ބާބުލް މަންދަބު ބަންދުކޮށް ތެލުގެ އަގު 200 ޑޮލަރަށް މައްޗަށް ޖައްސާނެ ކަމުގެ އިންޒާރު ޔަމަނުން ދީފި
ސައުދީން ޔަމަނަށް ދޭ ހަމަލާތައް ހުއްޓާނުލާނަމަ ބާބުލް މަންދަބާއި ހުރްމުޒް ކަނޑުއޮޅި ބަންދުކޮށް، ދުނިޔޭގެ ބާޒާރުގައި ތެޔޮ ފީފާއެއްގެ އަގު 200 ޑޮލަރަށް އުފުލާލާނެ ކަމުގެ އިންޒާރު ހޫޘީން ދީފިއެވެ. ސަންޢާ އެއާޕޯޓަށާއި އާންމު ވަސީލަތްތަކަށް ދޭ ހަމަލާތަކަށް ވަރުގަދަ ރައްދެއް ދޭނެ ކަމަށާއި، މިކަމުގެ ފުރިހަމަ ޒިންމާ އެމެރިކާއާއި ސައުދީން އުފުލަންޖެހޭނެ ކަމަށް އެ ޖަމާއަތުން ބުނެއެވެ.
ބައިނަލްއަގުވާމީ މުޖުތަމައުން ގަބޫލުކުރާ ޔަމަނުގެ ސަރުކާރަށް ވަފާތެރި ކޯސްޓްގާޑު ސިފައިން، ސްޓްރެޓީޖިކް ގޮތުން މުހިންމު ބާބުލް މަންދަބު ކަނޑުއޮޅި ކައިރީގައިވާ، ސަރުކާރުގެ ކޮންޓްރޯލްގެ ދަށުގައި އޮންނަ ހުޅަނގު ތާއިޒް ޕްރޮވިންސްގެ މޯކާ ސިޓީގެ އައްސޭރިފަށުން ރަތްކަނޑުގައި ޕެޓްރޯލް ބޯޓެއްގައި ހަރަކާތްތެރިވަނީ؛ މި ފޮޓޯ ނަގާފައިވަނީ 15 އެޕްރީލް 2024 ގައި. | ގެޓީ އިމޭޖަސް
ސައުދީ އަރަބިއްޔާއިން ޔަމަނުގެ މުހިންމު އުމްރާނީ ވަސީލަތްތަކަށް ދެމުންދާ ހަމަލާތައް ހުއްޓާނުލައި ކުރިއަށްގެންދާނަމަ، ބާބުލް މަންދަބު ކަނޑުއޮޅި ބަންދުކޮށް، ތެޔޮ ފީފާއެއްގެ އަގު 200 ޑޮލަރަށް އުފުލާލުމަށް ޔަމަނުގެ ހަތިޔާރު އެޅި ފައުޖުތައް ތައްޔާރަށް އޮތް ކަމަށް އެ ގައުމުގެ އިސް އޮފިޝަލަކު އިންޒާރު ދެއްވައިފި އެވެ.
ޔަމަނުގެ އަންސާރުﷲ ހަރަކާތުގެ ސިޔާސީ ބިއުރޯގެ މެންބަރެއް ކަމަށްވާ މުހައްމަދު އަލް ފަރަހް ހޯމަ ދުވަހު ވިދާޅުވީ، ވޮޝިންޓަނުން ސައުދީ ސަރުކާރަށް ބާރުއަޅަމުންދަނީ ޔަމަނަށް ހަމަލާދިނުމަށް ކަމަށާއި، ނަމަވެސް އެފަދަ ހިތްވަރު ދިނުމަކީ އެމެރިކާގެ މަސްލަހަތު އޮތް ކަމެއް ނޫން ކަމަށެވެ.
އަލް ފަރަހް އިތުރަށް ވިދާޅުވީ، މިހާރު އޮތް މަސްރަހު އިތުރަށް ގޯސްވެއްޖެ ނަމަ، އޮޕަރޭޝަނަލް އިއްތިހާދެއްގެ ދަށުން ބާބުލް މަންދަބު ކަނޑުއޮޅިއާއި ހުރްމުޒް ކަނޑުއޮޅި ބަންދުކުރާނެ ކަމަށެވެ. އަދި އޭގެ ސަބަބުން ދުނިޔޭގެ ބާޒާރުގައި ތެޔޮ ފީފާއެއްގެ އަގު 200 ޑޮލަރަށް އުފުލި، ބޮޑު ސިހުމެއް ލިބިގެންދާނެ ކަމަށް އޭނާ ވިދާޅުވި އެވެ.
ސައުދީ އަރަބިއްޔާއިން ނުވަތަ އެ ގައުމުން ވާގިވެރިވާ ފައުޖުތަކުން ދޭ ކޮންމެ ހަމަލާއަކަށް ސަންޢާ ސަރުކާރުން ދޭ ރައްދު ވަރުގަދަވާނެ ކަމަށާއި، އެ ހަމަލާތައް އަމާޒުކުރާނީ ސައުދީގެ އެތެރޭގެ މުހިންމު ސަރަހައްދުތަކަށް ކަމަށް ފަރަހް ފާހަގަކުރެއްވި އެވެ.
ބާބުލް މަންދަބު ކަނޑުއޮޅިއަކީ ރަތްކަނޑާއި އަދަން ކަނޑުއޮޅި ގުޅުވައިދޭ، އަދި ސުއޭޒް ކެނަލްއާ ދިމާލަށް ދަތުރުކުރާ އުޅަނދުފަހަރަށް އޮތް އެންމެ މުހިންމު މަގެވެ. އެންމެ ހަނި ސަރަހައްދުގައި އެންމެ 29 ކިލޯމީޓަރު ހުންނަ މި ކަނޑުއޮޅީގައި އުޅަނދުފަހަރަށް ދަތުރުކުރެވެނީ ވަދެ ނުކުތުމަށް އޮންނަ އެންމެ ދެ ލޭނުންނެވެ.
މީގެއިތުރުން، ޔަމަނުގެ ސުޕްރީމް ޕޮލިޓިކަލް ކައުންސިލްގެ މެންބަރަކު ވަނީ، މަސްރަހު ފިނިވެފައި އޮތް ދުވަސްތަކަކަށްފަހު، ޔަމަނުގެ ރައްޔިތުންނާ ދެކޮޅަށް އަލުން ފެށި ހަމަލާތަކާއި، ގައުމު ބަންދުކުރުމާއި، އަދި ސަންޢާ އެއާޕޯޓް ހިމެނޭހެން އާންމުންގެ ވަސީލަތްތަކަށް ބޮން އެޅުމުގެ ފުރިހަމަ ޒިންމާ އެމެރިކާއާއި ސައުދީ އަރަބިއްޔާއިން އުފުލަންޖެހޭނެ ކަމަށް ވިދާޅުވެފަ އެވެ.
މުހައްމަދު އަލީ އަލް ހޫޘީ ވިދާޅުވީ ސަންޢާ އެއާޕޯޓަށް ސައުދީން ދިން ހަމަލާއަކީ އިންސާނީ ހައްގުތަކާ ބެހޭ ގާނޫނުތަކާ ކަނޑައެޅިގެން ޚިލާފު އަމަލެއް ކަމަށެވެ. އަދި މިއީ ޔަމަނުގެ ރައްޔިތުން ބަންދުކޮށް، ބަނޑަށް ޖެއްސުމުގެ ސިޔާސަތުގެ ދަށުން ކޮންމެ ދުވަހަކު ހިންގަމުންދާ ހަނގުރާމައިގެ ޖަރީމާތަކުގެ ބައެއް ކަމަށް އޭނާ ފާހަގަކުރެއްވި އެވެ.
މިކަމާ ގުޅިގެން ވަކިން ވާހަކަދައްކަވަމުން އަންސާރުﷲގެ ސިޔާސީ ބިއުރޯގެ މެންބަރު އަލީ އަލް ގަހޫމް ވިދާޅުވީ، ސައުދީގެ އުދުވާނަށް ޔަމަނުގެ ހަތިޔާރު އެޅި ފައުޖުތަކުން ވަރަށް އަވަހަށް ރައްދު ދޭނެ ކަމަށެވެ. އަދި ޔަމަނަށް އަޅާފައިވާ 11 އަހަރުވީ ބްލޮކޭޑް އުވާލުމަށް ކުރާ މަސައްކަތް ހުއްޓާނުލާނެ ކަމަށާއި، މީގެ ސަބަބުން ނުކުމެދާނެ ކޮންމެ ނަތީޖާއެއްގެ ފުރިހަމަ ޒިންމާ ދުޝްމަނުން އުފުލަންޖެހޭނެ ކަމަށް އޭނާ ވިދާޅުވި އެވެ.
"ސަންޢާ އެއާޕޯޓަށާއި އާންމުންގެ ވަސީލަތްތަކަށް ސައުދީ ސަރުކާރުން ދޭ ހަމަލާތަކުގެ ނަތީޖާ ވަރަށް ހިތްދަތިވާނެ. މީގެ ސަބަބުން ކުރިމަތިވެދާނެ ހުރިހާ ކަމަކަށް ރިޔާދު ސަރުކާރުން ތައްޔާރުވާންޖެހޭނެ،" ގަހޫމް ވިދާޅުވި އެވެ.
މަސްދަރު: ޕްރެސް ޓީވީ
