ފޭސްބުކާއި ގޫގުލް އަދި ޓްވިޓަރ އެމެރިކާގެ ކޮންގްރެސް އަށް ހާޒިރު ކުރަނީ

ފޭސްބުކާއި ގޫގުލް އަދި ޓްވިޓަރގެ އިސްވެރިން އެމެރިކާގެ ކޮންގްރެސް އަށް ހާޒިރުވާން އަންގައިފި އެވެ.

ގިނަ ބައެއްގެ މަޤްބޫލުކަން ހޯދާފައިވާ ފޭސްބުކް އަދި ޓްވިޓަރގެ އިތުރުން ގޫގުލްގެ އިސްވެރިން އެމެރިކާގެ ކޮންގްރެސް އަށް ހާޒިރުވުމަށް އަންގާފައިވަނީ 2016ވަނަ އަހަރު ބޭއްވި އެމެރިކާގެ ރިޔާސީ އިންތިޚާބަށް ރަޝިއާ އިން ނުފޫޒުފޯރުވި ކަމަށް ތުހުމަތު ކުރެވޭ މައްސަލައިގައި ސެނެޓްގެ އިންޓެލިޖެންސް ކޮމިޓީން ހިންގާ ތަހުގީގަށް ހެކި ހޯދުމަށް ކަމަށް މަޢުލޫމާތު ލިބެ އެވެ.

އިންޓެލިޖެންސް ކޮމިޓީގެ އޮފިޝަލަކާއި ހަވާލާދީ މީޑިއާ ރިޕޯޓްތައް ބުނާ ގޮތުން، މިތިން ކުންފުނި ހާޒިރު ކުރުމަށް ނިންމާފައިވަނީ އަންނަ ނޮވެމްބަރު މަހުގެ އެއްވަނަ ދުވަހު ބާއްވާ އެކޮމިޓީގެ އާއްމު އަޑުއެހުމަށެވެ.

އެމެރިކާގެ ހައުސް އޮފް ރެޕްރެޒެންޓޭވިސްގެ އިންޓެލިޖެންސް ކޮމިޓީގެ ލީޑަރުން ވަނީ، އޮންލައިން ޕްލެޓްފޯމްތަކާއި ވަޞީލަތްތައް ބޭނުން ކޮށްގެން އެމެރިކާގެ ރިޔާސީ އިންތިޚާބުގެ އިތުބާރު ގެއްލުވާލުމަށާއި، އިންތިޚާބަށް ނުފޫޒު ފޯރުވުމަށް ރަޝިޔާ އިން މަސައްކަތް ކުރި ގޮތް ދެނެގަތުމަށް ޓެކްނޮލޮޖީ ކުންފުނިތަކަކާއެކު ކުރިޔަށް އޮތް މަހުގެ ތެރޭގައި ހުޅުވާލެވިފައިވާ އަޑުއެހުމެއް ބޭއްވުމަށް ނިންމާފައިވާކަން ހާމަކޮށްފަ އެވެ.

ގޫގުލް އަދި ފޭސްބުކްގެ މަންދޫބުން ވަނީ ސެނެޓް ކޮމިޓީގެ ދައުވަތު ލިބިފައިވާކަން ކަށަވަރުކޮށްދީފަ އެވެ. އެހެންނަމަވެސް އެއަޑުއެހުމަށް ހާޒިރުވާނެކަން އެދެކުންފުނިންވެސް ރަސްމީކޮށް ހާމަކޮށްފައެއްނުވެއެވެ. މިކަމާއި ގުޅޭ ގޮތުން ޓްވިޓަރ އިން މިހާތަނަށް އެއްޗެއް ބުނެފައެއްނުވެ އެވެ.

އެމެރިކާގެ ރިޔާސީ އިންތިޚާބަށް ރަޝިއާ އިން ނުފޫޒު ފޯރުވުމަށް މަސައްކަތް ކުރި ކަމަށް ބުނާ މައްސަލައިގެ ތަހުގީގުގައި އިންޓަރނެޓް މެދުވެރިކޮށް ޚިދުމަތްދޭ ކުންފުނިތަކުން މަޢުލޫމާތު ހޯދުމުގެ މަސައްކަތް ފަށާފައިވާއިރު، އެމެރިކާގެ މައި ދެޕާޓީ ކަމަށްވާ ރިޕަބްލިކަން އަދި ޑިމޮކްރެޓިކް ޕާޓީއަށް ނިސްބަތްވާ ޤާނޫނު ހަދާ މަޖިލީހުގެ މެމްބަރުންވެސް ވަނީ އިންތިޚާބަށް ނުފޫޒު ފޯރުވުމަށް ރަޝިއާ އިން ކުރި މަސައްކަތުގައި ސޯޝަލް މީޑީއާގެ ނެޓްވާރކްތައް ދައުރެއް އޮވެދާނެ ކަމާއިމެދު ކަންބޮޑުވުން ފާޅުކޮށްފައެވެ.

އެމެރިކާގެ ސެނެޓް އަދި ހައުސްގެ އިންޓެލިޖެންސް ކޮމިޓީ އަކީ، އެމެރިކާގެ ރިޔާސީ އިންތިޚާބަށް ރަޝިއާއިން ނުފޫޒު ފޯރުވުމަށް މަސައްކަތް ކުރި ކަމަށް ބުނާ މައްސަލައިގައި ކޮންގްރެސް އިން ހިންގާ ތަހުގީގުގެ މައި ދެކޮމިޓީ އެވެ.