ޔަމަނުގެ ހޫޘީން ސައުދީ އަރަބިއްޔާގެ ކިންގް ޚާލިދު އެއާބޭސްއަށް މިސައިލް ހަމަލާ ދީފި
25 ޖުލައި 2026 | ހޮނިހިރު 08:42ސައުދީގެ އަރަމްކޯ ތެޔޮ ގުދަންތަކަށާއި ކިންގް ޚާލިދު އެއާބޭސްއަށް ޔަމަނުގެ ފައުޖުތަކުން ބެލިސްޓިކް މިސައިލް ހަމަލާތަކެއް ދީފި. މި ހަމަލާތަކާ ގުޅިގެން ސައުދީގެ ބައެއް އެއާޕޯޓުތަކުގެ އޮޕަރޭޝަންތައް މެދުކަނޑާލާފައިވާއިރު، ހުކުރު ދުވަހުގެ ރޭގެ ވަގުތެއްގައި ސައުދީގެ ހަނގުރާމަމަތީ ބޯޓުތަކުން ވަނީ ޔަމަނުގެ އައްސޭރިފަށުގެ މުހިންމު ސަރަހައްދެއް ކަމަށްވާ ހުދައިދާގައި ހުރި މުވާސަލާތީ މަރުކަޒުތަކަށާއި ތެޔޮ ގުދަންތަކަށް ވައިގެ ހަމަލާތަކެއް ދީފަ
ސައުދީ އަރަބިއްޔާގެ ވެރިރަށް ރިޔާޟާ ގާތްގަނޑަކަށް 884 ކިލޯމީޓަރު ދުރުގައި އޮންނަ ޚަމީސް މުޝައިތު ސިޓީ ކައިރީގައި އޮންނަ ކިންގް ޚާލިދު އެއާބޭސްއަށް، އެ ގައުމުގެ އަސްކަރިއްޔާގެ އެފް-15 މަރުކާގެ ހަނގުރާމަމަތީ ބޯޓެއް ޖައްސަނީ. | އޭއެފްޕީ
ސައުދީ އަރަބިއްޔާއިން ޔަމަނަށް ދެމުންދާ އަސްކަރީ ހަމަލާތަކާއި، އެ ގައުމު ބަންދުކޮށްފައި އޮތް އޮތުމުގެ ބަދަލުހިފުމުގެ ގޮތުން، ޔަމަނުގެ ހޫޘީންގެ ހަތިޔާރު އެޅި ފައުޖުތަކުން ސައުދީގެ ދެކުނުގެ އަސީރު ސަރަހައްދުގައި އޮންނަ މައި ވައިގެ ބޭހަކަށް މިސައިލް ހަމަލާއެއް ދީފި އެވެ.
އެ ސަރަހައްދުގެ މީޑިއާތަކުން ރިޕޯޓްކޮށްފައިވާ ގޮތުގައި، ހޮނިހިރު ދުވަހުގެ ހެނދުނުގެ ވަގުތެއްގައި ޔަމަނުގައި އަމިއްލައަށް އުފައްދާފައިވާ ބެލިސްޓިކް މިސައިލްތަކަކުން ހަމަލާދީފައިވަނީ، ސައުދީގެ ވެރިރަށް ރިޔާޟާ ގާތްގަނޑަކަށް 884 ކިލޯމީޓަރު ދުރުގައި އޮންނަ ޚަމީސް މުޝައިތު ސިޓީ ކައިރީގައި ހުންނަ ކިންގް ޚާލިދު އެއާބޭސްގެ ކަނޑައެޅިފައިވާ އަމާޒުތަކަށެވެ.
ސައުދީގެ ޖީޒާން ތެޔޮ ރައްކައުކުރާ މަރުކަޒަށް ދިން ހަމަލާގެ ވީޑިއޯ އެއް
މި ހަމަލާއަކީ ރިޔާޟްގެ ސަރުކާރުން ޔަމަނާ ދެކޮޅަށް ހިންގަމުންދާ އަސްކަރީ އުދުވާނާއި، އެ ގައުމުގެ ރައްޔިތުންނާ ދެކޮޅަށް ކުރިއަށްގެންދާ އަނިޔާވެރި ހިސާރުކުރުމުގެ އަމަލުތަކަށް ރައްދު ދިނުމުގެ ގޮތުން ދިން ހަމަލާއެއް ކަމަށް ރިޕޯޓްތައް ބުނެ އެވެ.
މި ހަމަލާ ދީފައިވަނީ، ސައުދީ އަރަބިއްޔާގެ ހުޅަނގު ދެކުނު ބޯޑަރު ސަރަހައްދެއް ކަމަށްވާ ޖީޒާންގައި ހުންނަ ސައުދީ ސަރުކާރުގެ ތެލާއި ގޭސް ކުންފުނި، ސައުދީ އަރަމްކޯގެ ތެޔޮ ރައްކާކުރާ މަރުކަޒަކަށް ޔަމަނުގެ ފައުޖުތަކުން ބެލިސްޓިކް މިސައިލްތަކަކުން ހަމަލާދިންތާ ކުޑަވަގުތުކޮޅެއްގެ ތެރޭގަ އެވެ.
ސަރަހައްދީ މީޑިއާތަކުން ބުނާ ގޮތުގައި، ޖީޒާން ސަރަހައްދަށް ދިން މިސައިލް ހަމަލާތަކާ ގުޅިގެން އެ ސަރަހައްދުގެ ބައެއް ހިސާބުތަކުން ވަނީ ކަރަންޓުގެ ޚިދުމަތް މެދުކެނޑިފަ އެވެ.
މީގެ އިތުރުން، ސައުދީގެ ބަނދަރު ރަށެއް ކަމަށްވާ ޔަންބޫގައި ބާރުގަދަ ގޮވުންތަކެއް ގޮވާފައިވާ ކަމަށް ޔަމަނުގެ މީޑިއާތަކުން ވަނީ ރިޕޯޓްކޮށްފަ އެވެ.
ވައިގެ ދަތުރުފަތުރުތައް ވަގުތުން ބަލައިލެވޭ ފްލައިޓް ޓްރެކަރުތަކުން ދައްކާ ގޮތުގައި، ޔަމަނުގެ ފައުޖުތަކުން ސައުދީއަށް ދިން ހަމަލާތަކާ ގުޅިގެން ރިޔާޟަށާއި އެހެނިހެން ސިޓީތަކަށް ދަތުރުކުރި ފްލައިޓްތަކުގެ މިސްރާބު ވަނީ ބަދަލުކޮށްފަ އެވެ.
މި ހަމަލާތަކުގެ ސަބަބުން ޔަންބޫގައި ހުންނަ ޕްރިންސް އަބްދުލްމުހްސިން ބިން އަބްދުލްއަޒީޒް އިންޓަނޭޝަނަލް އެއާޕޯޓާއި، ޖީޒާން އިންޓަނޭޝަނަލް އެއާޕޯޓުގެ ނަމުން މަޝްހޫރުވެފައިވާ ކިންގް އަބްދުﷲ ބިން އަބްދުލްއަޒީޒް އިންޓަނޭޝަނަލް އެއާޕޯޓުގެ އޮޕަރޭޝަންތައް ވަނީ މެދުކަނޑާލާފަ އެވެ.
ހުކުރު ދުވަހުގެ ރޭގެ ވަގުތެއްގައި ސައުދީގެ ހަނގުރާމަމަތީ ބޯޓުތަކުން ވަނީ ޔަމަނުގެ އައްސޭރިފަށުގެ މުހިންމު ސަރަހައްދެއް ކަމަށްވާ ހުދައިދާގައި ހުރި މުވާސަލާތީ މަރުކަޒުތަކަށާއި ތެޔޮ ގުދަންތަކަށް ވައިގެ ހަމަލާތަކެއް ދީފަ އެވެ. ނަމަވެސް މި ހަމަލާތަކުގައި ލިބުނު ގެއްލުމުގެ ތަފްސީލެއް އަދި ލިބިފައެއް ނުވެ އެވެ.
މިދިޔަ ހޯމަ ދުވަހު ޔަމަނުން ވަނީ ސައުދީ އަރަބިއްޔާއާ ދެކޮޅަށް "ކަނޑުގެ މަގުން ހިސާރުކުރުމެއް" ވަގުތުން ފަށާފައިވާކަން އިއުލާންކޮށްފަ އެވެ.
އަސްކަރީ ތަރުޖަމާނު ބްރިގޭޑިއާ ޖެނެރަލް ޔަހްޔާ ސަރީއު ޓީވީ މެދުވެރިކޮށް ދެއްވި ބަޔާނެއްގައި ވިދާޅުވީ، ސައުދީއާ ގުޅުންހުރި ކަނޑުގެ އުޅަނދުފަހަރު ދަތުރުފަތުރުކުރުން މަނާކުރުމުގެ ނިންމުމަށް، އެ ބަޔާން ނެރުނު ވަގުތުން ފެށިގެން އަމަލުކުރަން ފަށާފައިވާ ކަމަށެވެ.
ސައުދީން ޔަމަނަށް ދޭ ހަމަލާތައް އިތުރުކޮށްފިނަމަ، އޭގެ ރައްދުގައި ވަރުގަދަ އަދި ފުރިހަމަ ހަމަލާތަކެއް ދޭނެ ކަމުގެ އިންޒާރުވެސް ސަރީއު ވަނީ ދެއްވާފަ އެވެ.
