ފްލެޓްތަކުގެ މައުލޫމާތު ކޮމެޓީ މެންބަރުންނަށް ނުދިނުމަށް ރިޔާޒް ރަޝީދު ވަނީ އަންގާފައި: ރޮޒައިނާ
27 ސެޕްޓެމްބަރު 2017 | ބުދަ 15:06ހައުސިންގ މިނިސްޓަރ ވިދާޅުވެފައި ވަނީ ކޮމެޓީއަށް އެއްބާރުލުން ދެއްވާފައިވާނޭ ކަމަށް
އައްޑޫ މީދޫ ދާއިރާގެ މެންބަރު ރޮޒައިނާ އާދަމް
ފްލެޓްތަކާ ގުޅިގެން ހައުސިން މިނިސްޓްރީން ފޮނުވި މައުލޫމާތު ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމެޓީގެ އެއްވެސް މެންބަރުންނަށް ނުދިނުމަށް އެކޮމެޓީގެ މުޤައްރިރު ރިޔާޒް ރަޝީދު އަންގަވާފައިވާ ކަމަށް އެކޮމެޓީގެ މެންބަރު ރޮޒައިނާ އާދަމް ވިދާޅުވެއްޖެއެވެ.
އައްޑޫ މީދޫ ދާއިރާގެ މެންބަރު ރޮޒައިނާ ބުދަދުވަހު ކުރެއްވި ޓްވީޓެއްގައި ވިދާޅުވެފައި ވަނީ "ފްލެޓް ތަކާ ގުޅިގެން ފޮނުވި މައުލޫމާތު ކޮމެޓީގެ އެއްވެސް މެންބަރަކަށް ނުދިނުމަށް ރިޔާޒް ރަޝީދު މަޖިލިސް ސްޓާފުންނަށް ޤަވާއިދާ ޚިލާފަށް ވަނީ އަންގާފައި،" ކަމަށެވެ.
ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީން މިދިޔަ ހަފްތާގެ ބުދަ ދުވަހު ބޭއްވި ބައްދަލުވުމުގައި އެ ކޮމެޓީގެ ބަދަލުވުމުގައި ބައިވެރިވެވަޑައިގެންނެވި މެމްބަރުން މަޝްވަރާ ކުރެއްވުމަށް ފަހުން ނިންމަވާފައި ވަނީ ފްލެޓް ލިބޭ ކަމަށް ހައުސިންގ މިނިސްޓްރީން އާއްމުކޮށްފައިވާ މީހުންގެ މައުލޫމާތާއި މާކްސް ލިބިފައިވާ ގޮތުގެ ތަފްސީލް މިމަހުގެ 25 ވަނަ ދުވަހުގެ ކުރިން އެ ކޮމެޓީ އަށް ފޮނުވުމަށް ހައުސިން މިނިސްޓްރީ އަށް އެންގުމަށެވެ. އަދި އެ މައުލޫމާތު ލިބުމާ އެކު ވީހާ ވެސް އަވަހަކަށް ކޮމެޓީގެ ބައްދަލުވުމެއް ބޭއްވުމަށް ވެސް ވަނީ ނިންމާފަ އެވެ.
އެގޮތައް އެދިފައިވަނިކޮށް ފްލެޓް ލިބުނު މީހުންގެ ފައިނަލް ލިސްޓް އަންގާރަ ދުވަހު އާއްމުކުރުމަށް ފަހު ބުދަދުވަހު ހައުސިންގ މިނިސްޓްރީގައި ބޭއްވި ޕްރެސް ކޮންފަރެންސެއްގައި ހައުސިންގ މިނިސްޓަރ ޑރ މުހައްމަދު މުއިއްޒު ވިދާޅުވީ ކޮމެޓީން އެދުނު ހުރިހާ ކަމަކަށް އެއްބާރުލުން ދެއްވާފައިވާނޭ ކަމަށެވެ.
ފްލެޓްގެ މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ހުށަހެޅުއްވީ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި، މާފަންނު ހުޅަނގު ދާއިރާގެ މެންބަރު މުހައްމަދު ފަލާހުގެ އިތުރުން ކެންދޫ ދާއިރާގެ މެންބަރު އަލީ ހުސެއިން އެވެ.
