އެމްބިއުލާންސްގެ ޚިދުމަތް ހޯދުމަށް ވެސް ރައްޔިތުން މިއަދު އުފުލަން ޖެހެނީ ތަކުލީފު!

ސިއްހީ ނިޒާމަކީ ކޮންމެ ގައުމެއްގައި ވެސް ރައްޔިތުންގެ ފުރާނައާ ގުޅިފައިވާ އެންމެ މުހިންމު އެއް ޚިދުމަތެވެ. ވަކިން ޚާއްސަކޮށް، ކުއްލި ނުރައްކަލުގެ ހާލަތްތަކުގައި ބަލި މީހުން ހޮސްޕިޓަލަށް ގެންދިއުމަށް ބޭނުންކުރާ އެމްބިއުލާންސްގެ ޚިދުމަތަކީ އެއްވެސް މެދުކެނޑުމެއް ނެތި، ލުއިފަސޭހަކަމާއެކު ލިބެންޖެހޭނެ ޚިދުމަތެކެވެ. ނަމަވެސް، މިއަދު ރާއްޖޭގެ، ޚާއްސަކޮށް މާލެ ސަރަހައްދުގެ ހާލަތަށް ބަލާއިރު، މި އަސާސީ ޚިދުމަތް ހޯދުމަށް ރައްޔިތުން އުފުލަންޖެހޭ ތަކުލީފުތައް ވަނީ އިންތިހާއަށް އިތުރުވެފައޭ ބުންޏަސް ދޮގަކަށް ނުވާނެ އެވެ. 

ނަމަވެސް ސަރުކާރުގެ ސިއްހީ ޚިދުމަތްތައް ހަރުދަނާކޮށް، ވަށާޖެހޭ ގޮތެއްގައި ހިންގުމަށްޓަކައި މާލެ ސަރަހައްދުގެ ހުރިހާ ސަރުކާރު ހޮސްޕިޓަލްތަކެއް ވަނީ 'މާލެ ސިޓީ ގްރޫޕް އޮފް ހޮސްޕިޓަލްސް' ގެ ދަށަށް ބަދަލުކޮށްފަ އެވެ. މީގެ ތެރޭގައި އައިޖީއެމްއެޗް، ދަރުމަވަންތަ ހޮސްޕިޓަލް، ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލް ހިމެނެ އެވެ. މި ބަދަލުގެ މައިގަނޑު މަގުސަދަކީ އެއް ފުރާޅެއްގެ ދަށުން، ވަސީލަތްތައް ހަމަހަމަކޮށް ރައްޔިތުންނަށް ފެންވަރު ރަނގަޅު ޚިދުމަތެއް ފޯރުކޮށްދިނުމެވެ. ނަމަވެސް، އަމަލީ ގޮތުން ކަން ހިނގަމުންދާ ގޮތަށް ބަލާއިރު، މި ނިޒާމުގެ ތެރެއިން ރައްޔިތުންނަށް ލިބެންޖެހޭ ފަސޭހަކަމެއް ނުލިބޭކަން ފާހަގަކުރެވެ އެވެ.

އެގޮތުން އެމްބިއުލާންސް ހޯދުމުގެ ދަތިތަކާއި ހުރަސްތައް ވަރަށް ބޮޑަށް ކުރިމަތިވަމުންދާކަން ފާހަގަކުރެވެ އެވެ. އެމްބިއުލާންސްގެ ޚިދުމަތް ހޯދުމުގައި ވަރަށް ހަމަނުޖެހޭ އުސޫލެއް ގާއިމްކޮށްފައިވާ ކަމަށް ބުނެ ގިނަ ރައްޔިތުން ދަނީ ޝަކުވާ ކުރަމުންނެވެ. 

މިކަން ދިމާވި މީހަކު ރާއްޖެއެމްވީއަށް ހިއްސާކުރި މައުލޫމާތަށް ބަލާއިރު، ހުޅުމާލޭގައި ދިރިއުޅޭ މީހަކު ބަލިވެގެން އައިޖީއެމްއެޗަށް ގެންދަން ބޭނުންވި ނަމަވެސް، އެ ހޮސްޕިޓަލުން އެމްބިއުލާންސް ފޮނުވައިނުދޭ މައްސަލަ އޭނާ ފާހަގަކުރި އެވެ. އައިޖީއެމްއެޗުން އަންގަނީ ހުޅުމާލޭގައި އުޅޭނަމަ ހުޅުމާލެ ހޮސްޕިޓަލަށް ގުޅުމަށް ކަމަށާއި، ހުޅުމާލެ ހޮސްޕިޓަލުގެ އެމްބިއުލާންސްގައި ބަލިމީހާ ގެންދެވެނީ ހަމައެކަނި އެ ހޮސްޕިޓަލަށް ކަމަށް ބުނެފައިވާ ކަމަށެވެ.

މި ހާދިސާއާ ގުޅިގެން މިއީ އެމްބިއުލާންސްގެ ޚިދުމަތް ދޭ ގޮތްތޯ މާލެ ސިޓީ ގްރޫޕް އޮފް ހޮސްޕިޓަލްސް އަދި އައިޖީއެމްއެެޗްގައި ސުވާލުކުރި ނަމަވެސް ޖަވާބެއް ނުލިބިފައިނުވެ އެވެ. 

މިއީ ހިނގި ހާދިސާއަކަަށްވާއިރު، މިގޮތަށް މިކަން ހިނގާ ކަމަށްވާނަމަ މިއީ ރައްޔިތުންނަށް ލިބޭ އިތުރު ތަކުލީފެއްނުންތޯ އެވެ.

އެއް މެނޭޖްމަންޓެއްގެ ދަށުން ހިންގާ ހޮސްޕިޓަލްތަކަކަށް ވާއިރު، ބަލިމީހާގެ ހާލަތަށް ބަލައި އޭނާ ދާން ބޭނުންވާ ނުވަތަ ފަރުވާ ލިބެން ހުރި ހޮސްޕިޓަލަކަށް ގެންގޮސްނުދެވުމަކީ ބަލައިގަނެވޭނެ ކަމެއް ނޫނެވެ. އަދި ކުއްލި ހާލަތްތަކުގައި ސަރުކާރުގެ އެމްބިއުލާންސް ނުލިބިގެން، ބޮޑު އަގުދައްކައިގެން އަމިއްލަ ވަސީލަތްތަކުގައި ބަލިމީހުން އުފުލަން ޖެހުމަކީ ރައްޔިތުންނަށް ހައްގު މިންވަރެއް ނޫނެވެ.

ފަހަކަށް އައިސް ސިއްހީ ދާއިރާގައި ހިނގަމުންދާ އިހުމާލުގެ މައްސަލަތަކާއި، އެކަށީގެންވާ ފިޔަވަޅު ނޭޅުމުގެ ސަބަބުން ރައްޔިތުންގެ އިތުބާރު ވަނީ ވަރަށް ބޮޑަށް ގެއްލިފަ އެވެ. އެމްބިއުލާންސް ލަސްވުމުގެ ސަބަބުންނާއި، އެކަށީގެންވާ ފަރުވާ ނުލިބުމުގެ ސަބަބުން ބައެއް ފަރާތްތަކުގެ ފުރާނަ ގެއްލިފައިވާ ހާދިސާތައް ވެސް ހިނގާފައިވާ ކަމަށް ގިނަ ބަޔަކު ތުހުމަތު ކުރެ އެވެ. އަދި މި ސަރުކާރުން އެކި ފަހަރުމަތިން ގިނަ އަދަދެއްގެ އެމްބިއުލާންސްތައް ރާއްޖެ ގެނައިކަން އިއުލާން ކުރި ނަމަވެސް، އޭގެ ހަގީގީ މަންފާ ރައްޔިތުންނަށް ނުލިބޭކަމީ ދެރަކަމެއްނުންތޯ އެވެ. ސިއްހީ ޚިދުމަތްތައް އެއް ފުރާޅެއްގެ ދަށަށް ގެނައުމުގެ ހަގީގީ ފައިދާ ރައްޔިތުންނަށް ކުރަންޖެހޭނުންތޯ އެވެ. އެމްބިއުލާންސްގެ ޚިދުމަތަކީ ބަލިމީހާ ހުންނަ ތަނަކަށް ނުވަތަ ދާން ބޭނުންވާ ހޮސްޕިޓަލަކަށް ބަލައި ހަނި ކުރަންޖެހޭނެ ޚިދުމަތެއް ނޫނެވެ. ސަރުކާރުން މިކަމުގައި ހުރި ހުރަސްތައް ނައްތާލައި، ރައްޔިތުންނަށް ލުއިފަސޭހަ އަދި އަވަސް ޚިދުމަތެއް ކަށަވަރުކޮށްދޭން ޖެހެ އެވެ. ސިއްހީ ނިޒާމަށް ރައްޔިތުންގެ އިތުބާރު އަލުން ހޯދޭނީ، މިފަދަ އަސާސީ ކަންކަން ހަރުދަނާކޮށް، އިހުމާލުތަކަށް ޒިންމާދާރުވެގެންނުންތޯ އެވެ.