ކަސްޓޯޑިއަލްގައި ހުރި މީހަކު ނިޔާވުން: ފުލުހުން ބުނީ ހޮސްޕިޓަލަށް ގެންދިޔައިރު ވެސް އޭނާ ނިޔާވެފައިވާ ކަމަށް
ފުލުހުންގެ ބަންދުގައި ހުއްޓާ ކުއްލި ގޮތަކަށް ނިޔާވި 45 އަހަރުގެ މީހާގެ މަރުގައި އިހުމާލުތަކެއްވާ ކަމަށް އާއިލާއިން ތުހުމަތުކޮށްފި. އޭނާ ހައްޔަރުކުރިކަން އާއިލާއަށް އަންގާފައި ނުވާއިރު، ހަށިގަނޑު ދެއްކުމަށާއި މައުލޫމާތު ހިއްސާކުރުމަށް ފުލުހުން އިންކާރުކުރާ ކަމަށް ބުނެ އާއިލާއިން ވަނީ ކަންބޮޑުވުން ފާޅުކޮށްފަ. ފުލުހުން ބުނާ ގޮތުގައި އެ މީހާ އައިޖީއެމްއެޗަށް ގެންދިޔައީ ގޮޅިތެރޭގައި ހަބަރު ހުސްވެފައި އޮއްވާ ފެނިގެން ކަމަށާއި، މި މައްސަލަ މިހާރު ދަނީ ތަހުގީގު ކުރަމުން.
މާލެ ކަސްޓޯޑިއަލް ގައި ފުލުހުންގެ ބަންދުގައި ހުރި މީހަކު ނިޔާވުން: ފުލުހުން ބުނީ އެ މީހާ ހޮސްޕިޓަލަށް ގެންދިޔަ އިރު ވެސް ނިޔާވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށް | އެޑިޝަން.އެމްވީ
މާލެ ކަސްޓޯޑިއަލް ގައި ފުލުހުންގެ ބަންދުގައި ހުރި މީހަކު ނިޔާވި މައްސަލައިގެ މައުލޫމާތު ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އަދި ނޭޝަނަލް އިންޓަގްރިޓީ ކޮމިޝަން (އެންއައިސީ) އަށް މިހާރު ހިއްސާ ކޮށްފައިވާ ކަަމަށް ފުލުހުން ބުނެފި އެވެ.
ބުރާސްފަތި ދުވަހު ފުލުހުންގެ ބެލުމުގެ ދަށަށް ގެންދިއަ މީހަކު ނިޔާވެފައިވާ މައްސަލައެއް ފެންމަތިވެފައިވާއިރު އޭނާ ނިޔާވެފައިވާ ކަމުގެ މައުލޫމާތު އާއިލާ އަށް ދީފައިވަނީ ހުކުރު ދުވަހުގެ މެންދުރުގެ ވަގުތެއްގަ އެވެ. އާއިލާ އިން ބުނި ގޮތުގައި އޭނާ ހައްޔަރު ކުރި ކަމުގެ މައުލޫމާތު އާއިލާ އަށް ދީފައި ނުވެ އެވެ.
މީގެ ކުރިން ވެސް މަސްތުވާތަކެތީގެ މައްސަލަތަކުގައި އޭނާ ހައްޔަރު ކޮށްފައިވާއިރު، ހައްޔަރު ކުރުމަށްފަހު އެކަން ފުލުހުންގެ ފަރާތުން އާއިލާ އަށް އަންގާ ކަމަށާ ނަމަވެސް މިފަހަރު އެކަން އާއިލާ އަށް އަންގާފައި ނުވާ ކަމަށް އާއިލާ އިން ވަނީ ރާއްޖެއެމްވީ އާ ހިއްސާ ކޮށްފަ އެވެ.
އާއިލާ އިން ބުނީ ހުކުރު ދުވަހު މެންދުރު ލިބުނީ ފޯނު ކޯލެއް ކަމަށާއި ފުލުހުންގެ ބެލުމުގެ ދަށުގައި ހުއްޓާ ކުއްލިއަކަށް ގޮތްތަކެއް ވާތީ ހޮސްޕިޓަލަށް ގެނައިތަނުން އޭނާ ނިޔާވި ކަމަށް ފުލުހުން މައުލޫމާތު ދިން ކަމަށެވެ. އެއާއެކު އާއިލާ އިން ވަގުތުން ހޮސްޕިޓަލަށް ދިޔަ ކަމަށާއި ނަމަވެސް ފުލުހުންނާ ކުރި އެއްވެސް ސުވާލަކަށް ޖަވާބު ދީފައިނުވާ ކަމަށް ވެސް އާއިލާ އިން ކިޔައިދިނެވެ. އެގޮތުން އޭނާ ފުލުހުންގެ ބެލުމުގެ ދަށަށް ގެންދިޔަ ސަބަބާ، އާއިލާ އަށް މައުލޫމާތު ނުދިން ސަބަބު ވެސް އެހި ކަމަށާއި އެހެން ނަމަވެސް އެއްވެސް މައުލޫމާތެއް ފުލުހުން ހިއްސާ ކޮށްފައި ނުވާ ކަމަށް އޭނާ ގެ އާއިލާ އިން ކިޔައިދިނެވެ.
މިކަމާ ގުޅިގެން ރާއްޖެއެމްވީ އިން ސުވާލު ކުރުމުން ފުލުހުން ބުނީ މާލެ ކަސްޓޯޑިއަލް ގައި ފުލުހުންގެ ބަންދުގައި ހުރި މީހަކު ބަންދު ގޮޅީގައި ހަބަރު ހުސްވެފައި އޮއްވާ ފެނިގެން 2026 އޭޕްރީލް 24 ދުވަހުގެ މެންދުރު އައިޖީއެމްއެޗް އަށް ގެންގޮސްފައިވާ ކަމަށެވެ. އަދި އެ މީހާ ހޮސްޕިޓަލަށް ގެންދިޔަ އިރު ވެސް ނިޔާވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށެވެ.
ފުލުހުން ބުނީ ނިޔާވެފައިވަނީ ކޯޓަށް ހާޒިރުކުރުމަށްޓަކައި ފުލުހުންގެ މައްޗަށްކޮށްފައިވާ އަމުރަކާގުޅިގެން ބަންދުގައިހުރި 45 އަހަރުގެ ދިވެހި ފިރިހެނެއް ކަމަށާ މި ހާދިސާގެ މައުލޫމާތު މިހާރު އެޗްއާރްސީއެމް އާ އެންއައިސީ އާ ހިއްސާ ކޮށްފައިވާ އިރު މި މައްސަލަ ފުލުހުން ތަހުގީގު ކުރަމުން ދާ ކަމަށެވެ.
މި މައްސަލައިގައި އާއިލާ އިން ބުނީ ހޮސްޕިޓަލުގައި 4 ގަޑިއިރުވީ އިރުވެސް ނިޔާވި މީހާގެ ހަށިގަނޑު އާއިލާ އަށް ދައްކާފައި ނުވާ ކަމަށެވެ. އެކަމަށް އެދުމުން ހަށިގަނޑު ދެއްކެން ނެތް ކަމަށް ބުނި ކަމަށާއި ހަށިގަނޑު ހަވާލު ނުކުރެވޭނެ ކަމަށް ވެސް ފުލުހުން ބުނި ކަމަށެވެ.
މިއީ ވަރަށް ބޮޑު މައްސަލައެއް ކަން ފާހަގަ ކޮށް އާއިލާއިން ބުނީ މިކަމުގައި އިހުމާލުތަކެއް ވާކަމަށް ތުހުމަތު ކުރެވޭ ކަމަށެވެ. މިހާތަނަށް ވެސް ނިޔާވި ގަޑިއާ ބެހޭ ގޮތުން ވެސް އެއްވެސް މައުލޫމާތެއް ދީފައި ނުވާއިރު ވީ ގޮތް ވެސް ބުނެދީފައި ނުވާކަމަށް ބުނެ އާއިލާ އިން ވަނީ ކަންބޮޑުވުން ފާޅު ކޮށްފަ އެވެ.
