'ވަކިވާން މަސައްކަތްކުރާ ބާރުތަކަށް' ދޭ އިންޒާރެއްގެ ގޮތުގައި ތައިވާން ވަށައިގެން ޗައިނާ އިން އަސްކަރީ ތަމްރީނުތައް ކުރިއަށް ގެންދަނީ

ތައިވާން ވަށައިގެން ޗައިނާ އިން ކުރިއަށް ގެންދާ އަސްކަރީ ތަމްރީނުތަކަކީ 'ވަކިވާން މަސައްކަތްކުރާ ބާރުތަކަށް' ދޭ އިންޒާރެއް ކަމަށް ޗައިނާ އިން ބުނެފި އެވެ.

ޗައިނާއިން ދަނީ ތައިވާންގެ މުހިންމު ސަރަހައްދުތައް ހިފުމަށް ކަންކުރާނެ ގޮތް ދައްކުވައިދޭ އަސްކަރީ ތަމްރީނުތަކެއް ތައިވާން ވަށައިގެން ކުރިއަށްގެންދަމުންނެވެ. މިއީ އެ ގައުމުން 'ވަކިވާން މަސައްކަތްކުރާ ބާރުތަކަށް' ދެވޭ އިންޒާރެއް ކަމަށް ޗައިނާއިން ބުނެއެވެ.

ޗައިނާގެ އަސްކަރިއްޔާ އިން ބުނި ގޮތުގައި، މި ތަމްރީނުތަކުގައި އެ ގައުމުގެ ބިމުގެ ބާރާއި، ކަނޑުގެ ބާރާއި، ވައިގެ ބާރާއި، ރޮކެޓް ބާރުން ބައިވެރިވެފައިވެއެވެ. މި ތަމްރީނުތަކުގެ ތެރޭގައި ހަގީގީ ބަޑީގެ ތަމްރީނުތައް ވެސް ހިމެނެއެވެ.

"ޖަސްޓިސް މިޝަން 2025" ގެ ކޯޑްނޭމް ދީފައިވާ މި ތަމްރީނުތައް ކުރިއަށްގެންދަނީ، އެމެރިކާއިން ތައިވާނަށް 11 ބިލިއަން ޑޮލަރުގެ ގެ ހަތިޔާރު ޕެކޭޖެއް ވިއްކުމަށް އިއުލާނުކުރިތާ ދުވަސްކޮޅެއް ފަހުންނެވެ. އެމެރިކާގެ މި ނިންމުމަށް ބެއިޖިންގ އިން ވަނީ ވަރަށް ބޮޑަށް އިހުތިޖާޖުކޮށްފައެވެ. އަދި އެކަމުގެ ރައްދެއްގެ ގޮތުން އެމެރިކާގެ ދިފާޢީ ކުންފުނިތަކަށް ޗައިނާއިން ވަނީ ދަތިކުރުމުގެ ފިޔަވަޅުތައް އަޅާފައެވެ.

މި އަހަރު ތައިވާނުން އެ ގައުމުގެ ދިފާޢީ ކެޕޭބިލިޓީސް އިތުރުކުރުމަށް ކުރަމުންދާ މަސައްކަތްތަކާ ގުޅިގެން ވެސް ބެއިޖިންގ ވަނީ ހިތްހަމަނުޖެހުން ފާޅުކޮށްފައެވެ. ޗައިނާއިން ދައުވާކުރަނީ ތައިވާނަކީ އެ ގައުމުގެ ސަރަހައްދެއް ކަމަށެވެ.

ތައިވާންގެ ރިޔާސީ އޮފީހުން ވަނީ ޗައިނާގެ މި ތަމްރީނުތަކަށް ފާޑުކިޔާފައެވެ.

ތައިވާންގެ ދިފާޢީ ވުޒާރާއިން ބުނީ، ހޯމަ ދުވަހު ޗައިނާގެ 89 އަސްކަރީ މަތިންދާބޯޓާއި 28 ހަނގުރާމަމަތީ ބޯޓާއި ކޯސްޓްގާޑް ބޯޓު ތައިވާން ކައިރިން ފާހަގަވެފައިވާ ކަމަށެވެ.

އަދި އެ ވުޒާރާއިން ވަކި ބަޔާނެއްގައި ބުނީ، މި ހާލަތާ ގުޅިގެން ކަންކަން ބެލުމުގެ ގޮތުން ތައިވާނުގެ މިސައިލް ސިސްޓަމްތަކާއި އަސްކަރީ ބާރުތައް ބޭނުންކޮށްފައިވާ ކަމަށާއި، ތައިވާން ދިފާޢުކޮށް، އެ ގައުމުގެ ރައްޔިތުން ރައްކާތެރިކުރުމަށްޓަކައި ހުރިހާ ފަރާތްތަކެއް "ހައި އެލާޓް" ގައި ތިބި ކަމަށެވެ.

މި ހަފުތާގައި ކުރިއަށްދާ އަސްކަރީ ތަމްރީނުތަކަކީ، އޮކްޓޯބަރު މަހު އީސްޓަން ތިއޭޓަރ ކޮމާންޑްގެ އާ ޗީފްގެ މަގާމާ ހަވާލުވި ޔަންގް ޒިބިންގެ ބެލުމުގެ ދަށުން ބާއްވާ ފުރަތަމަ ތަމްރީނުތަކެވެ.

ތައިވާނުން ވެސް އަމިއްލަ އަސްކަރީ ތަމްރީނުތައް ކުރިއަށްގެންދެއެވެ. އެއީ ހަމަލާއަކަށް ރައްޔިތުން ތައްޔާރަށް ބޭތިއްބުމަށާއި، ބެއިޖިންގ އަށް އެ ގައުމުގެ ދިފާޢީ ބާރުތައް ދެއްކުމުގެ ގޮތުންނެވެ. މި އަހަރު ބޭއްވި "ހަން ކުއަންގ" ތަމްރީނުތައް 10 ދުވަހަށް ދެމިގެން ދިޔައިރު، އެއީ މިހާތަނަށް ބޭއްވުނު އެންމެ ބޮޑު އަދި އެންމެ ދިގު ތަމްރީނުތަކެވެ.

ރައީސް ލައި މަގާމާ ހަވާލުވި ފަހުން، ބެއިޖިންގ އާ ދެމެދު ހިނގަމުންދާ ހަމަނުޖެހުންތަކާ އެކު، ދިފާޢީ ޚަރަދު އިތުރުކުރުމަށާއި، ތައިވާންގެ ދިފާޢީ ކެޕޭބިލިޓީސް މަތިކުރުމަށް އޭނާ ވަނީ ވައުދުވެވަޑައިގެންފަ އެވެ.

އޮކްޓޯބަރު މަހު ތައިވާންގެ ރައީސް ވަނީ "އަދުއްވުންގެ ހަމަލާތަކުން" ރައްކާތެރިވުމަށްޓަކައި، ވައިގެ ދިފާޢީ ނިޒާމެއް ބިނާކުރުމަށް އިއުލާނުކުރައްވާފައެވެ. ނަމަވެސް އެމަނިކުފާނު ސީދާ ޗައިނާގެ ނަން ވިދާޅެއް ނުވެއެވެ.