ކައުންސިލްތަކާ ހަވާލުނުކޮށް ސަރުކާރުން ކުރިއަށް ގެންދާ ކުދި މަޝްރޫއުތައް ދަނީ ފަނުފުލުން: ނިމާލު
12 ޖުލައި 2026 | އާދީއްތަ 07:43މ.އަތޮޅު ކައުންސިލްގެ ކުރީގެ ރައީސް ނިމާލު ވިދާޅުވީ ކައުންސިލްތަކުގެ ބައިވެރިވުމެއް ނެތި ސަރުކާރުން ހިންގާ ކުދި މަޝްރޫއުތައް ދިގުލައިގެން ގޮސް ފެންވަރު ދަށްވުމުގެ ސަބަބުން ނަތީޖާ ނުނެރެވޭ ކަމަށް. އެފަދަ މަސައްކަތްތައް ކައުންސިލްތަކާ ހަވާލުކުރުމަށް ގޮވާލައްވަމުން އޭނާ ވިދާޅުވީ، ސަރުކާރުން އިސްކަންދޭންވީ ބަނދަރު ހެދުމާއި ބޯހިޔާވަހިކަން ފަދަ ބޮޑެތި މަޝްރޫއުތަކަށް ކަމަށް.
ރާއްޖެޓީވީގެ ފަށާއިރު ޕްރޮގްރާމްގައި މ.އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު ވާހަކަ ދައްކަވަނީ. | ރާއްޖެއެމްވީ
ކައުންސިލްތަކާ ހަވާލުނުކޮށް ސަރުކާރުން ކުރިއަށް ގެންދާ ކުދި މަޝްރޫއުތައް ދަނީ ފަނުފުލުން ކަމަށް މ.އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު ވިދާޅުވެއްޖެ އެވެ.
އާދިއްތަ ދުވަހުގެ ފަށާއިރު ޕްރޮގްރާމްގައި ނިމާލު ވިދާޅުވީ މިދިޔަ ސަރުކާރާ ހިލާފަށް މިސަރުކާރުން ކުދި މަޝްރޫއުތައް ހިންގުމަށް މަސައްކަތް ކުރާ ކަމަށާއި، ކައުންސިލްތަކާ ހަވާލު ނުކުރާ ކަމަށެވެ. އަދި ނަތީޖާއެއް ގޮތުން އެކަންކަން ހާސިލް ނުކުރެވި، އަލުން އެ މަސައްކަތް ކުރަން ޖެހޭ ކަމަށް އޭނާ ވިދާޅުވި އެވެ.
އެގޮތުން ވޮލީ ކޯޓާއި، ބަށި ކޯޓު ފަދަ މަޝްރޫއުތައް ހިންގާ ކަމަށާއި، މި މަޝްރޫއުތައް ވެސް ނުނިމި ވަރަށް ބޮޑަށް ދިގުލައިގެންދާ ކަމަށް އޭނާ ވިދާޅުވި އެވެ. ފުޓްސަލް ދަނޑެއް ނުވަތަ ވޮލީ ކޯޓެއް އެޅުމުގެ މަސައްކަތް ސަރުކާރުން ކުރާއިރު، އެކަމަށް އެއްވެސް ބަހެއް ކައުންސިލަށް ނުބުނެވޭކަން ފާހަގަކުރައްވައި ނިމާލު ވިދާޅުވީ މަޝްރޫއު ކުރިއަށް ދަނީ ރަނގަޅަށްތޯ ބެލެން ވެސް ނޯންނަ ކަމަށާއި، ޔޫތް މިނިސްޓްރީން އެ މަޝްރޫއާ ބެހޭ މައުލޫމާތު ހިއްސާ ނުކުރާ ކަމަށެވެ.
ނިމާލު ވިދާޅުވީ ވޮލީ ކޯޓުތަކާއި، ފިޓްނެސް ސެންޓަރުތައް ފަދަ ކުދި މަޝްރޫއުތައް ހިންގުމުގެ ގާބިލުކަން ކައުންސިލް ތަކުގައި ހުންނާނެ ކަމަށާއި، އެފަދަ މަޝްރޫއުތައް ކައުންސިލްތަކާ ހަވާލު ކުރަން ޖެހޭ ކަމަށެވެ.
ކުދި ކުދި ޕްރޮޖެކްޓްތައް ސަރުކާރުން ކުރަން އުޅެގެން އެކަންތައްތަކެއް ހާސިލެއް ނުވޭ، މިދިޔަ 5 އަހަރުގައި ރަށު ކައުންސިލްތަކުން ކުރަން އުޅުނު ގިނަ ހަރަކާތްތައް ނުވަތަ ހިންގަން އުޅުނު ގިނަ ޕްރޮޖެކްޓުތައް ހަމަ ކާމިޔާބު ކަމާއެކު ހިންގާ ނިމިފައި ވަނީ. ވަރަށް ކައިރިން ކައުންސިލްތަކުން އެ ޕްރޮޖެކްޓްތައް ބަލާ އެއަށް އަމަލީ ސިފަ އަންނަ ގޮތް އަޅުގަނޑުމެންނަށް ފެނިފައި ވަނީމ.އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު
މީގެ އިތުރުން ނިމާލު ވިދާޅުވީ ކުދި މަޝްރޫއުތައް ހިންގުމުން އެހުރިހާ ކަމެއް ދަނީ ފަނުފުލުން ކަމަށާއި، އަލުންބަލުން އެ މަސައްކަތްތައް ކުރަން ޖެހޭ ކަމަށެވެ. އަދި ވިދާޅުވީ މުލަކުގެ ކުނި މެނޭޖްކުރާ އިމާރާތް ނިންމީ މިދިޔަ އަހަރު ކަމަށާއި، ނަމަވެސް މިހާރު އެ އިމާރާތުގެ ނިޓު ފޫގޮސްގެން ބަދަލު ކުރަން ޖެހިފައިވާ ކަމަށެވެ.
ސަރުކާރުތަކުން ހިންގަން ޖެހޭނީ ބޮޑެތި މަޝްރޫއުތައް ކަމަށާއި، ބަނދަރު ހެދުމާއި ހައުސިން މަޝްރޫއުތައް ހިންގުމަށް ސަރުކާރަށް އޭނާ ގޮވާލެއްވި އެވެ.
