ތައިވާނާއި ޗައިނާ ގުޅާލުމަކީ ހުއްޓުވޭނެ ކަމެއް ނޫން ކަމަށް ރައީސް ޝީ ވިދާޅުވެއްޖެ

ތައިވާނަކީ ޗައިނާގެ ބައެއްގެ ގޮތުގައި އަލުން ހަމަޖެއްސުމަކީ ("ރީޔުނިފިކޭޝަން") އެގައުމުގެ ޒަމާންވީ އަދި ބަދަލުނުވާނެ އަމާޒެއް ކަމަށާއި، އެކަން ހުއްޓުވުމަކީ އެއްވެސް ބަޔަކަށް ކުރެވޭނެ ކަމެއް ނޫން ކަމަށް ޗައިނާގެ ރައީސް ޝީ ޖިންޕިންގް ވިދާޅުވެއްޖެ އެވެ.

ޗައިނާގެ އަސްކަރިއްޔާ އިން ތައިވާން ސަރަހައްދުގައި ކުރިއަށްގެންދިޔަ ވަރުގަދަ ތަމްރީނުތަކަށް ފަހު، އައު އަހަރުގެ މުނާސަބަތުގައި ދެއްވި ހިތާބުގައި ޝީ ވިދާޅުވީ، ތައިވާން ކަނޑުއޮޅީގެ ދެފަރާތުގައި ތިބި ރައްޔިތުންނަކީ ލޭގެ ގުޅުމަކުން ގުޅިފައިވާ ބައެއް ކަމަށެވެ. "މާދަރީ ވަތަނާ އަލުން ގުޅި ލާމެހުމަކީ ޒަމާނުގެ އޮއިވަރާ އެކު އަންނަ ބަދަލެއް، އެއީ ހުއްޓުވޭނެ ކަމެއް ނޫން،" ޝީ ވިދާޅުވިއެވެ.

މީގެ އިތުރުން، ދެވަނަ ބޮޑު ހަނގުރާމައަށް ފަހު ޖަޕާނުގެ އިސްތިއުމާރުން ތައިވާން މިނިވަންވި ދުވަސް ފާހަގަކުރުމުގެ ގޮތުން، 2025 ވަނަ އަހަރުން ފެށިގެން ކޮންމެ އަހަރަކު "ތައިވާން ރިކަވަރީ ޑޭ" ފާހަގަކުރަން ނިންމާފައިވާކަން ވެސް އޭނާ އިއުލާނު ކުރެއްވިއެވެ.

ޝީގެ މި ވާހަކަފުޅު އައިސްފައި ވަނީ، ތައިވާން ވަށާލައި ހިސޯރުކުރާނެ ގޮތްތަކުގެ މައްޗަށް ބިނާކޮށް ޗައިނާއިން ކުރިއަށްގެންދިޔަ ދެ ދުވަހުގެ އަސްކަރީ ތަމްރީނުތަކަށް ފަހުގައެވެ. ޗައިނާގެ އޮފިޝަލުން ސިފަކުރި ގޮތުގައި މިއީ ވަކިވެގަތުމަށް މަސައްކަތްކުރާ ފަރާތްތަކަށާއި ބޭރުގެ ނުފޫޒުތަކަށް ދިން "ވަރުގަދަ އިންޒާރެއް" ކަމަށެވެ. "ޖަސްޓިސް މިޝަން 2025" ގެ ނަމުގައި ހިންގި މި ހަރަކާތްތަކަކީ ތައިވާނުގެ ސަރަހައްދުގައި މިހާތަނަށް ހިންގި އެންމެ ބޮޑު އަސްކަރީ ތަމްރީނުތަކެވެ.

މި ތަމްރީނުތައް ބާއްވާފައިވަނީ ތައިވާނަށް 11.1 ބިލިއަން ޑޮލަރުގެ ހަތިޔާރު ވިއްކުމަށް އެމެރިކާއިން ނިންމި ނިންމުމަށް ފަހުގައެވެ. ޗައިނާއިން ދެކޭގޮތުގައި ތައިވާނަކީ އެގައުމުގެ ސަރަހައްދީ އިމުގެ ތެރޭގައި ހިމެނޭ ބައެކެވެ. އަދި ބޭނުންވެއްޖެ ހާލަތެއްގައި ބާރުގެ ބޭނުންކޮށްގެން ނަމަވެސް ތައިވާން ޗައިނާގެ ދަށަށް ގެންނާނެ ކަމަށް ވަނީ މީގެ ކުރިން ބުނެފައެވެ. ނަމަވެސް، ތައިވާނުގައި ވެރިކަންކުރާ ޑިމޮކްރެޓިކް ޕްރޮގްރެސިވް ޕާޓީން ގަބޫލުކުރާ ގޮތުގައި އެއީ މިނިވަން ދައުލަތެކެވެ.

ތައިވާނުގެ ރައީސް ވިލިއަމް ލައި ޗިން-ތޭ އައު އަހަރުގެ ހިތާބުގައި ވިދާޅުވީ، ގައުމީ ސިޔާދަތު ދަމަހައްޓައި ދިފާއީ ބާރު ވަރުގަދަ ކުރުމުގައި ސާބިތުވެ ހުންނަވާނެ ކަމަށެވެ. "ޗައިނާގެ ނުފޫޒު ގަދަކުރުމުގެ އަމާޒުތަކާ ކުރިމަތިލާއިރު، ތައިވާނުގެ ރައްޔިތުން އަމިއްލަ ނަފްސު ދިފާއުކުރުމުގެ އަޒުމް ހުރި މިންވަރު މުޅި ބައިނަލްއަގުވާމީ މުޖުތަމައުން ދަނީ ބަލަމުން،" ލައި ވިދާޅުވިއެވެ.

ތައިވާނަކީ އަމިއްލަ ވެރިކަމެއް، އަސްކަރިއްޔާ އެއް، ޕާސްޕޯޓެއް އަދި ފައިސާއެއް އޮންނަ ތަނެއް ކަމުގައި ވިޔަސް، ދުނިޔޭގެ ގައުމުތަކުގެ ތެރެއިން ތައިވާން ބަލައިގަންނަނީ އެންމެ 11 ގައުމަކާއި ވެޓިކަން ސިޓީންނެވެ. ޗައިނާއިން ބާރުއަޅަނީ ބައިނަލްއަގުވާމީ ގައުމުތަކުން ތައިވާނަކީ ވަކި ދައުލަތެއްގެ ގޮތުގައި ބަލައި ނުގަތުމަށެވެ.

އެމެރިކާ އިން ތައިވާނަކީ މިނިވަން ދައުލަތެއްގެ ގޮތުގައި ރަސްމީކޮށް ބަލައިނުގަތް ކަމުގައި ވިޔަސް، 1979 ވަނަ އަހަރުގެ "ތައިވާން ރިލޭޝަންސް އެކްޓް" ގެ ދަށުން ތައިވާނުގެ ދިފާއަށް އެހީތެރިވުމަށް އެގައުމުން ވަނީ ކަނޑައަޅާފަ އެވެ. ނަމަވެސް، ޗައިނާއިން ތައިވާނަށް ހަމަލާދީފި ހާލަތެއްގައި އެމެރިކާގެ އަސްކަރިއްޔާއިން ސީދާ އެ ހަނގުރާމައިގެ ތެރެއަށް ވަންނާކަށް ގާނޫނީ ލާޒިމުކަމެއް އެމެރިކާއަކަށް ނެތެވެ.

އާންމު ހިޔާލު ހޯދުމުގެ ސާވޭތަކުން ދައްކާގޮތުގައި ތައިވާނުގެ ގިނަ ރައްޔިތުން ބޭނުންވަނީ މިހާރު އޮތް ހާލަތު (ސްޓޭޓަސް ކޯ) ބަދަލުނުވެ ދެމިއޮތުމަށެވެ.