އީރާނުގެ ވޯލްޑް ކަޕް ޓީމަށް ކުރިމަތިކޮށްފައިވާ ހުރަސްތަކާ ގުޅޭގޮތުން ވައިޓް ހައުސްއިން މަޝްވަރާކުރަނީ

2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގައި އީރާނުގެ ޓީމަށް ކުރިމަތިވެފައިވާ ދަތުރުފަތުރުގެ ހަރުކަށި ހުރަސްތަކަށް ބަދަލު ގެނައުމާ މެދު އެމެރިކާގެ ވައިޓް ހައުސްއިން ދަނީ ވިސްނަމުން ކަމަށް ރިޕޯޓުތައް ބުނެފިއެވެ.

ކެނެޑާ އާއި މެކްސިކޯއާ ގުޅިގެން މުބާރާތް ބާއްވާ އެމެރިކާއަށް އީރާނުގެ ޓީމަށް އެމެރިކާ އަށް އެތެރެވުމުގެ ހުއްދަ ދީފައިވަނީ ވިސާގެ ޚާއްސަ ޝަރުތުތަކެއްގެ ދަށުންނެވެ. އެގޮތުން މެޗު އޮންނަ ދުވަހުގެ އެއް ދުވަސް ކުރިން އެމެރިކާއަށް އެތެރެވުމަށާއި، މެޗު ނިމޭ ދުވަހު އެ ގައުމުން ފުރައިގެން ދާންޖެހޭ ގޮތަށް ވަނީ ޝަރުތުކޮށްފައެވެ.

މި ހަރުކަށި އުސޫލުތަކާ ގުޅިގެން، ލޮސް އެންޖެލިސްގައި ނިއުޒީލެންޑާ ދެކޮޅަށް ކުޅުނު ފުރަތަމަ މެޗު 2-2 އިން އެއްވަރުވުމަށްފަހު، އީރާނުގެ ހެޑް ކޯޗު އާމިރު ގަލެނޯއީ ބުނެފައިވަނީ އެ ޓީމަކީ މި މުބާރާތުގައި އޮތް "އެންމެ ބޮޑަށް އަނިޔާ ލިބެމުންދާ" ޓީމު ކަމަށެވެ.

ނަމަވެސް، ވައިޓް ހައުސްގެ ވޯލްޑް ކަޕް ޓާސްކް ފޯހުގެ އެގްޒެކެޓިވް ޑައިރެކްޓަރު އެންޑްރޫ ޖޫލިއާނީ ވިދާޅުވީ، ޖޫން 27 ވަނަ ދުވަހު ސިއެޓްލްގައި މިސްރާ ދެކޮޅަށް ކުޅޭ ގްރޫޕްގެ ތިންވަނަ މެޗަށް ދަތުރުކުރުމުގައި އަމަލުކުރާނެ ވަގުތުތަކާ ގުޅޭގޮތުން މިހާރު "މަޝްވަރާތައް ކުރިއަށްދާ" ކަމަށެވެ.

އީރާނު ޓީމު މުބާރާތުގެ ތެރޭގައި މަޑުކޮށްގެން ތިބީ މެކްސިކޯގައެވެ. ޖޫލިއާނީ ވިދާޅުވީ ލޮސް އެންޖެލިސްގައި ކުޅުނު ފުރަތަމަ ދެ މެޗަށް ދަތުރުކުރުމުގައި ހަރުކަށި އުސޫލުތަކެއް ގެންގުޅުމަކީ އެކަށީގެންވާ ކަމެއް ކަމަށެވެ. އެއީ އެ ސިޓީއަށް ކުރަންޖެހެނީ 30 މިނެޓުގެ ކުރު ފްލައިޓެއް ކަމަށްވާތީއެވެ. އެހެންނަމަވެސް، ސިއާޓްލްއަށް ކުރަންޖެހޭ ދަތުރަކީ ތިން ގަޑިއިރުގެ ދިގު ދަތުރަކަށް ވާތީ، އެ ދަތުރުގެ އުސޫލުތަކަށް ބަދަލު ގެނައުމަށް "މަޝްވަރާ ކުރަމުންދާ" ކަމަށް އޭނާ ވިދާޅުވިއެވެ.

ސިއާޓްލްގެ ލޯކަލް ނިއުސް ސްޓޭޝަނެއް ކަމަށްވާ "ކޯމޯ ޓީވީ ނިއުސް" އަށް ދެއްވި އިންޓަވިއުއެއްގައި ޖޫލިއާނީ ވިދާޅުވީ، ގައުމީ ސަލާމަތަށް ނުރައްކާނުވާނެ ގޮތަށް ބަލައިގެން، ދަނޑުމަތީގައި ޓީމުތަކުގެ މެދުގައި އޮންނަ ވާދަވެރިކަމުގެ ހަމަހަމަކަން ގާއިމުކުރުމަށް ރައީސް ބޭނުންފުޅުވާ ކަމަށެވެ.

އޭނާ އިތުރަށް ވިދާޅުވީ، އީރާނު ޓީމަށް އެމެރިކާއަށް އައިސް މުބާރާތުގައި ވާދަކުރުމުގެ ފުރުސަތު އޮތްކަން ޔަގީންކޮށްދިނުމުގައި ރައީސް ޑޮނަލްޑް ޓްރަމްޕް ކުރެއްވި މަސައްކަތްޕުޅު ފާހަގަކުރަންޖެހޭ ކަމަށެވެ.

އީރާނު ޓީމަށް އެމެރިކާއަށް އެތެރެވެ ވޯލްޑް ކަޕްގައި ކުޅުމުގެ ހުއްދަ ދިނުމަށް ރައީސް ޓްރަމްޕް ވަނީ ރިޔާސީ ގަރާރެއްގައި ސޮއިކުރައްވާފައެވެ. އެގޮތުން އެ ޓީމުން މިހާރު ލޮސް އެންޖެލިސްގައި ކުޅެފައިވާއިރު، މި މަހުގެ 21 ވަނަ ދުވަހު ވެސް އެ ސިޓީގައި އެ ޓީމުގެ މެޗެއް އޮންނާނެއެވެ.

އީރާނުން ބުނަމުންދަނީ، ޓީމުގެ ފިޒިކަލް އަދި ޓެކްނިކަލް ތައްޔާރީތައް އެންމެ ފުރިހަމައަށް ކުރިއަށް ގެންދިއުމަށްޓަކައި، ކޮންމެ މެޗެއްގެ ދެ ދުވަސް ކުރިން އެ ސިޓީއަކަށް ދިއުމުގެ ހުއްދަ އާއި، މެޗު ނިމޭ ފަހު ދުވަހު އެނބުރި ކޭމްޕަށް ދިއުމުގެ ހުއްދަ ލިބެންޖެހޭނެ ކަމަށެވެ.

އީރާނުގެ ގައުމީ ޓީމުން ބީބީސީއަށް މައުލޫމާތު ދެމުން ބުނެފައިވަނީ، މިފަދަ ހުރަސްތަކަކީ މުބާރާތުގައި ބައިވެރިވާ ހުރިހާ ޓީމުތަކަށް ހަމަހަމަ ފުރުސަތު ދިނުމުގެ އުސޫލާ ޚިލާފު ކަމެއް ކަމަށާއި، މީގެ ސަބަބުން ޓީމުގެ ތައްޔާރީތަކަށް ނޭދެވޭ އަސަރު ކުރާނެ ކަމަށް އެ ގައުމުގެ ފުޓްބޯޅަ ފެޑަރޭޝަނުން ގަބޫލުކުރާ ކަމަށެވެ.

އެހެންކަމުން، މިކަމާ ގުޅޭގޮތުން ރަސްމީކޮށް ނުރުހުން ފާޅުކޮށް، ކަނޑައެޅިފައިވާ އުސޫލުތަކުގެ ތެރެއިން ފީފާއަށް ރަސްމީ ޝަކުވާއެއް ހުށަހަޅާނެ ކަމަށް ވެސް އީރާނުން ބުނެފައިވެއެވެ.

އީރާނުގެ ދެން އޮތް މެޗުގައި އަންނަ އާދީއްތަ ދުވަހު ބީ.އެސް.ޓީ ގަޑިން 20:00 ގައި ލޮސް އެންޖެލިސްގެ އިންގްލްވުޑްގައި ބައްދަލުކުރާނީ ބެލްޖިއަމްއާއެވެ.