5 އަހަރުގެ ތަރައްގީގެ ޕްލޭނަކާއެކު މާލެ ސިޓީ "ރިތިންކް" ކުރަނީ
10 ޖުލައި 2026 | ހުކުރު 01:56މާލެއަކީ ދިރިއުޅެން ފަހި ޖަޒީރާ ސިޓީއަކަށް ހެދުމަށް "ރިތިންކް މާލެ އާރބަން ސްޓްރެޓެޖީ" ގެ ނަމުގައި 25 އަހަރުގެ ދުރު ރާސްތާ ޕްލޭނެއް ސިޓީ ކައުންސިލުން އެކުލަވާލައިފި. ތިމާވެއްޓާއި އިގުތިސާދުގެ އިތުރުން މުޖުތަމައަށް އަމާޒުކޮށް ހަތް އިސްތިރާޖެއްގެ މައްޗަށް އެކުލެވޭ މި ޕްލޭންގައި ދަތުރުފަތުރާއި، ބޯހިޔާވެހިކަމާއި، ފެހިކަން އިތުރުކުރުމުގެ އިތުރުން އަމާން މާހައުލެއް ގާއިމުކުރުމަށް ވަނީ ހިމަނާފަ.
9 ޖުލައި 2026 ގައި ބޭއްވި، މާލެ ސިޓީ ކައުންސިލްގެ، 2026 ވަނަ އަހަރުގެ، ރައްޔިތުންގެ ދެވަނަ ބައްދަލުވުމުގައި، މޭޔަރ އާދަމް އާޒިމް ވާހަކަ ދައްކަވަނީ: ކައުންސިލްގެ ދުރު ރާސްތާ ތަރައްގީގެ ޕްލޭން ހާމަކޮށްފައިވަނީ މި ޖަލްސާގަ. | މާލެ ސިޓީ ކައުންސިލް
މާލެ ސިޓީ އަށް ދިމާވެފައިވާ އެކި މައްސަލަތައް ހައްލުކޮށް، ދިރިއުޅެން ފަހި ހިތްފަސޭހަ ތަނަކަށް ހެދުމަށްޓަކައި 2027 އިން 2031 އަށް ހާސިލްކުރަން ކަނޑައަޅާފައިވާ ލަނޑުދަނޑިތަކުގެ މައްޗަށް އެކުލެވޭ ތަރައްގީގެ ޕްލޭނެއް މާލެ ސިޓީ ކައުންސިލުން އެކުލަވާލައިފި އެވެ.
މި ކަން ހާމަކޮށްފައިވަނީ، 9 ޖުލައި 2026 ގައި ބޭއްވި، މާލެ ސިޓީ ކައުންސިލްގެ، 2026 ވަނަ އަހަރުގެ، ރައްޔިތުންގެ ދެވަނަ ބައްދަލުވުމުގަ އެވެ.
"ރިތިންކް މާލެ އާރބަން ސްޓްރެޓެޖީ 2030/2050" ގެ ނަމުގައި އެކުލަވާލި މި ދުރު ރާސްތާ ޕްލޭންގެ މައިގަނޑު ތަސައްވަރަކީ ކުރިއަށް އޮތް 25 އަހަރު ދުވަހުގެ ތެރޭގައި މާލެއަކީ ދިރިއުޅެން ފަހި، ހިތްފަސޭހަ ޖަޒީރާ ސިޓީއަކަށް ހެދުމެވެ. މި ޕްލޭން ބަހާލެވިފައިވަނީ މައިގަނޑު ތިން ދާއިރާއަކަށެވެ. އެއީ ތިމާވެށި، އިގުތިސާދު އަދި މުޖުތަމައެވެ. މި ދާއިރާތަކުގެ ދަށުން ޖުމްލަ 7 އިސްތިރާޖެއް ވަނީ ކަނޑައަޅާފަ އެވެ.
ޕްލޭންގެ ފުރަތަމަ އިސްތިރާޖަކީ މާލެއަކީ "ހަލުވި ސިޓީ" އަކަށް ހެދުމެވެ. މީގެ މަގުސަދަކީ ދަތުރުފަތުރު ކުރުމާއި ހިނގާބިނގާވެ އުޅުމަށް ފަސޭހަ ނިޒާމެއް ގާއިމުކުރުމެވެ. މީގެ ދަށުން ވެހިކަލް ކެރީން ކެޕޭސިޓީ ކަނޑައެޅުމާއި، މަގުތައް ޒަމާނީ ފެންވަރަށް ތަރައްގީކޮށް، އާންމު ދަތުރުފަތުރުގެ ނިޒާމު ހަރުދަނާކުރުމަށް ވަނީ ނިންމާފަ އެވެ.
ދެވަނަ އިސްތިރާޖަކީ "ފިނި ސިޓީ" އެކެވެ. މާލޭގެ ހޫނުމިން މަޑުކުރުމަށްޓަކައި ފެހިކަން އިތުރުކުރުމާއި، ފެންބޮޑުވުމުގެ މައްސަލަ ހައްލުކޮށް، ކުނި އުކާލުމުގެ ނިޒާމު ހަރުދަނާކުރުމަށް ވަނީ ހިމަނާފައެވެ. ތިންވަނަ އިސްތިރާޖެއްގެ ގޮތުގައި އޮތީ "ބަދަލުތަކަށް އިޖާބަދޭ ސިޓީ" އަކަށް ހެދުމެވެ. މީގެ ދަށުން ބިންތައް ބޭނުންކުރާ ގޮތް ތަރުތީބުކޮށް، ސިނާއީ މަސައްކަތްތަކަށް ހާއްސަ ސަރަހައްދުތައް ކަނޑައެޅުން ހިމެނެއެވެ.
އިގުތިސާދީ ކުރިއެރުމަށް އަމާޒުކޮށް ހަތަރުވަނަ އިސްތިރާޖެއްގެ ގޮތުގައި "ފާގަތި ސިޓީ" އެއް ބިނާކުރުން ހިމަނާފައިވާއިރު، ފަސްވަނަ އިސްތިރާޖަކީ "އެންމެން ހިއްސާވާ ސިޓީ" އެކެވެ. މީގެ ބޭނުމަކީ ބޯހިޔާވެހިކަމާއި ވަޒީފާގެ ހަމަހަމަ ފުރުސަތުތައް ހޯދައިދިނުމެވެ. ހަވަނަ އިސްތިރާޖެއްގެ ގޮތުގައި "އަމިއްލަވަންތަ ސިޓީ" އެއްގެ ގޮތުގައި މާލެ ތަރައްގީކޮށް، ސަގަފީ ތަރިކަ ރައްކާތެރިކުރުމަށް ވަނީ ނިންމާފައެވެ.
ޕްލޭންގެ އެންމެ ފަހު އިސްތިރާޖަކީ "އަމާން އަދި ރައްކާތެރި ސިޓީ" އެކެވެ. މީގެ ދަށުން ގާނޫނީ އެހީތެރިކަމާއި ޑިޖިޓަލް ރައްކާތެރިކަމަށް ރައްޔިތުން އަހުލުވެރިކުރުވުން ހިމެނެއެވެ.
މާލެ ސިޓީ ކައުންސިލުން ބުނި ގޮތުގައި މި ހުރިހާ ލަނޑުދަނޑިތަކެއް ހާސިލްކުރުމަށްޓަކައި ކައުންސިލްގެ އިދާރީ ހިންގުން މިހާރަށްވުރެ ބޮޑަށް ހަރުދަނާކުރުމަށް ވެސް ވަނީ ރޭވިފައެވެ. މި ޕްލޭނަކީ މާލޭގެ މުސްތަގުބަލަށް އެޅޭ މުހިންމު ފިޔަވަޅެއްގެ ގޮތުގައި ކައުންސިލުން ފާހަގަކުރެ އެވެ.
ސިޓީ ކައުންސިލުން ހާމަކުރި ގޮތުގަ ބުރާސްފަތި ދުވަހުގެ ރޭ ބޭއްވި ބައްދަލުވުމަކީ މާލެ ސިޓީގެ ރައްޔިތުންނާ ގާތުން މަސައްކަތްކޮށް، ރައްޔިތުންގެ ޚިޔާލާއި މަޝްވަރާ ހޯދުމަށް ބޭއްވުނު މުހިންމު ބައްދަލުވުމެކެވެ.
