ހީވެސް ނުކުރާފަދަ ބޮޑު ބައްޔަކުން ގަތަރު ކެނެޑާ އަތުން ބަލިވެއްޖެ

ބުރާސްފަތި ދުވަހު ކެނެޑާއާ ދެކޮޅަށް ގަތަރު ކުޅުނު ވޯލްޑް ކަޕް މެޗުން އެ ގައުމު ބަލިވީ ހީވެސް ނުކުރާހާ ދަށް ނަތީޖާއަކުން ކަމަށްވުމުން، މެޗު ނިމުމާއެކު ގަތަރުގެ ގޯލްކީޕަރު މަހްމޫދު އަބޫނަދާ ދަނޑުމަތީގައި ރޮއި، ހިތާމަފާޅުކޮށްފައެވެ. އޭނާއަށް ހިތްވަރު ދިނުމުގައި ގަތަރުގެ ޓީމުގެ ކުޅުންތެރިއެއްގެ އިތުރުން ކެނެޑާގެ ޖޭކޮބް ޝަފެލްބާގް ބައިވެރިވެފައިވެއެވެ.

މި މެޗާ ގުޅޭގޮތުން ވާހަކަދައްކަމުން ގަތަރުގެ ކޯޗު ހޫލެން ލޮޕެޓެގީ ބުނީ، މިއީ ވަރަށް އުނދަގޫ މެޗެއް ކަމަށާއި، މެޗުގައި ގޯސްކޮށް ދާނެ ހުރިހާ ކަމެއް ދިޔައީ ގޯސްކޮށް ކަމަށެވެ. އަދި ފުޓްބޯޅައިގައި ބައެއް ފަހަރު ކަންތައްތައް ދިމާވަނީ މިފަދަ ގޮތަކަށް ކަމަށްވެސް އޭނާ ފާހަގަކުރިއެވެ.

މެޗުގެ ދެވަނަ ހާފުގެ ބޮޑު ބައެއްގައި ގަތަރުން ކުޅުނީ ދެ ކުޅުންތެރިން މަދުކޮށް، ދެ ރަތް ކާޑާއެކުގައެވެ. މި މެޗުން 6-0 ގެ ނަތީޖާއަކުން ގަތަރު ބަލިވިއިރު، މިއީ ގަލްފުގެ މި ގައުމުގެ ކުރު ވޯލްޑް ކަޕް ތާރީޚުގައި ކުރިމަތިވި އެންމެ ބޮޑު ބައްޔެވެ. 2022 ވަނަ އަހަރު ބޭއްވި ވޯލްޑް ކަޕްގެ ބާނީގެ ގޮތުގައި ފުރަތަމަ ފަހަރަށް މުބާރާތުގައި ވާދަކޮށް، ގަތަރު ވަނީ އިކުއެޑޯ އަތުން 2-0 އިން، ސެނެގާލް އަތުން 3-1 އިން އަދި ނެދަލޭންޑްސް އަތުން 2-0 އިން ބަލިވެފައެވެ.

މެޗުގައި ދެއްކި ދެވަނަ ރަތް ކާޑު ދެއްކީ ގަތަރުގެ މިޑްފީލްޑަރު އާސިމް މަދީބޯ އަށެވެ. އޭނާ ކެނެޑާގެ އިސްމާއިލް ކޯނޭގެ ފަހަތުން ކުރި ނުރައްކާތެރި ޓެކްލްގެ ސަބަބުން ކޯނޭގެ ވައަތު ފައިގެ ތިރީ ކަށިގަނޑު ވަނީ ބިންދައިގެން ގޮސްފައެވެ. އަނިޔާގެ ސަބަބުން ކޯނޭ ދަނޑުން ބޭލީ ސްޓްރެޗަރުގައެވެ. އޭނާ ވަނީ ސާޖަރީ ހެދުމަށްޓަކައި ވަގުތުން ހޮސްޕިޓަލަށް ގެންގޮސްފައެވެ.

ކޯނޭގެ ބަދަލުގައި ކުޅެން އެރި ނޭތަން ސަލީބާ ވަނީ މެޗުގެ 64 ވަނަ މިނެޓުގައި 20 ޔާޑު ދުރުން ލިބުނު ހިލޭ ޖެހުމަކުން ގޯލެއް ކާމިޔާބުކޮށް، ކެނެޑާގެ ހަތަރުވަނަ ލަނޑު ޖަހައިދީފައެވެ.

ގޯލްކީޕަރު އަބޫނަދާ ދިފާއުކުރި ދެ ބޯޅައެއް ސާފުކޮށްލުމުގައި ގަތަރުގެ ޑިފެންޑަރުންނަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. މުޅި މެޗުގައި ކެނެޑާއިން ގޯލަށް އަމާޒުކޮށް 10 ހަމަލާ ފޮނުވާލިއިރު، ގަތަރަށް ކެނެޑާގެ ގޯލަށް އަމާޒުކޮށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ.

މެޗުގައި އެންމެ ފުރަތަމަ ރަތް ކާޑު ދައްކައި ދަނޑުން ފޮނުވާލީ ގަތަރުގެ މޮޅު ލެފްޓް ބެކް ހުމާމް އަހުމަދެވެ. މެޗުގެ 33 ވަނަ މިނެޓުގައި އޭނާއަށް ދެއްކި ރީނދޫ ކާޑު، ވީއޭއާރު ބެލުމަށްފަހު ވަނީ ރަތް ކާޑަކަށް ބަދަލުކޮށްފައެވެ.

ކޯޗު ލޮޕެޓެގީ ބުނީ، ތަފާތު ސަބަބުތަކާ ހުރެ މިއީ ވަރަށް އުނދަގޫ މެޗެއް ކަމަށާއި، ނަމަވެސް ކުޅުންތެރިން އެމީހުންގެ އެންމެ ފުރިހަމަ މަސައްކަތް ކުރި ކަމަށެވެ. އަދި މިފަދަ މާހައުލެއްގައި ދެ ކުޅުންތެރިން މަދުކޮށް ކުޅެން ޖެހުމަކީ ކުރިމަތިވި ވަރަށް ބޮޑު ގޮންޖެހުމެއް ކަމަށް އޭނާ ފާހަގަކުރިއެވެ.

މެޗު ނިމުމަށްފަހު ކެނެޑާގެ ކުޅުންތެރިން އެއްވެ ތިއްބައި، ގަތަރުގެ ކޯޗު ލޮޕެޓެގީ އާއި ކެނެޑާގެ ކޯޗު ޖެސީ މާޝްއާ ދެމެދު ހޫނު ބަހުގެ ހަމަލާތަކެއް ބަދަލުކުރެވުނެވެ.

މާޝް ބުނި ގޮތުގައި، މެޗަށްފަހު މަދީބޯ ވަނީ ކޯނޭގެ ކިބައިން މައާފަށް އެދިފައެވެ. ނަމަވެސް، ކޯނޭއަށް އަނިޔާވި ވަގުތު ގަތަރުގެ ކުޅުންތެރިން އަމަލުކުރި ގޮތާމެދު އޭނާ ހިތްހަމަނުޖެހުން ފާޅުކުރިއެވެ.

މާޝް ބުނީ، ކުޅުންތެރިއެއްގެ ފައި ބިންދައިގެންދާ ފަދަ ނުރައްކާތެރި ފައުލެއް ހިނގާފައި ވަނިކޮށް، އެއީ ރަތް ކާޑެއް ނޫން ކަމަށް ބުނެ ގަތަރުގެ ބެންޗުގައި ތިބި ހުރިހާ އެންމެން ތެދުވެ ޒުވާބުކޮށް، މާރާމާރީ ހިންގަން އުޅުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެއީ ވަރަށް އާދަޔާ ހިލާފު ދަށު ދަރަޖައިގެ އަމަލެއްގެ ގޮތުގައި އޭނާ ސިފަކުރިއެވެ.

މި ނަތީޖާއާއެކު ގަތަރު އޮތީ ގްރޫޕް ބީގެ އެންމެ ފުލުގައެވެ. ނަމަވެސް، ނޮކައުޓް ބުރަށް ދިއުމުގެ ފުރުސަތު އަދިވެސް އެ ގައުމަށް އެބައޮތެވެ. ގަތަރުގެ ކުރިއަށް އޮތް މެޗުގައި ބުދަ ދުވަހު ސިއާޓްލްގައި ބައްދަލުކުރާނީ ބޮސްނިއާ އެންޑް ހެރްޒެގޮވިނާއާއެވެ.