްވުމަށް ތާވަލް ކޮށްފައި ވަނީ އަންނަ ނޮވެމްބަރ މަހުގެ 1 ވަނަ ދުވަހުއެވެ. އިރާޤުން ވަކިވެ، ވަކި ދައުލަތެއް ޤާއިމް ކުރުމަށް ކުރުދީން މިނިވަންކަމުގެ ވޯޓު ނަގާފައި ވަނީ ނިމިގެން ދިޔަ ސެޕްޓެމްބަރ މަހުގެ 25 ވަނަ ދުވަހުއެވެ. އެ ވޯޓުގައި ކުރުދީންގެ ގިނަ ބަޔަކު ވަނީ އިރާޤުން ވަކިވުމަށް ތާޢީދުކޮށް ވޯޯޓުދީފައެވެ.

ކުރުދިސްތާނުގެ އިންތިޤާލީ ސަރުކާރުން ބުނި ގޮތުގައި ރިޔާސީ އިންތިޚާބު ބޭއްވެންދެން ކުރުދީ ދައުލަތުގެ ވެރިކަމުގައި ހުންނަވާނީ އިންތިޤާލީ ރައީސް މަސްޢޫދު ބަރްޒާނީއެވެ.

ކުރުދީން ނެގި މިނިވަންކަމުގެ ވޯޓާއި ގުޅިގެން، އިރާޤުގެ ސަރުކާރުން ނުރުހުން ފާޅުކޮށްފައިވާއިރު، އިރާޤާއި، އީރާނާއި، ތުރުކީން ގުޅިގެން ދަނީ އަލަށް އުފެއްދި ދައުލަތަށް ދަތިކުރުމުގެ އެކި ފިޔަވަޅުތައް އަޅަމުންނެވެ.

3.3 މިލިއަން މީހުން ބައިވެރިވި ވޯޓުގައި ކުރުދީ ވަކި ދައުލަތެއް ޤާއިމް ކުރުމަށް ލިބުނު ބޮޑު އަގުލަބިއްޔަތަށް ފަހު، އިރާޤާއި އީރާނު ގުޅިގެން ކުރުދިސްތާނުގެ ބޯޑަރުތައް ކައިރީ ވަނީ އަސްކަރީ އޮޕަރޭޝަންތައް ވެސް ފަށާފައެވެ.