އަތޮޅު ކައުންސިލްއާ ނުލައި އަތޮޅެއް ތަރައްގީވެ ކުރިއަށް ނުދާނެ: ނިމާލު
ސަރުކާރުން ލާމަރުކަޒީ ނިޒާމު ހަނިކޮށް އަތޮޅު ކައުންސިލްތައް އުވާލުމަކީ އަތޮޅުތަކުގެ ތަރައްގީއަށް އެޅޭ ހުރަހެއް ކަމަށް މ. އަތޮޅު ކައުންސިލްގެ ކުރީގެ ރައީސް ނިމާލު ވިދާޅުވި. ޚަރަދު ކުޑަކުރުމުގެ ނަމުގައި ސަރުކާރުން މި ނިންމުން ނިންމީ އެއްވެސް އަސާސެއް ނެތް ބަހަނާތަކެއްގެ މައްޗަށް ކަމަށާއި، މީގެ ސަބަބުން ރައްޔިތުންގެ ބާރުތައް ގެއްލިގެންދާނެ ކަމަށް އޭނާ ފާހަގަކުރެއްވި.
ރާއްޖެޓީވީގެ ފަށާއިރު ޕްރޮގްރާމްގައި މ.އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު ވާހަކަ ދައްކަވަނީ. | ރާއްޖެއެމްވީ
އަތޮޅު ކައުންސިލްއާ ނުލައި އަތޮޅެއް ތަރައްގީވެ ކުރިއަށް ނުދާނެ ކަމަށް މ. އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު ވިދާޅުވެއްޖެ އެވެ.
އާދިއްތަ ދުވަހުގެ ފަށާއިރު ޕްރޮގްރާމްގައި ނިމާލު ވަނީ ރައީސް ޑރ.މުހައްމަދު މުއިއްޒުގެ ސަރުކާރުން ލާމަރުކަޒީ ނިޒާމު ފުނޑާލުމަށް ކުރަމުންދާ މަސައްކަތްތަކަށް ވަރަށް ބޮޑަށް ފާޑު ވިދާޅުވެފަ އެވެ. އަދި އަތޮޅު ކައުންސިލްތައް އުވާލާފައިވާތީ އެކަމުގެ ކަންބޮޑުވުން ވެސް ފާޅު ކުރެއްވި އެވެ.
ނިމާލު ވިދާޅުވީ މިދިޔަ 5 އަހަރު އަތޮޅު ކައުންސިލެއް އޮވެ، މ. އަތޮޅުގެ ރައްޔިތުންނަށް ވަރަށް ބޮޑަށް އެހީތެރިކަން ފޯރުކޮށްދީފައިވާ ކަމަށާއި، ރައްޔިތުން ބޭނުންވާ ކަންކަމުގައި އެއްބާރުލުން ދީފައިވާ ކަމަށެވެ. އަދި އަތޮޅު ކައުންސިލެއް އޮންނަން ޖެހޭ ކަމަށާއި، އަތޮޅު ކައުންސިލްއާއެކު މުޅި އަތޮޅު ތަރައްގީވެ ކުރިއަރައިގެންދާ ކަމަށް އޭނާ ވިދާޅުވި އެވެ.
އަތޮޅު ކައުންސިލް މި ތަމްސީލު ކުރަނީ ހުރިހާ ރަށު ކައުންސިލްތަކުގެ ރައީސް ކަމަށްވާތީވެ އެބޭފުޅުންގެ ބަހާއެކީގައި މިކަން ކުރިއަށް ގެންދިޔާމަ އަޅުގަނޑުމެންނަށް ވަރަށް ބޮޑަށް އަތޮޅު އެކީގައި ކުރިއަށް ދިއުމަށް ވަރަށް ބޮޑަށް މަގުފަހިވެގެންދޭ. އެގޮތުން އަޅުގަނޑުމެން ވާނެ މިދިޔަ 5 އަހަރުގެ ތެރޭގައި އަތޮޅު ކައުންސިލެއްގެ ފަރާތުން މ. އަތޮޅުގެ ރަށްރަށަށް ވަކިން ޚާއްސަކޮށް ހުރިހާ ރަށްރަށަށް ވަރަށް ބޮޑު އެހީތެރިކަމާއި އެއްބާރުލުމެއް ދީފައި. ގުޅިގެން ޓީމެއްގެ ގޮތުގައި ހޯދައިދީފައި. އަތޮޅު ކައުންސިލްއާ ނުލައި އަޅުގަނޑު ދަންނަވާނީ އަތޮޅެއް ތަރައްގީވެ ކުރިއަށް ނުދާނޭ.މ. އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު
އަތޮޅު ކައުންސިލްތައް އުވާލީ ހަރަދު ކުޑަ ކުރުމަށް ކަމަށް ސަރުކާރުން ބުނާ ވާހަކަތަކަށް ރައްދު ދެއްވައި ނިމާލު ވިދާޅުވީ ހަރަދު ކުޑަ ކުރާ ވާހަކައަކީ އެއްވެސް ތާކުންތާކު ނުޖެހޭ ދެއުޅިއެއް ނުވާ ވާހަކައެއް ކަމަށެވެ. ހަމައެކަނި މަދުވީ އަތޮޅު ކައުންސިލްގެ ރައީސް އާއި އެސްޖީ ކަމަށާއި، އެއަށްވުރެ ގިނައިން ބޭފުޅުން އައްޔަން ކުރާ ކަމަށް ނިމާލު ވިދާޅުވި އެވެ. އަދި ވިދާޅުވީ އަތޮޅު ކައުންސިލްތަކުގެ އެހެން މުވައްޒަފުންގެ މުސާރަ އާއި، އެހެނިހެން ހުރިހާ ހަރަދެއް ހިނގާ ކަމަށެވެ.
މިވަގުތު އަތޮޅު ކައުންސިލްތަކުގެ ހާލަތު ހުރީ މިސްރާބެއް ނެތް އޮޑިއެއް ދަތުރުކުރާ މިސްބާރު. އަތޮޅު ކައުންސިލުން ކުރަންވީ ކަމެއް ވާންވީ ގޮތެއް ހަދަންވީ ގޮތެއް އެތާގައި ތިބި މުވައްޒަފުންނަށް ވެސް ނޭނގޭ. އެލްޖީއޭއަށް ވެސް ނޭނގޭ. ދެން އަތޮޅު ކައުންސިލް މުވައްޒަފުން ކޮންމެ ދުވަހަކު ވެސް ނުކުމެ ގަޑި ހަމަޖައްސާފައި ދަނީ.މ.އަތޮޅު ކައުންސިލްގެ ކުރީގެ ރައީސް މުހައްމަދު ނިމާލު
ނިމާލު ވިދާޅުވީ އަތޮޅު ކައުންސިލްތައް އުވާލުމަށް ސަރުކާރުން ދެއްކީ ބަހަނާ ކަމަށާއި، ރަނގަޅު އެންމެ ސަބަބެއް ވެސް ދެއްކިފައިނުވާ ކަމަށެވެ. އަދި ސަރުކާރުގެ މަގުސަދަކީ ރައްޔިތުންގެ ބާރު ހަނި ކުރުން ކަމަށްވާތީ އަތޮޅު ކައުންސިލްތައް އުވާލީ ކަމަށް ނިމާލު ވިދާޅުވި.
