ފުރަތަމަ ފަހަރަށް ރަނުގެ އަގު އައުންސަކަށް 5,000 ޑޮލަރަށް ވުރެ މައްޗަށް އުފުލިއްޖެ

އާދީއްތަ ދުވަހުގެ ރޭ ފުރަތަމަ ފަހަރަށް ރަނުގެ އަގު އައުންސަކަށް 5,000 ޑޮލަރަށް ވުރެ މައްޗަށް އުފުލިއްޖެ އެވެ.

މި އަހަރުގެ ފުރަތަމަ 26 ދުވަހުގެ ތެރޭގައި ރަނުގެ އަގު ވަނީ 15 އިންސައްތަ އުފުލިފަ އެވެ. މިއީ 2025 ވަނަ އަހަރު ރަނުގެ އަގު 65 އިންސައްތަ އުފުލިގެން ދިޔަ ރެކޯޑް މިންވަރަށް ފަހު، ރަނުގެ ބާޒާރު ގައި ފެނިގެންދާ ތާރީޚީ އަގު އުފުލުމެކެވެ. 2025 ވަނަ އަހަރަކީ 1979 ވަނަ އަހަރުގެ ފަހުން ރަނުގެ އަގަށް އެންމެ ބޮޑު ވެގެން ދިޔަ އަހަރެވެ.

އާންމުގޮތެއްގައި ރަނަކީ ދުނިޔޭގެ އިޤްތިޞާދީ ނުތަނަވަސްކަމުގެ ވަގުތުތަކުގައި އިންވެސްޓަރުންގެ އިތުބާރު އޮންނަ އަދި ބާޒާރުގެ ހާސްކަން މިނެދޭ މިންގަނޑެއް ކަމަށް މާލީ ތަޖުރިބާކާރުން ބުނެ އެވެ. މި ފަހަރުގެ އަގު އުފުލުމުގެ ފަހަތުގައި ވަނީ ރައީސް ޓްރަމްޕްގެ ސިޔާސަތުތަކުގެ ސަބަބުން ދުނިޔޭގެ މަސްރަހަށާއި އެމެރިކާގެ ދާޚިލީ ކަންކަމަށް އައި ލޮޅުންތަކެވެ. އޭގެ ތެރޭގައި، ނޭޓޯގެ ބައިވެރިންނަށް ގްރީންލޭންޑްގެ މައްސަލައިގައި އެމެރިކާ އިން ދިން ޓެރިފްގެ އިންޒާރުތަކާއި، ވެނެޒުއޭލާ އާ ދެކޮޅަށް ހިންގި އަސްކަރީ ހަރަކާތްތަކުގެ އިތުރުން ފެޑެރަލް ރިޒާވްގެ ޗެއަރމަން ޖެރޯމް ޕަވަލް އާ ދެކޮޅަށް ހިންގާ ޖިނާއީ ތަހުގީގު ހިމެނެ އެވެ.

ރަނުގެ އަގު އުފުލުމަށް މެދުވެރިވި އެހެން ސަބަބުތަކުގެ ތެރޭގައި، އެމެރިކާ ޑޮލަރުގެ އަގު ދަށްވުމާއި، އިންފްލޭޝަން އުންމީދުކުރި ވަރަށްވުރެ މަތިވުމާއި، މި އަހަރު ފެޑެރަލް ރިޒާވުން އިންޓްރެސްޓް ރޭޓް އިތުރަށް ދަށްކުރާނެ ކަމަށް ބެލެވުމާއި، ދުނިޔޭގެ އެކި ގައުމުތަކުގެ މަރުކަޒީ ބޭންކުތަކުން ގިނަ އަދަދަކަށް ރަން ގަންނަމުންދިއުން ހިމެނެ އެވެ. އާދީއްތަ ދުވަހުގެ ރޭ 8:14 ހާއިރު ރަނުގެ އަގު ވަނީ 1.4 އިންސައްތަ އިތުރުވެ، އައުންސަކަށް 5,058 ޑޮލަރަށް އަރާފަ އެވެ.

ރަނުގެ އިތުރުން ރައްކާތެރި މުދަލެއްގެ ގޮތުގައި ބެލެވޭ ރިހީގެ އަގުވެސް ވަނީ 4.5 އިންސައްތަ އުފުލި، އައުންސަކަށް 107.8 ޑޮލަރަށް އަރާފަ އެވެ. ރަނެކޭ އެއްފަދައިން ރިހީގެ އަގަށް ވެސް މިދިޔަ އަހަރު ވަނީ 1979 ވަނަ އަހަރުގެ ފަހުން އެންމެ ބޮޑު ކުރިއެރުމެއް އައިސްފަ އެވެ. އެއީ 141 އިންސައްތައިގެ އިތުރުވުމެކެވެ.

ރަނުގެ އަގު 5,000 ޑޮލަރުގެ މިންގަނޑަށް އެރި ކަމުގައި ވިޔަސް، ދުނިޔޭގެ މަސްރަހުގައި ނުތަނަވަސްކަން ދެމިއޮތުމުގެ ސަބަބުން އަގުތައް އަދިވެސް މަތިވާނެ ކަމަށް މާހިރުން ލަފާކުރެ އެވެ.

ބޭންކް އޮފް އެމެރިކާގެ ޗީފް އިންވެސްޓްމަންޓް އޮފިސަރ މައިކަލް ހާޓްނެޓް މިދިޔަ ހަފުތާގައި ވިދާޅުވި ގޮތުގައި، ރަނުގެ އަގު 6,000 ޑޮލަރަށްވުރެ މައްޗަށް އުފުލުމުގެ ފުރުޞަތު އެބައޮތެވެ.