ހިތަދޫ އުތުރު ދާއިރާގެ ބައި-އިލެކްޝަން: ޕީއެންސީ އިން ބަލި ގަބޫލުނުކޮށް އަދިވެސް ރައްޔިތުންނަށް ހަގީގަތް އޮޅުވާލުމުގަ އަވަދިނެތި

"ހީލަތްތެރިކަމާއެކު ޕާޓީގެ ރިޔާސީ ޓިކެޓް ވަގަށް ނެގި މީހެެއްގެ ނިމުން އަންނާނީ އަދި ލައްކަ ކަންކަން ދައްކަވާފަ". މިއީ ހޮނިހިރު ދުވަހު ބޭއްވި ހިތަދޫ އުތުރު ދާއިރާގެ ބައި އިލެކްޝަންގެ ނަތީޖާ އަށް ފަހު، ޕީއެންސީ ގެ އިސްފާރަތެއްގެ ކޮމެންޓެކެވެ. 

ރައީސް މުއިއްޒުގެ ސަރުކާރު ވެރިކަމަށް އައީ 2023 ވަނަ އަހަރުގެ ރިޔާސީ އިންތިހާބުގެ ދެވަނަ ބުރުން 129000 ވޯޓު ލިބިގެންނެވެ. މިއީ އެމްޑީޕީގެ ސަރުކާރު ބަދަލު ކުރުމުގެ ޖަޒުބާތުގައި ޖެހިގެން ހުރިހާ ޕާޓީތަކުން ޕީއެންސީއާ ކޯލިޝަން ހެދުމުން ލިބުނު ވޯޓުކަން ގަބޫލު ނުކުރާ ރައްޔިތެއް މި ރާއްޖެއަކު ނޫޅޭނެ އެވެ. ނަމަވެސް އެ ދުވަހުން ފެށިގެން ރައީސް މުއިއްޒުގެ "ބްލެސިންގްސް" އަށް ކެތް މަދުވެފަ ތިބި ޕީއެންސީގެ ލީޑަރޝިޕްގެ އިސް ބޭފުޅުން ގެންދެވީ ރައީސް މުއިއްޒުގެ "ސައިޒަށް ވުރެ މާ ބޮޑު" ފޮޓޯފުޅެއް ދައްކަވަމުންނެވެ. އަނެއް ކޮޅުން މިކަންވީ ރައީސް މުއިއްޒު ވެސް ނުލާހިކު ގަޔާވެލެއްވި ކަމެއްގެ ގޮތުގަ އެވެ.

ހަގީގަތް ކޮންމެ ގޮތަކަށް އޮތަސް ރައީސް މުއިއްޒަށް ހުށާމަދު ކުރާ ޕީއެންސީ ގެ އިސް ބޭފުޅުންގެ މުހުތާދު ތައް ދިޔައީ ފުރިހަމަ ވަމުންނެވެ. އެބޭފުޅުންގެ އަމިއްލަ ވިޔަފާރިތައް ކުރިއަރަމުން ދިޔައީ ފަޓާސްބަރިއެއް ހެނެވެ. އެހެން ނަމަވެސް ރައީސް މުއިއްޒުގެ ވެރިކަމުގެ ދައުރުން ފާއިތުވަމުންދާ ކޮންމެ ދުވަހަކާ އެކީ ފެންނަ ހަގީތަކީ ސަރުކާރަށް ރައްޔިތުންގެ ތާއީދު ގެއްލިގެންދާ މަންޒަރެވެ.

 ރައީސް މުއިއްޒުގެ އެންމެ އަރިސް ވަޒީރަށް " ޗޯޓާ ސަރުކާރެއް" އުފައްދައިދޭން ނެގި ފެންނަ ނުފެންނަ ވޯޓުން ފޭދޫ ރައްޔިތުން ރައީސް މުއިއްޒު އާއި މިނިސްޓަރު އިހުސާނަށް ބުނީ ބޮޑުތަކުން ނޫނެކޭ އެވެ. އޭގެ ފަހުން ދައުރު މެދުތެރެއިން ރައްޔިތުންނަށް މަޖުބޫރުކޮށްގެން ރައީސް މުއިއްޒު ނެންގެވި ފެންނަ ނުފެންނަ ވޯޓުން ސަރުކާރުން ކުރިމަތިލާން ޖެހުނީ ލަދުވެތި ބައްޔަކާ އެވެ. ރައްޔިތުންގެ ތެރެއިން 148،000 އަށް ވުރެ ގިނަ މީހުން ވަނީ އެ ވޯޓުން ރައީސް މުއިއްޒު އަށް ނޫނެކޭ ބުނެފަ އެވެ. އަދި މި ވޯޓުން ރައީސް މުއިއްޒަށް ވޯޓު ލިބުނު އަދަދު ޕީއެންސީ ގެ މެމްބަރުންގެ އަދަދަށް ވުރެ ދަށް ވުމަކީ، އަމިއްލަ ޕާޓީ ތެރޭގަ ވެސް ރައީސް މުއިއްޒު އަށް އިހުލާސްތެރި ބައެއް ނެތުން ކަމުގައި ރައްޔިތުން ދިޔައީ ބުނަމުންނެވެ.

ވެރިކަމުގެ ދައުރު ދެބައިވެގެން ދިޔައިރު ސިޔާސީ ގޮތުން ރައީސް މުއިއްޒުގެ ކަށުކަމާކެމީގެ ކަންކަން ކުރިޔަށް ގެންދާ ހިސާބަށް ކަންތައް ގޮސްފައިވާއިރު، އަދިވެސް މި ވެރިކަމުގެ ފޮނިމީރުކަން އޭގެ އެންމެ ފުންމިނަށް ހޯދާ ޕީއެންސީގެ އިސްފަރާތްތަކުން ދަނީ، ރައީސް މުއިއްޒު އަށާއި ދިވެހި ރައްޔިތުންނަށް ހަގީގަތް އޮޅުވާލުމަށް "ކައްޒާބު ދޮގު" ހަދަމުންނެވެ. ރައީސް މުއިއްޒު ވިދާޅުވާހެން އެބޭފުޅުން ދޮގު ހައްދަވަމުން ގެންދަވަނީ ނިއްކުރިމަށްޗަށް ރުލެއްވެސް އަރުވާނުލަ އެވެ.

2024 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބުގައި ހިތަދޫ އުތުރު ދާއިރާގެ ގޮނޑި ޕީއެންސީގެ ފަރާތުން ވާދަކުރި ކެންޑިޑޭޓް މުހައްމަދު ސިނާން ކާމިޔާބުކުރީ އެންމެ ކައިރިން ވާދަކުރި ކެނޑިޑޭޓަށް ވުރެ 200 އަށް ވުރެ ގިނަ ވޯޓު ހޯދައިގެންނެވެ. އޭގެ ފަހުން ސިނާނުގެ ގޮނޑި ގެއްލިފަވާކަމަށް ސްޕްރީމް ކޯޓުން ހުކުމް ކުރުމުން ބޭއްވި ބައި އިލެކްޝަނުން ޕީއެންސީގެ ކެނޑިޑޭޓް ވަނީ ބަލިވެފަ އެވެ. 

ރައީސް މުއިއްޒުގެ މުޅި ސަރުކާރު، ވަޒީރުންނާއި އިސްވެރިން އެއްކޮށް މަހެއް ވަންދެން ހިތަދޫގައި ބަނޑަހަޖަހައިގެން ތިއްބަވައިގެން ކުރި މަސައްކަތުގެ ނަތީޖާއަކީ ހިތަދޫ އުތުރު ދާއިރާގެ ގޮނޑި ސަރުކާރަށް ގެއްލުމެވެ. ކަޅު ފައިސާގެ ބޯޑެތި ދަބަސްތައް ހުސްކޮށް، ވަޒީފާތައް އޮއްސާލުމުން ވެސް ރައްޔިތުން ވޯޓު ދިނީ ރައީސް މުއިއްޒުއާ ދެކޮޅަށެވެ.

ސަރުކާރަށް ރައްޔިތުންގެ މަޖިލީގެ ގޮނޑިއެއް ގެއްލި، އެމްޑީޕީގެ ފަރާތުން ވާދަކުރި ސޯބެ މަޖިލީހުގެ މެމްބަރުކަމުގެ ހުވާކުރަން ތައްޔާރު ވާއިރު،  އައްޑޫ ސީޓީ ހިތަދޫ އުތުރު ދާއިރާގެ ބައި އިލެކްޝަން އިން ޕީއެންސީ އަށް ލިބުނު ނާކާމިޔާބީ އަކީ ބޮޑު ކާމިޔާބީ އެއް ކަމަށް ދެއްކުމަށް ސަރުކާރުގެ އިސް ފަރާތްތަކާއި ސަރުކާރުން ފަންޑު ކުރާ މިޑިއާ ތަކުން އަދިވެސް ދަނީ ދެފައި އެއްތާކު ނުޖެހި މަސައްކަތް ކުރަމުންނެވެ. 

އެންމެ ފުރަތަމަ ފެނުނީ ޕީއެންސީ ޕާލަމެންޓްރީ ގްރޫޕްގެ ލީޑަރު، އިބްރާހިމް ފަލާހުގެ ޕޯސްޓެކެވެ. ފަލާހު ބުނާގޮތުން މި އިންތިހާބުން މޮޅުވީ ޕީއެންސީ ކަމަށެވެ. އިންތިހާބު ކާމިޔާބިކުރި ސޯބެ އަށް ލިބުނީ ލަދުވެތި ނާކާމިޔާބީ އެއް ކަމަށެވެ. ފަލާހުގެ މި ޕޯސްޓާއެކު ޕީއެންސީ އަށް ނިސްބަތްވާ ބައެއް ފަރާތަކުން ވެސް ތިބީ އަޖައިބުވެ އަންތަރީސް ވެފަ އެވެ. ފަލާހު ބުނި ގޮތުން ހިތަދޫ އުތުރު ދާއިރާ އަކީ އެމްޑީޕީ ގެ ކިއްލާ އެކެވެ. ނަމަވެސް އެ ދާއިރާގެ ގޮނޑި އެމްޑީޕީ އިން ކާމިޔާބު ކުރުމުން އެކަން ބަދަލުވި ވާހަކަ އެވެ. ނަމަވެސް ހަގީގަތަކީ މީގެ އިދިކޮޅެވެ. 2024 ވަނަ އަހަރުގެ މަޖްލިސް އިންތިހާބުގައި ސަރުކާރުން ކާމިޔާބު ކުރި ގޮނޑިއެއް، އޭގެ ދެ އަހަރެއްހާ ދުވަސް ފަހުން ބޭއްވި ބައި- އިލެކްޝަން ކާމިޔާބުކޮށް އެމްޑީޕީ އިން ހޯދީ އެވެ. 

ފެނިގެން މިދިޔައީ ރައީސް މުއިއްޒު އަށް ވަރަށް ހިތްދަތި މަންޒަރެކެވެ. ދައުލަތުގެ ނުފޫޒާއި ވަސީލަތްތައް ބޭނުންކޮށްގެން، ރައްޔިތުންގެ ފައިސާ އިން ރިޝްވަތު ބެހި ނަމަވެސް ހިތަދޫ އުތުރު ދާއިރާގެ ގޮނޑި ޕީއެންސީ އަށް  ނުލިބުނު ތަނުގައި މި ރާއްޖޭގައި  އެމަނިކުފާނަށް ރައްޔިތުންގެ ތާއީދެއް ނެތްކަން އަނެއްކާވެސް އިތުރަށް މިވަނީ ހާމަވެފަ އެވެ.

އިދިކޮޅު ފަރާތްތަކުން ބުނާ ގޮތުން އައްޑޫ ރައްޔިތުންގެ ސާބިތުކަމާއި ހިތްވަރަކީ މުޅި ރާއްޖެ އަށް ދެއްކި މަތިވެރި ނަމޫނާ އެކެވެ. ރިޝްވަތުގެ ހުތުރު ފައިސާގެ ދަޅަޔަށް ނުހެއްލޭނެ ކަމާއި، ވަޒީފާގެ ބިރުދެއްކުމަކުން ކުޑަކަކޫ ނުޖަހާނެކަން އައްޑޫ ރައްޔިތުން ވަނީ ސާބިތުކޮށްދީފަ އެވެ. މީ ރައީސް މުއިއްޒުގެ ސަރުކާރުގެ ނުފޫޒާ ދެކޮޅަށް ރައްޔިތުންގެ ހިތްތަކުގައި އުފެދިފައިވާ ނަފުރަތާއި، ރުޅިވެރިކަން ދައްކުވައިދޭ ވަރުގަދަ ހެއްކެކެވެ. އަދި މުޅި ޕީއެންސީ ގެ ލީޑަރޝިޕް ފެއިލް ވެފަވާކަމުގެ އަލިގަދަ ހެއްކެކެވެ.

ހަގީގަތް އޮޅުވާލަން ޕީއެންސީގެ ލީޑަރޝިޕުން ކިތަންމެ ހިއްވަރެއް ކުރިޔަސް ހިތަދޫ އުތުރު ދާއިރާގެ ބައި އިލެކްޝަން ކާމިޔާބު ކުރީ އެމްޑީޕީގެ ކެންޑިޑޭޓް އަބްދުﷲ ސޯދިގު (ސޯބެ) އެވެ.  އަދި ގަޔާ ވިޔަސް ނުވިޔަސް، ރުޅި އަޔަސް، ދެރަވިޔަސް، ހަސަދަވެރިވިޔަސް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑީގައި އިންނަވާނީ އެމްޑީޕީގެ ކެނޑިޑޭޓް އަބްދުﷲ ސޯދިގު (ސޯބެ) އެވެ.