ޗެއަރޕަރސަންގެ އިންތިޚާބުގެ ވަގުތީ ނަތީޖާ އާންމުކޮށްފި: ނަޝީދު ވަނީ 11،839 ވޯޓުގެ ތަފާތަކުން ކުރި ހޯއްދަވާފައި
އެމްޑީޕީގެ ޗެއަރޕަރސަން ހޮވުމަށް ބޭއްވި އިންތިޚާބުގެ ވަގުތީ ނަތީޖާ ދައްކާގޮތުން، 11،839 ވޯޓުގެ ބޮޑު ތަފާތަކުން މީކާއީލް އަހުމަދު ނަސީމް ބަލިކުރައްވައި ކުރީގެ ރައީސް މުޙައްމަދު ނަޝީދު ވަނީ ކުރި ހޯއްދަވާފައި. މި އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ ތެރެއިން 31،129 މީހުން ވޯޓުލާފައިވާއިރު، މިއީ ޕާޓީގެ ހިންގުން ހަރުދަނާކުރުމަށް ބޭއްވުނު މުހިންމު އިންތިޚާބެއް.
ޗެއާޕާސަން އިންތިޚާބުގެ ކާމިޔާބު ފާހަގަ ކުރުމަށް ބޭއްވި އިވެންޓުގައި އެމްޑީޕީގެ ދިދަ އާއެކު ރައީސް ނަޝީދު. | ވިރާސީި
އެމްޑީޕީގެ ޗެއަރޕަރސަން ހޮވުމަށް ބޭއްވި އިންތިޚާބުގެ ވަގުތީ ނަތީޖާ އިޢުލާނުކޮށްފައިވާއިރު، ބޮޑު ތަފާތަކުން ކުރީގެ ރައީސް މުޙައްމަދު ނަޝީދު ވަނީ ކުރި ހޯއްދަވާފައެވެ.
ހުކުރު ދުވަހު ބޭއްވި އިންތިޚާބުގެ ވަގުތީ ނަތީޖާ ދައްކާގޮތުން ރައީސް ނަޝީދަށް ވަނީ އިންތިޚާބުގައި ވޯޓުލީ މީހުންގެ ބޮޑު އަޣުލަބިއްޔަތެއް ލިބިވަޑައިގެންފައެވެ.
މި އިންތިޚާބުގެ ވަގުތީ ނަތީޖާ ދައްކާގޮތުން ކުރީގެ ރައީސް މުޙައްމަދު ނަޝީދަށް ޖުމުލަ 21،301 ވޯޓު ލިބިވަޑައިގެންފައިވެއެވެ. ރައީސް ނަޝީދާ ވާދަކުރެއްވި ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމަށް ލިބިވަޑައިގެންފައިވަނީ 9،462 ވޯޓެވެ. މިއާއެކު ރައީސް ނަޝީދު ވަނީ މީކާއީލްގެ މައްޗަށް 11،839 ވޯޓުގެ ބޮޑު ތަފާތަކުން ކުރި ހޯއްދަވާފައެވެ.
މި އިންތިޚާބުގައި ވޯޓުލުމުގެ ޙައްޤު 50،000 އަށް ވުރެ ގިނަ މީހުންނަށް ލިބިފައިވާއިރު، އޭގެ ތެރެއިން ވޯޓުލާފައިވަނީ ޖުމުލަ 31،129 މީހުންނެވެ. މިއީ ވޯޓުލުމުގެ ޙައްޤު ލިބިގެންވާ މީހުންގެ ނިސްބަތުން ބަލާއިރު ފާހަގަކޮށްލެވޭ ފަދަ ބޮޑު އަދަދެކެވެ.
އިންތިޚާބުގެ ތަފާސްހިސާބުތަކަށް ބަލާއިރު، ވޯޓުލީ މީހުންގެ ތެރެއިން ސައްޙަ ވޯޓުގެ ގޮތުގައި ގުނާފައިވަނީ 30،895 ވޯޓެވެ. އަދި އެކި ސަބަބުތަކާ ހުރެ ބާތިލު ވޯޓުގެ ގޮތުގައި 234 ވޯޓު ވަނީ ކަނޑައަޅާފައެވެ.
މި އިންތިޚާބަކީ ކުރިއަށް އޮތް ދައުރަށް ޕާޓީގެ ހިންގުން ހަރުދަނާކުރުމަށާއި، ސިޔާސީ ގޮތުން ކުރިއަށް ހުރި މަސައްކަތްތައް ރޭވުމަށްޓަކައި ބޭއްވުނު މުހިންމު އިންތިޚާބެކެވެ. އިންތިޚާބުގެ ވަގުތީ ނަތީޖާ އިޢުލާނުކުރުމާއެކު، ރައީސް ނަޝީދަށް ތާއީދުކުރާ ފަރާތްތަކުން އަންނަނީ އުފާފާޅުކުރަމުންނެވެ.
