މެކްސިކޯ އަށް އައި ބިންހެލުމާ ގުޅިގެން މަރުވި މީހުންގެ އަދަދު 361 އަށް އަރައިފި
2 އޮކްޓޯބަރު 2017 | ހޯމަ 06:05ސެޕްޓެމްބަރު 19 ގައި އައި ބިންހެލުމާ ގުޅިގެން ހަމައެކަނި މެކްސިކޯ ސިޓީ އިން 220 މީހުން މަރުވި
މެކްސިކޯއަށް އައި ބިންހެލުމާ ގުޅިގެން ބޮޑެތި ގެއްލުންތަކެއް އެގައުމަށް ވަނީ ލިބިފައި
މެކްސިކޯ އަށް މިދިޔަ ސެޕްޓެމްބަރު 19 ގައި އައި ބިންހުލުމާ ގުޅިގެން މަރުވި މީހުންގެ އަދަދު 361 އަށް އަރައިފި ކަމަށް އޮފިޝަލުން އާދީއްތަ ދުވަހު ބުނެފިއެވެ.
7.1 މެގްނިޓިއުޑްގައި އައި މި ބިންހެލުމުގައި ވެރިރަށް މެކްސިކޯ ސިޓީ އިން 220 މީހުން މަރުވިއެވެ. ދެން މީހުން މަރުވީ މޮރެލޮސް، ޕުއެބްލާ އަދި އިތުރު ތިން ސްޓޭޓަކުންނެވެ.
މެކްސިކޯ ސިޓީގެ މޭޔަރު މިގުއެލް އެންޖެލް މެންސެރާ ވިދާޅުވީ ބިންހެލުމާ ގުޅިގެން ވެރިރަށް މެކްސިކޯ ސިޓީ އިން ވެއްޓުނު އިމާރާތެއްގެ ދަށުވެފައިވާ އަށް މީހަކު އަދިވެސް ވަނީ ހޯދާ ނުފެނިފައެެވެ. ވެރިރަށް މެކްސިކޯ ސިޓީން 38 އިމާރާތެއް ވެއްޓިފައި ވެއެވެ.
ބިންހެލުމާ ގުޅިގެން ޒަޚަމްވި މީހުންގެ ތެރެއިން ހޮސްޕިޓަލުގައި އެނދުމަތިކޮށްފައިވާ މީހުންގެ އަދަދު އުޅެނީ 25 ގައެވެ.
މެކްސިކޯ އަށް ސެޕްޓެމްބަރު 19 ގައި އައި ބިންހެލުމުގެ އިތުރަށް އެމަހު ކުރީކޮޅު ވެސް ބިންހެލުމެއް އައެެވެ. އެގޮތުން 8.1 މެގްނިޓިއުޑްގައި އައި ބިންހެލުމުގައި 90 މީހުން މަރުވިއެވެ.
