ތައިވާނުގެ މުހިންމު ވަސީލަތް ތަކަށް ޗައިނާ އިން ދޭ ސައިބާ ހަމަލާތައް އިތުރު ވެއްޖެ

ތައިވާނުގެ ހޮސްޕިޓަލު ތަކާއި ބޭންކުތައް ހިމެނޭހެން، އެ ގައުމުގެ މުހިންމު އުމްރާނީ ވަސީލަތް ތަކަށް ޗައިނާ އިން ދޭ ސައިބާ ހަމަލާތައް އިތުރުވެއްޖެ އެވެ.

އެގޮތުން 2025 ވަނަ އަހަރު، އޭގެ ކުރީ އަހަރާ އަޅާ ބަލާއިރު، ހަ އިންސައްތަ އިތުރު ވެފައިވާ ކަމަށް ތައިވާނުގެ ނޭޝަނަލް ސެކިއުރިޓީ ބިއުރޯ އިން ހާމަކޮށްފައިވެ އެވެ. 

އެ އިދާރާ އިން އާދިއްތަ ދުވަހު ނެރުނު ރިޕޯޓެއްގައިވާ ގޮތުން، 2025 ވަނަ އަހަރު ދުވާލަކު އެވްރެޖުކޮށް 2.63 މިލިއަން ސައިބާ ހަމަލާ ތައިވާނަށް އަމާޒު ވެފައިވެ އެވެ. މިއީ މިފަދަ ތަފާސް ހިސާބުތައް އާންމު ކުރަން ފެށި 2023 ވަނަ އަހަރާ އަޅާ ބަލާއިރު، 113 އިންސައްތަ އިތުރު އަދަދެކެވެ. އެންމެ ބޮޑަށް ހަމަލާތައް އިތުރު ވެފައި ވަނީ ހަކަތަ ފޯރުކޮށްދޭ ނިޒާމު ތަކަށާއި، ކުއްލި ނުރައްކަލުގެ ހާލަތް ތަކުގައި އެހީތެރިވާ އިދާރާ ތަކުގެ އިތުރުން ހޮސްޕިޓަލު ތަކަށެވެ.

ތައިވާނުން ބުނާ ގޮތުގައި މިއީ އެ ގައުމުގެ ސަރުކާރުގެ ހިންގުން ހުއްޓުވާލުމަށާއި، އިޖުތިމާއީ ނިޒާމު ގަޑު ބަޑު ކޮށްލުމަށް ޗައިނާ އިން ގަސްދުގައި ހިންގާ "ހައިބްރިޑް ވޯފެއާ"، ނުވަތަ އެކި ގޮތް ގޮތުން ދޭ ހަމަލާ ތަކެކެވެ. މިގޮތުން ޗައިނާގެ އަސްކަރީ ތަމްރީނުތަކާ ދިމާކޮށް މިފަދަ ސައިބަާ ހަމަލާތައް ވަރުގަދަ ކުރާކަން ފާހަގަ ކުރެވިފައިވާ ކަމަށް ރިޕޯޓުގައިވެ އެވެ.

އެގޮތުން، ޗައިނާ އިން ތައިވާން ކައިރީގައި ހިންގި 40 އަސްކަރީ ހަރަކާތުގެ ތެރެއިން 23 ފަހަރެއްގެ މަތިން ސައިބާ ހަމަލާތައް ވަނީ ވަރަށް ބޮޑަށް އިތުރު ވެފައި އެވެ. މީގެ އިތުރުން ސިޔާސީ ގޮތުން ހައްސާސް ދަނޑި ވަޅުތަކުގައި، ކޮމްޕިއުޓަރު ސިސްޓަމްތައް ހެކު ކުރުން ޗައިނާ އިން އިތުރު ކުރާ ކަމަށް ތައިވާނުން ތުހުމަތު ކުރެ އެވެ.

ތައިވާނުގެ ސެމީ ކޮންޑަކްޓާ ސިނާއަތުގެ މަރުކަޒު ތަކަށް ނުވަތަ "ސައިންސް ޕާކު ތަކަށް" ވެސް ބޮޑެތި ހަމަލާ ތަކެއް އަމާޒު ވެފައިވެ އެވެ. މިކަމުގެ މަގުސަދަކީ ތައިވާނުގެ ކުރި އަރާފައިވާ ޓެކްނޮލޮޖީ ވަގަށް ނަގައި، އެމެރިކާ އާއި ޗައިނާއާ ދެމެދު އޮތް ޓެކްނޮލޮޖީގެ ވާދަވެރިކަމުގައި ޗައިނާ އަށް ކުރިއެރުން ހޯދުން ކަމަށް ތައިވާނުގެ ރިޕޯޓުގައި ބުނެފައިވެ އެވެ.

ޗައިނާ އިން އަބަދު ވެސް މިފަދަ ހަމަލާ ތަކުގައި ބައިވެރިވާ ކަމަށް ކުރެވޭ ތުހުމަތުތައް ދޮގު ކުރެ އެވެ. ނަމަވެސް ތައިވާނަކީ އެ ގައުމުގެ ބައެއް ކަމަށް ދައުވާ ކުރާ ޗައިނާ އިން ބުނަމުން ދަނީ ބޭނުން ވެއްޖެ ހާލަތެއްގައި، ބާރުގެ ބޭނުން ކޮށްގެން ވެސް ތައިވާން އެގައުމުގެ ދަށަށް ގެންނާނެ ކަމަށެވެ. ތައިވާނުން ބުނަނީ އެ ގައުމުގެ މުސްތަގުބަލު ނިންމާނީ އެ ގައުމުގެ ރައްޔިތުން ކަމަށެވެ.