ޗައިނާ އާއި ތައިވާނުގެ ނުތަނަވަސްކަން އިތުރު ކުރާ އެއްޗަކަށް މިފަހަރު މިވީ މީރު މޭވާ އެއްކަމަށްވާ އަތަ

ޗައިނާއިން ޓައިވާނުގެ އަތަ އިމްޕޯޓު ކުރުން އިތުރުކުރުމަށް ރާވާފައިވާ ރޭވުމާ ގުޅިގެން، އެ ގައުމުގެ ދަނޑުވެރިންނަށް ޓައިވާނު ސަރުކާރުން އިންޒާރު ދީފިއެވެ. ހިތުގެ ބައްޓަމަށް އޮންނަ، ބޭރު ތޮށިގަނޑު ކުރަކި މި މޭވާއަކީ ޗައިނާއާއި ޓައިވާނާ ދެމެދު އުފެދިފައިވާ ނުތަނަވަސްކަމުގެ އާ ސަބަބަކަށް ވެދާނެ ކަމަށް ބެލެވެއެވެ.

"އެޓެމޯޔާ" ނަމަކަށް ކިޔާ މި މޭވާ އަކީ ކަސްޓަޑް އެޕަލް ނުވަތަ އަތައިގެ ތަފާތު ބާވަތްތައް މަސްހުނިކޮށްގެން  އުފައްދާފައިވާ، އެތެރެ މަޑު ހުދުކުލައެއްގައި ހުންނަ، އަދި ބޭރު ތޮށިގަނޑު ފެހިކުލައިގެ ކުރަކިކޮށް ހުންނަ މޭވާއެކެވެ. މިއީ ޓައިވާނުގެ ޓައިޓަންގް ކައުންޓީއަށް ޚާއްސަ މޭވާއެކެވެ.

ޓައިވާނުގެ އެޓެމޯޔާ އެންމެ ގިނައިން އެތެރެކުރާ ގައުމަކީ ޗައިނާއެވެ. އަދި މި މަހުގެ ކުރީކޮޅު ޗައިނާއިން ވަނީ މި މޭވާ އިތުރަށް ގަތުމަށް ވައުދުވެފައެވެ.

ނަމަވެސް، ޓައިވާނުގެ އެގްރިކަލްޗަރ މިނިސްޓްރީން މިދިޔަ ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ، މިއީ ޗައިނާއިން ގެންގުޅޭ "މަޅީގައި ޖެއްސުމަށްފަހު މަރާލާ" ސިޔާސަތުގެ ކްލެސިކް މިސާލެއް ކަމަށެވެ. މިއީ ދަނޑުވެރިން ޗައިނާގެ މާކެޓަށް ބަރޯސާކުރުވުމަށްފަހު، މާކެޓަށް އަންނަ ބަދަލުތަކުގެ ތެރެއަށް ދަނޑުވެރިން ދޫކޮށްލުމަށް ބެއިޖިންގްއިން ކުރާ ކަމެއް ކަމަށް އެ މިނިސްޓްރީން ތުހުމަތުކުރެއެވެ.

އަމިއްލަ ވެރިކަމެއް ކުރަމުންދާ ޓައިވާނަކީ ޗައިނާގެ ބައެއް ކަމަށް ބެއިޖިންގްއިން ދައުވާ ކުރެއެވެ. އަދި ބާރުގެ ބޭނުންކޮށްގެން ވެސް އެ ރަށް ހޯދާނެ ކަމުގެ އިންޒާރު ޗައިނާއިން ވަނީ ދީފައެވެ. ފަހަކަށް އައިސް ޗައިނާއިން ވަނީ ޓައިވާނު ކައިރީގައި އަސްކަރީ ތަމްރީނުތައް ވަރުގަދަކޮށް، އެ ރަށް ބަންދުކޮށްލާނެ ގޮތުގެ ތަމްރީނުތައް ވެސް ކުރިއަށް ގެންގޮސްފައެވެ.

މުހައްލިލުން ބުނާ ގޮތުގައި ޗައިނާއިން ޓައިވާނަށް ފިއްތުންތައް ކުރިމަތިކުރުވުމަށް އަސްކަރީ ނޫން އެކި އުކުޅުތައް ވެސް ބޭނުންކުރެއެވެ. މީގެ ތެރެއިން އެއް ހަތިޔާރަކީ މޭވާއެވެ.

2021 ވަނަ އަހަރު ޗައިނާއިން ވަނީ ޓައިވާނުގެ އަލަނާސި އެތެރެކުރުން މަނާކޮށްފައެވެ. މީގެ ސަބަބުން ދަނޑުވެރިންގެ ދިރިއުޅުމަށް ބޮޑެތި ހުރަސްތަކެއް ކުރިމަތިވިއެވެ. މިއާއެކު، ޗައިނާގެ އިގްތިސާދީ މަޖުބޫރުކުރުވުންތަކާ ދެކޮޅަށް ޓައިވާނުގެ ރައްޔިތުން އަމިއްލައަށް އެ ގައުމުގެ އުފެއްދުންތައް ބޭނުންކުރުމުގެ ކެމްޕޭނެއް ވެސް ފެށިއެވެ.

ބައެއް ފަރާތްތަކުން ބުނާ ގޮތުގައި މިހާރު އެޓެމޯޔާ މޭވާއަށް ވެސް ވަމުންދަނީ ހަމަ އެފަދަ ގޮތެކެވެ.

"ފުރަތަމަ ޗައިނާއިން ހެޔޮއެދޭކަން ދެއްކުމުގެ ގޮތުން ގިނަ އަދަދަކަށް އެޓެމޯޔާ ގަނެ، ދަނޑުވެރިން އެ މޭވާ ހެއްދުމަށް ހިތްވަރުދެނީ. އެއަށްފަހު، އެއްވެސް އިންޒާރެއް ދިނުމެއްނެތި އެއްފަރާތުން އެކަނި ނިންމާ ނިންމުމެއްގެ ދަށުން އެ މޭވާ އެކްސްޕޯޓްކުރުން ހުއްޓުވަނީ،" ޓައިވާނުގެ އެގްރިކަލްޗަރ މިނިސްޓްރީގެ ބަޔާނުގައި ބުނެފައިވެއެވެ.

އެ ބަޔާނުގައި ފާހަގަކޮށްފައިވާ ގޮތުގައި، ޗައިނާއިން 2021 ވަނަ އަހަރު ފަނިފަކުސަ ހުންނަ ކަމަށް ބުނެ އެޓެމޯޔާ އެތެރެކުރުން މެދުކަނޑާލިއެވެ. އޭގެ ފަހުން 2023 ވަނަ އަހަރު އަލުން އެތެރެކުރަން ފެށުމަށްފަހު، 2024 ވަނަ އަހަރު ވަނީ އެ މޭވާއިން ބޮޑު ޓެކްސްއެއް ނަގަން ފަށާފައެވެ.

މިފަދަ ފިޔަވަޅުތަކުގެ ސަބަބުން "މި ސިނާއަތަށް ބޮޑެތި ނުތަނަވަސްކަން ކުރިމަތިވެ، ދަނޑުވެރިން ބޮޑެތި ނުރައްކާތަކަކާ ކުރިމަތިލާންޖެހޭ" ކަމަށް އެ މިނިސްޓްރީން ބުންޏެވެ.

މީގެ އިތުރުން، ޗައިނާއިން އަމިއްލައަށް އެޓެމޯޔާ ހެއްދުން އިތުރުކުރަމުންދާ ކަމަށާއި، މިއީ ޓައިވާނުގެ ދަނޑުވެރިކަމުގެ ސިނާއަތަށް އޮތް ބިރެއް ކަމަށް ވެސް މިނިސްޓްރީން އިތުރަށް ފާހަގަކުރިއެވެ.

ޓައިވާނުގެ އެޓެމޯޔާ އެކްސްޕޯޓްކުރުމާ ގުޅޭ ބަހުސްތައް ގަދަވެފައިވަނީ، ޗައިނާގެ އައްސޭރިފަށުގެ ރަށެއް ކަމަށްވާ ޒިއާމެންގައި ބޭއްވި ފޯރަމެއްގައި، ޗައިނާގެ ކުންފުނިތަކުން އެ މޭވާ އިތުރަށް ގަތުމަށް ވައުދުވުމާ ގުޅިގެންނެވެ. މިއީ ޓައިވާނުން ޗައިނާއަށް އެކްސްޕޯޓްކުރާ މަހާއި ސައިފަތް ފަދަ ތަކެތި ގަތުން އިތުރުކުރުމަށް ޗައިނާއިން ގެންގުޅޭ ފުޅާ ރޭވުމެއްގެ ބައެކެވެ.

ޓައިވާނުގެ މަރުކަޒީ ސަރުކާރުން އެ ފޯރަމްގައި ބައިވެރިވުން މަނާކޮށްފައި އޮތް ނަމަވެސް، ޓައިވާނުގެ ވިޔަފާރިވެރިންނާއި އިދިކޮޅު ސިޔާސީ ފަރާތްތަކުން އެ ފޯރަމްގައި ބައިވެރިވިއެވެ.

ޓައިވާނުގެ މެއިންލޭންޑް އެފެއާޒް ކައުންސިލްގެ ތަރުޖަމާނު ވަނީ، އެ ފޯރަމްގައި ބައިވެރިވި އޮފިޝަލުންގެ މައްސަލަ ތަހުގީގުކޮށްފާނެ ކަމުގެ އިންޒާރު ދެއްވާފައެވެ.

ޓައިވާނުގެ އެގްރިކަލްޗަރ މިނިސްޓްރީގެ ބަޔާނުގައި ބުނެފައިވަނީ، ސަރުކާރުން އިސްކަންދޭނީ "ދެމެހެއްޓެނިވި ދަނޑުވެރިކަމުގެ ތަރައްގީއަށާއި ދަނޑުވެރިންނަށް ދާއިމީ އާމްދަނީއެއް ލިބޭނެ ގޮތް ހެދުމަށް" ކަމަށެވެ. 

ޓައިޕޭގެ މޭޔަރު ޗިއަންގް ވަން-އާން ވަނީ، މެއިންލޭންޑް އެފެއާޒް ކައުންސިލުން މި މައްސަލަ ބޭނުންކޮށްގެން ޓައިވާނުގެ ދަނޑުވެރިންނަށް "ބިރުދައްކައި ނުފޫޒު ފޯރުވަމުންދާ" ކަމަށް ތުހުމަތުކުރައްވާފައެވެ.

"ޓައިވާނުގެ އެޓެމޯޔާ ފަދަ މީރު އަދި ޚާއްސަ މޭވާއެއް އުފެއްދޭނެ އެހެން އެއްވެސް ގައުމެއް މި ދުނިޔެއަކު ނެތް،" މޭޔަރު ވިދާޅުވިއެވެ.