ޑްރަގް އޮޕަރޭޝަންގައި ކަނޑުމަތީގައި އުޅެނިކޮށް ނިޔާވި އާސިފްގެ ހަށިގަނޑު ފެނުނީ 28 މީޓަރު އަޑިން!
މަސްތުވާތަކެތީގެ އޮޕަރޭޝަނެއްގައި އުޅެނިކޮށް ކަނޑަށް ވެއްޓި ނިޔާވި ސަބް އިންސްޕެކްޓަރ އޮފް ޕޮލިސް އަޙްމަދު އާސިފްގެ ހަށިގަނޑު ފެނިފައި ވަނީ އަމިއްލަ ދެ ޑައިވަރެއްގެ އެހީތެރިކަމާއެކު 28.9 މީޓަރު އަޑިން. މި ހާދިސާއާ ގުޅިގެން އާސިފްގެ މަގާމު މަތިކޮށްފައިވާއިރު، އޭނާ ހޯދުމުގައި އެހީތެރިވި ޑައިވަރުންގެ މަސައްކަތް ސަރުކާރާއި ފުލުހުންގެ އިދާރާއިން ވަނީ ބަލައިގެންފައި.
ދިވެހި ފުލުހުންގެ ޚިދުމަތުގައި އިހުލާސްތެރިކަމާއެކު ޚިދުމަތްކުރެއްވި ސީނިއާ ސާޖަންޓް އަޙްމަދު އާސިފަށް ސަބް އިންސްޕެކްޓަރ އޮފް ޕޮލިސްގެ ރޭންކް އަރުވައިދެއްވައި | ޕޮލިސް
ފުލުހުން ހިންގި މަސްތުވާތަކެތީގެ ޚާއްޞަ އޮޕަރޭޝަނެއްގައި ލޯންޗުގައި ޑިއުޓީގައި ހުރި އޮފިސަރަކު ގެއްލިގެން ހޯދަނިކޮށް މޫދުއަޑީގައި މަރުވެފައި އޮއްވައި ފެނުނު ހިތާމަވެރި ހާދިސާއަށް ގިނަ ބައެއްގެ ސަމާލުކަން ވަނީ ލިބިފައެވެ.
މި ހިތާމަވެރި ހާދިސާ ހިނގާފައި ވަނީ 2026 ޖޫން 11 ވީ ބިރާސްފަތި ދުވަހުގެ ދަންވަރުގެ ވަގުތެއްގައެވެ. މި ޙާދިސާގައި ނިޔާވި ސީނިއާ ސާޖަންޓް އަޙްމަދު އާސިފަށް ސަބް އިންސްޕެކްޓަރ އޮފް ޕޮލިސްގެ ރޭންކް ދިވެހި ފުލުހުންގެ ޚިދުމަތުން ވަނީ އަރުވާފައެވެ.
މި އޮޕަރޭޝަންގައި ބައިވެރިވި ދެ ޑައިވަރުންނަށް ދިވެހި ފުލުހުންގެ ޚިދުމަތުންނާއި ދާޚިލީ ވުޒާރާއިން ވަނީ ޝުކުރު އަދާކޮށްފައެވެ. އެ ދެ ޑައިވަރުންނަކީ އެ އޮފިސަރު ހޯދުމަށާއި ހަށިގަނޑު ރިކަވަރ ކުރަން ކުރެވުނު މަސައްކަތުގައި އެންމެ މުހިންމު ދައުރެއް އަދާކުރި ދެ ފަރާތެވެ.
އޭގެ ތެރެއިން އެއް ޑައިވަރު ވަނީ އޭނާގެ ތަޖުރިބާ ރާއްޖެއެމްވީއާ ހިއްސާކޮށްފައެވެ. އެގޮތުން ޑައިވިންގ ދާއިރާގައި ވިއްސަކަށް އަހަރު ހަރަކާތްތެރިވެފައިވާ އަދި 20،000 އަށްވުރެ ގިނަ ޑައިވްކޮށްފައިވާ މި ތަޖުރިބާކާރު ޑައިވަރު މީގެ ކުރިންވެސް ވަނީ މަރުވެފައިވާ މީހެއްގެ ހަށިގަނޑު 45 މީޓަރު އަޑިން ނެގުމުގައި އެހީތެރިވެދީފައެވެ.
ކަން ހިނގައިދިޔަ ގޮތަށް ބަލާއިރު، ފުލުހަކު ގެއްލިގެން އުޅޭކަމުގެ މައުލޫމާތު ފުލުހުންގެ ފަރާތުން ލިބުމުން، އޭނާއާއި އޭނާއާއެކު ދެން ބައިވެރިވި ޑައިވަރު އެ އޮފިސަރު ހޯދުމަށްޓަކައި މަސައްކަތް ކުރުމަށް އަމިއްލަ އިސްނެގުމުގެ މަތިން ނިންމިއެވެ. އޭނާއަކީ ޑައިވިންގ ސެންޓަރެއް ހިންގާ ފަރާތެއްކަމަށް ވުމާއެކު، އޭނާއާ އޭނާގެ ޕާޓްނަރަށް މި ޒާތުގެ އޮޕަރޭޝަންތަކުގެ ހައްސާސްކަން ވަޒަން ކުރެވެއެވެ. އެހެންވެ އެކަމުގައި އެހީތެރިވެދޭނެކަމަށް އޭނާ ފުލުހުންގެ ގާތުގައި ބުނީއެވެ.
އޭނާ ކިޔާދިން ގޮތުގައި ފުލުހުން ވަނީ ވަގުތުން އެމީހުން ދިއުމަށް ލޯންޗެއް ހަމަޖައްސައި ޕެޓްރޯލްވެސް އަޅާފައެވެ. އެގޮތުން އުކުޅަހުގައި ފުލުސް ލޯންޗެއް ނޯންނާތީ އަމިއްލަ މީހެއްގެ ލޯންޗު ފުލުހުން ހަމަޖެއްސީ ކަމަށް އޭނާ ކިޔައިދިނެވެ. އެ ދެމީހުން ދިޔައީ ސްނޯކްލިންގ ގެ އިތުރުން ޑައިވިންގ އަށްވެސް ރެޑީވެގެން ކަމަށް އޭނާ ބުންޏެވެ.
އެ ޙާދިސާ ހިނގި ސަރަޙައްދަށް ދިޔައިރު އެވަގުތު އެތަނުގައި ތިބި ފުލުހުންވެސް ތިބީ ސްނޯކްލިންގ ކުރަން ކަމަށް އޭނާ ވިދާޅުވިއެވެ.
އަޑިން ހޯދަމުން ދަނިކޮށް އޮފިސަރުގެ ހަށިގަނޑު ފެނުނީ އޭނަގެ ޕާޓްނަރަށެވެ. އޭރު އެ އޮފިސަރު އޮތީ ބަނޑުވަތަށް ފަސްގަނޑު މަތީގައި ކަމަށް އޭނާ ކިޔައިދިނެވެ. އެއީ 28.9 މީޓަރު އަޑި ކަމަށާއި ދެން މަޑުމަޑުން އެމީހުން އޭނާ ގޮވައިގެން އެރީ މައްޗަށް ކަމަށް އޭނާ ކިޔައިދިނެވެ.
އޭނާ ވަނީ ފުލުހުންގެ އިސްވެރިންނާއި، ދާޚިލީ ވަޒީރުވެސް އެ މަސައްކަތް ބަލައިގެންފައިވާތީ އެކަމަށް ޝުކުރު އަދާކޮށްފައެވެ.
ރާއްޖެއެމްވީއަށް މައުލޫމާތު ލިބޭ ގޮތުގައި ގެއްލުނު އޮފިސަރު ލޯންޗު ފަހަތަށް ދިޔައީ ކުޑަކަމުދިއުމަށެވެ. ނަމަވެސް ޚަބަރެއް ނުވެގެން ބެލިއިރު އޭނާ ފެންނަން ނެތުމުން ހޯދުމުގެ މަސައްކަތް ފެށީއެވެ. އަދި ފުލުހުން އެކަމުގައި ޑައިވިންގ ސެންޓަރު ހިންގާ ފަރާތުގެ އެހީތެރިކަމަށްވެސް އެދުނީ އެރޭ ފަތިހުއެވެ.
މައުލޫމާތު ލިބޭ ގޮތުގައި ފުލުހުންގެ ލޯންޗު އެ ސަރަޙައްދުގައި ޙަރަކާތްތެރި ވަމުން ދިޔައީ މަސްތުވާތަކެތީގެ ޚާއްސަ އޮޕަރޭޝަނެއްގައެވެ.
މަރުހޫމް، ސަބް އިންސްޕެކްޓަރ އޮފް ޕޮލިސް އަޙްމަދު ޢާސިފް ރަސްމީ ވާޖިބު އަދާކުރައްވަމުން ގެންދަވަނިކޮށް ވަކިވެދިޔުމަކީ އާއިލާއަށާއި މުޅި ގައުމަށް ލިބުނު ހިތާމައެއްކަން ފާހަގަ ކުރައްވައި ރައީސުލްޖުމްހޫރިއްޔާ ވެސް ވަނީ ގައުމީ ވާޖިބު އަދާ ކުރެއްވުމުގައި ދެއްކެވި ސާބިތު ކަމާއި، އިހުލާސްތެރި މަސައްކަތުގެ އަގު ވަޒަން ކުރައްވާފައެވެ.
އަދި ހިތާމައިގެ މި ދަނޑިވަޅުގައި، ސަރުކާރުގެ ފަރާތުން އާއިލާއަށް ބޭނުންވާނެ އެންމެހައި އެހީތެރިކަމާއި އެއްބާރުލުން ފޯރުކޮށްދެއްވާނެ ކަމުގެ ފުރިހަމަ ޔަގީންކަން އެރުއްވިއެވެ.
