"މީހެއްގެ ފުރާނައިގެ ބަދަލެއް ނުހޯދޭނެ"
30 އޯގަސްޓު 2023 | ބުދަ 18:04އާންމު ދިރިއުޅޭ ސަރަހައްދުތަކާއި ފަރުބަދަމަތީ ސަރަހައްދުތަކާއި ސަހަރާތަަކަށް ތަފާތުކުރުމެއްނެތި ބޯކޮށް ވާރޭވެހުނު
"މީހެއްގެ ފުރާނައިގެ ބަދަލެއް ނުހޯދޭނެ"
މެކްސިކޯގެ ބަޖާ ކެލިފޯނިއާ ޕެނިންސިއުލާ ހުރަސްކޮށް، ބާރު ސްޕީޑްގައި ތޫފާން ހިލަރީ އެމެރިކާގެ ލޮސް އެންޖަލިސްއަށް އައިސްފައި ވަނީ އޮގަސްޓް 20 ވަނަ ދުވަހުއެވެ. ހިލަރީ ލޮސް އެންޖަލިސް އަށް އަރާ ހަމަވުމާއެކު މުޅި އެސްޓޭޓްގައި ފެންބޮޑުވެގެން ދިޔައެވެ.
އާންމުން ދިރިއުޅޭ ސަރަހައްދުތަކާއި ފަރުބަދަމަތީ ސަރަހައްދުތަކާއި ސަހަރާތަަކަށް ބޯކޮށް ވާރޭވެހުނެވެ.
ޔުއާން ފޭފަރ އާއި އޭނާގެ މަންމަ މޮނިކާ ދިޔައީ ހާސްވެ ކަންބޮޑުވެފައިވާ ހާލު، ވިއްސާރައިގައި ބޮޑުވި ފެންގަނޑު އެމީހުންގެ ގެއާ އަރާ ހަމަކުރާ މަންޒަރު ބަލަމުންނެވެ.
ނަމަވެސް މާޔޫސްވެ، ހިތްވަރު އެލުވާލުމުގެ ބަދަލުގައި އެދެމައިން ނިންމީ، އެމީހުންގެ ގޭގެ ނަސީބު، ހިލަރީ އާ ހަވާލުކޮށް، ދެމައިން ސަލާމަތުގެ އައްސޭރިއަށް ދަތުރުކުރާށެވެ.
އެދެމައިން މިސްރާބު ޖެހީ ފޭފަރގެ ދައްތަގެ ގެއަށް ދިއުމަށެވެ. ހިތާ ދެކޮޅަށެވެ. ނަމަވެސް، އެނޫން ގޮތެއްވެސް އެދެމައިންނަށް ނެތީއެވެ.
މިއީ ތޫފާން ހިލަރީގެ ސަބަބުން ކެލިފޯނިއަށް ކުރި ވިއްސާރައިގައި ފެންބޮޑުވެ ދިރިއުޅުމަށް ބޮޑު ހުއްޓުމެއް ގެންނަން މަޖުބޫރިވި އެއް އާއިލާގެ ވާހަކައެވެ. މިއަދު އެސްޓޭޓްގައި މިހާލުގައި ދިރިއުޅެން ޖެހިފައިވާ އެތައް އާއިލާއެއް އެބަތިއްބެވެ.
ކެލިފޯނިއާގެ ގަވަރުނަރު ވަނީ ފެންބޮޑުވެ އެސަރަހައްދަށް ކުރިމަތިވަމުންދިޔަ ނުރައްކަލާ ލިބެމުންދިޔަ ގެއްލުމުގެ ސަބަބުން އެސަރަހައްދުގައި ސްޓޭޓް އޮފް އިމަޖެންސީވެސް އިއުލާނުކުރައްވާފައެވެ.
