ފުލުހުންގެ ބެލުމުގެ ދަށުގައި ހުރި 30،000 ޑޮލަރު ގެއްލުނު މައްސަލައިގައި އިހުމާލުވި އޮފިސަރު ވަކިކުރަން ނިންމައިފި
30 ޖުލައި 2026 | ބުރާސްފަތި 06:43ފުލުހުންގެ ބެލުމުގެ ދަށުގައި ހުރި 30،000 ޑޮލަރު މުވައްޒަފެއްގެ އިހުމާލުން ހަލާކުވި މައްސަލައެއް ފެންމަތިވުމާ ގުޅިގެން، އެ މުވައްޒަފު ވަޒީފާއިން ވަކިކުރުމަށް ޑިސިޕްލިނަރީ ބޯޑުން ވަނީ ނިންމާފައި. މި ފައިސާގައި ފަރަގެއް ހުރިކަން އެނގުނީ ކޯޓު އަމުރަކަށް އެ ފައިސާ ހަވާލުކުރަން އުޅުމުގެ ތެރޭގައި ކަމަށް ފުލުހުން ބުނެފައިވޭ. އެހެންކަމުން، އިސްތިއުނާފު މަރުހަލާ ނިމެންދެން އެ މުވައްޒަފު މިހާރު ހުރީ ސަސްޕެންޝަނުގައި
ބޭރު ފައިސާ މާރު ކުރާތަނެއްގައި ކެޝިއަރަކު އެމެރިކާ ޑޮލަރު ގުނަނީ | ގެޓީ އިމޭޖަސް
ފުލުހުންނަށް ހުށަހެޅުނު މައްސަލައަކާ ގުޅިގެން ހިފެހެއްޓި ފައިސާއިން 30،000 ޑޮލަރު ގެއްލުނު މައްސަލައިގައި ފުލުހަކު ވަޒީފާއިން ވަކިކުރަން ފުލުހުންގެ ޑިސިޕްލިނަރީ ބޯޑުން ނިންމައިފި އެވެ.
ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، މިއީ ދިވެހި ފުލުހުންގެ ޚިދުމަތުން 2019 ވަނަ އަހަރު ތަހުގީގުކުރި މައްސަލައެއްގައި ހިމެނޭ އެމެރިކާ ޑޮލަރުތަކެއް ކަމަށެވެ.
އެ ޑޮލަރުތައް ފުލުހުންގެ ފައިނޭންސް ޑިޕާޓްމަންޓުގެ ބެލުމުގެ ދަށުގައި ހުއްޓައި، އެކަމާ ހަވާލުވެ ހުރި މުވައްޒަފެއްގެ އިހުމާލުން އެފައިސާ ހަލާކުވި މައްސަލައެއް ޕްރޮފެޝަނަލް ސްޓޭންޑާޑްސް ކޮމާންޑުން ތަހުގީގުކޮށްފައިވާ ކަމަށް އޭނާ ވިދާޅުވި އެވެ.
އެ މައްސަލަ ޑިސިޕްލިނަރީ ބޯޑަށް ހުށަހެޅުމުން، އެ މުވައްޒަފު ވަޒީފާއިން ވަކިކުރުމަށް ލަފާދީ، އިސްތިއުނާފު މަރުހަލާ ނިމެންދެން ވަޒީފާއިން ސަސްޕެންޑްކުރުމަށް 2026 ޖުލައި 7 ވަނަ ދުވަހު ޑިސިޕްލިނަރީ ބޯޑުން ވަނީ ނިންމާފަ އެވެ.
އެ ފައިސާގައި ފަރަގެއް އުޅޭކަން އެނގުނީ ކްރިމިނަލް ކޯޓުން އެ ފައިސާ ހަވާލުކުރަން އެންގުމުން ބެލި ބެލުމުންނެވެ.
