ސިޔާސީ އިދިކޮޅު ފަރާތްތަކުގެ މައްޗަށް މީގެ ކުރިން ވެސް އިންސާފުވެރި ޝަރީއަތް ހިންގުމަށް ރާއްޖެއިން ދެކޮޅު ހަދާފައިވާ ކަމަށާއި މެމްބަރު ފާރިސް މައުމޫންގެ ޝަރީއަތް ބައިނަލްއަގްވާމީ މިންގަނޑުތަކާ އެއްގޮތަށް  ހިންގުމަށް އެމްނެސްޓީ އިންޓަރނޭޝަނަލްއިން ގޮވާލާއިފިއެވެ.

އެމްނެސްޓީ އިންޓަރނޭޝަނަލްގެ ދެކުނު އޭޝިއާގެ ޑިރެކްޓަރ ބިރާޖް ޕަތްނައިކް ހުކުރު ދުވަހު ނެރުއްވާފައިވާ ބަޔާނެއްގައިވަނީ އުފައްދައިގެން ހިންގާ ހުރިހާބާވަތެއްގެ ދައުވާތަކެއް ސާބިތު ކުރަމުންދާކަމަށާއި އޭގެ ތެރޭގައި ހުއްދަ ނޫންތަނަކަށް ވަނުމުން ފެށިގެން ޓެރެރިޒަމްގެ ދައުވާއާ ހަމައަށް ހިމެނޭކަމަށެވެ.

"ދިވެހިރާއްޖޭގެ އަދުލުގެ ނިޒާމަކީ އެ ނަމާ އެއްފަދަ އެއްޗަކަށް ވުމަށް އެބަ ޖެހޭ ޝަރުއީ ނިޒާމްގެ މިނިވަންކަން އިއާދަވާން" ބިރާޖް ނެރުއްވާފައިވާ ބަޔާނުގައިވެއެވެ.

ފަނޑިޔާރުންނަކީ ސަރުކާރުން ބުނާހާ ކަމެއް ކޮށްދޭންތިބި ބައެއްގެ ގޮތުގައި ތިބިހާ ދުވަހަކު ނުބައި ދައުވާތައް ކުރުން ނިމުމަކަށް ނާންނާނެ ކަމަށް އެ ބަޔާނުގައިވަނީ ބުނެފައެވެ.

ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ހައްޔަރު ކޮށްފައި ވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް މެމްބަރުންގެ ތާއީދު ހޯދުމުގެ ގޮތުން ރިޝްވަތު ހުށަހެޅުއްވިކަމުގެ ތުހުމަތުކޮށް ޖުލައި މަހުގެ 18 ވަނަ ދުވަހުއެވެ.

އޭރު ވެސް ފާރިސްގެ މައްޗަށް ގެންދިޔައީ ޕީޕީއެމްގެ ދިދަޔާ ލޯގޯ ބޭނުން ކުރެއްވުމުން ޝަޚުސު އޮޅުވާލުމުގެ ދައުވާއެއް ހިންގަމުންނެވެ.