ސްޕެނިޝް ލަލީގާގައި ބާސެލޯނާއިން މިހާތަނަށް ކުޅުނު ހުރިހާ މެޗެއް ކާމިޔާބުކޮށް ބަލިނުވުމުގެ ރެކޯޑު ދަމަހައްޓައިފިއެވެ.

އަމިއްލަ ދަނޑުގައި ލަސް ޕަލްމާސްއާ ދެކޮޅަށް ކުޅުނު މެޗު ބާސާއިން ކާމިޔާބު ކޮށްފައި ވަނީ ތިން ލަނޑު ސުން ލަނޑުންނެވެ. ކެޓަލޯނިއާގައި ހިނގަމުންދާ ހަމަނުޖެހުންތަކާ ވިދިގެން މި މެޗު ކުޅެފައި ވަނީ ސަޕޯޓަރުން ދަނޑަށް ނުވައްދައެވެ.

ފުރަތަމަ ހާފުގައި މޮޅަށް ކުޅެ ގިނަ ވަގުތު ބޯޅަ ހިފަހައްޓައި ގިނަ ހަމަލާތައް އުފައްދާފައި ވަނީ ލަސް ޕަލްމާސްއިންނެވެ. ބާސާއަށް ފުރަތަމަ ހާފުގައި މާ އެދެވޭ ކުޅުމެއް ދެއްކިފައި ނުވާއިރު ލަސް ޕަލްމާސްއަށް ވެސް އެ ޓީމަށް ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.

ދެވަނަ ހާފަށް ބަދަލުތަކާ އެކު ނުކުތް ބާސާއިން ވަނީ އެ ޓީމުގެ ކުޅުން ރަނގަޅުކޮށް ލަނޑު ޖެހުމަށް ފުރުސަތު ތަނަވަސް ކޮށްފައެވެ. އެގޮތުން ދެވަނަ ހާފު ފެށިގެން ހަތަރު ވަނަ މިނިޓުގައި މެސީ ނަގައިދިން ކޯނަރަކުން ސާޖިއޯ ބުސްކެޓްސް ވަނީ ބާސާއަށް ލަސް ޕަލްމާސްގެ ގޯލު ހުޅުވައިދީފައެވެ.

މި ލަނޑަށް ފަހު ބާސާއިން މެޗުގެ ކޮންޓްރޯލް ނަގައި ގިނަ ވަގުތު ލަސް ޕަލްމާސްގެ ހާފުގައި ބޯޅަ ގެންގުޅުމުގެ ނަތީޖާއަކަށް ވެގެން ދިޔައީ 70 ވަނަ މިނިޓުގައި ޑެނިސް ސުއަރޭޒް ދިން ހިތްގައިމު ޕާހަކުން، ކީޕަރު ކަޓުވާލުމަށް ފަހު މެސީ ލަނޑެއް ޖެހުމެވެ. މެސީ ވަނީ އޭގެ ހަތް މިނިޓު ފަހުން ލަނޑެއް ޖަހާ ބާސާއަށް ތިން ޕޮއިންޓް ކަށަވަރު ކޮށްދީފައެވެ.

މި މޮޅާއެކު ބާސާއިން ވަނީ މި ސީޒަނުގައި އެ ޓީމުން ލަލީގާގައި ކުޅުނު ހުރިހާ މެޗެއް ވެސް ކާމިޔާބު ކޮށްފައެވެ. އަދި މެސީ މި މެޗުގައި ޖެހި ދެ ލަނޑާއެކު އޭނާ ވަނީ މި އަހަރު ތެރޭ މުޅި ޖުމްލަ 45 ލަނޑު ޖަހާފައެވެ.

 ބާސާއޮތީ ކުޅުނު ހުރިހާ މެޗެއް ކާމިޔާބުކޮށް 21 ޕޮއިންޓާ އެކު ލަލީގާގެ އެއްވަނައިގައެވެ.