ޤަތަރުގެ ކުރީގެ އަމީރު ޙަމަދުގެ ޖަނާޒާ ބާއްވައިފި، ސަންދޯއްޕުޅު އުފުއްލެވީ ދަރިކަލުން އަދި މިހާރުގެ އަމީރު ޝައިޚް ތަމީމް
13 ޖުލައި 2026 | ހޯމަ 05:07ދައުލަތުގެ މީޑިއާ އިން ވަގުތުން ދެއްކި ޖަނާޒާގެ ތެރެއިން، މިހާރުގެ އަމީރު ޝައިޚް ތަމީމް ވަނީ އެމަނިކުފާނުގެ ބައްޕާފުޅުގެ ސަންދޯއްޕުޅު އުފުލެއްވުމުގައި އަމަލީ ގޮތުން ވެސް ބައިވެރިވެ ވަޑައިގެންފައި. ކަށު ނަމާދަށް ފަހު، ޝައިޚް ޙަމަދު ފަސްދާނު ލައްވާފައި ވަނީ ދޯހާގައި ހުންނަ ލުސައިލް ގަބުރުސްތާނުގައި.
ޤަތަރުގެ ކުރީގެ އަމީރު ޝައިޚް ޙަމަދުގެ ޖަނާޒާގެ ތެރެއިން، މިހާރުގެ އަމީރު ޝައިޚް ތަމީމް ބައްޕާފުޅުގެ ހަށިކޮޅު އުފުއްލެވުމުގައި ބައިވެރިވެ ވަޑައިގަންނަވަނީ. | ރޮއިޓާސް
ޤަތަރުގެ ކުރީގެ އަމީރު ޝައިޚް ޙަމަދު ބިން ޚަލީފާ އަލް ޘާނީ އަވަހާރަވުމާ ގުޅިގެން، އެމަނިކުފާނުގެ ޖަނާޒާގެ ކަންކަން ފުރިހަމަ ކުރުމަށް ފަހު، ރަސްމީ ޢިއްޒަތުގައި ފަސްދާނު ލައްވައިފި އެވެ.
އުމުރުފުޅުން 74 އަހަރުގައި ޝައިޚް ޙަމަދު އަވަހާރަވެފައި ވަނީ އާދީއްތަ ދުވަހުގެ ވަގުތެއްގައި އެވެ. އެމަނިކުފާނު އަވަހާރަވުމާ ގުޅިގެން ދުނިޔޭގެ އެކި ޤައުމު ތަކުގެ ލީޑަރުން ވަނީ ތައުޒިޔާ ދަންނަވައިފަ އެވެ.
ޝައިޚް ޙަމަދުގެ ކަށުނަމާދު ބާއްވާފައި ވަނީ ޤަތަރުގެ ވެރި ރަށް ދޯހާއި ހުންނަ އެ ޤައުމުގެ އެންމެ ބޮޑު މިސްކިތް ކަމަށްވާ، އިމާމް މުޙައްމދު އިބްނު ޢަބްދުލް ވައްޙާބް މިސްކިތުގައި އެވެ. މި ކަށު ނަމާދުގައި ޤަތަރުގެ އިސްވެރިންނާއި، އާންމު ރައްޔިތުންގެ ތެރެއިން އެތައް ހާސް ބަޔަކު ވަނީ ބައިވެރިވެފައި އެވެ.
ޝައިޚް ޙަމަދުގެ ކަށު ނަމާދުގައި އެމަނިކުފާނުގެ ދަރިކަލުން އަދި ޤަތަރުގެ މިހާރު އަމީރު ޝައިޚް ތަމީމް ބިން ޙަމަދު އަލް ޘާނީ ވެސް ވަނީ ބައިވެރިވެ ވަޑައިގެން، ޖަނާޒާގެ ކަންކަމުގައި އިސްކޮށް އުޅުއްވައިފަ އެވެ.
ދައުލަތުގެ މީޑިއާ އިން ވަގުތުން ދެއްކި ޖަނާޒާގެ ތެރެއިން، މިހާރުގެ އަމީރު ޝައިޚް ތަމީމް ވަނީ އެމަނިކުފާނުގެ ބައްޕާފުޅުގެ ސަންދޯއްޕުޅު އުފުލެއްވުމުގައި އަމަލީ ގޮތުން ވެސް ބައިވެރިވެ ވަޑައިގެންފައި އެވެ. ކަށު ނަމާދަށް ފަހު، ޝައިޚް ޙަމަދު ފަސްދާނު ލައްވާފައި ވަނީ ދޯހާގައި ހުންނަ ލުސައިލް ގަބުރުސްތާނުގައި އެވެ. މިއީ ޤަތަރުގެ ތަރައްޤީ އަށް ބޮޑެތި ބަދަލު ތަކެއް ގެނެސްދެއްވި ވެރިއެއްގެ ވަކިގެ ދިޔުން ރަމްޒުކޮށްދޭ ހިތާމަވެރި ވަގުތު ކޮޅެކެވެ.
ޤަތަރުގެ ކުރީގެ އަމީރު ޝައިޚް ޙަމަދު ބިން ޚަލީފާ އަލް ޘާނީ ސަންދޯއްޕުޅު، އެމަނިކުފާނުގެ ދަރިކަލުން އަދި ޤަތަރުގެ މިހާރު އަމީރު ޝައިޚް ތަމީމް ބިން ޙަމަދު އަލް ޘާނީ އުފުއްލަވަނީ.
ޤަތަރުގެ ކުރީގެ އަމީރު ޝައިޚް ޙަމަދު އަވަހާރަވުމުގެ ހިތާމައިގައި ޤަތަރުގެ ސަރުކާރުން ވަނީ، ހަތަރު ދުވަހުގެ މުއްދަތަކަށް ޤައުމީ ހިތާމަ ފާޅު ކުރުން އިއުލާން ކޮށްފައި އެވެ. އެ މުއްދަތުގެ ތެރޭގައި ޤަތަރުގެ ޤައުމީ ދިދަ ބައި ދަނޑި އަށް ތިރި ކުރުމަށް ވެސް ވަނީ ނިންމައިފަ އެެވެ.
އަމީރީ ދީވާނުން ހާމަ ކޮށްފައިވާ ގޮތުގައި، ތައުޒިޔާ ކިޔުމަށް ވަޑައިގަންނަވާ ބޭފުޅުންނާ ބައްދަލު ކުރެއްވުމަށް އަމީރު ޝައިޚް ތަމީމް ހުންނަވާނީ ލުސައިލް ޕެލަސްގައި އެވެ. ހޯމަ ދުވަހުން ފެށިގެން ބުދަ ދުވަހުގެ ނިޔަލަށް ކުރިއަށްދާ މި ބައްދަލުވުން ތަކުގައި ބޭރު ގައުމު ތަކުގެ އިސްވެރިންނާއި، ޝާހީ އާއިލާގެ މެންބަރުން އަދި ދައުލަތުގެ އިއްޒަތްތެރިން ބައިވެރިވެ ވަޑައިގަންނަވާނެ އެވެ.
މަސްދަރު: އަލް ޖަޒީރާ
