ސްޕެއިންގެ ރެއާލް މެޑްރިޑުން ޗެލްސީއަށް ބަދަލުވި ސްޕެއިން ފޯވާޑް އަލްވާރޯ މޮރާޓާގެ އަސްލު ކުޅުން މިހާރު ފެންނަމުން އެބަދާކަމަށް ޗެލްސީގެ ކޯޗު އެންޓޯނިއޯ ކޮންޓޭ ބުނެފިއެވެ.
މޮރާޓާއާ ބެހޭގޮތުން ވާހަކަ ދައްކަމުން ކޮންޓޭ ބުނީ ކޮންމެ ކުޅުންތެރިއަކަށް ވެސް ތަފާތު ލީގެއްގައި ކުޅެމުންދާއިރު އަސްލު ކުޅުމަށް ވާސިލުވާން ދުވަސްތަކެއް ނަގާނެ ކަމަށާއި މޮރާޓާއަށްވެސް ދިމާވެފައިވަނީ އެފަދަ ގޮތެއް ކަމަށެވެ. އެހެން ނަމަވެސް މިހާރު މޮރާޓާގެ އަސްލު ކުޅުން ފެންނަމުންދާ ކަމަށްވެސް ކޮންޓޭ ބުންޏެވެ.
ކޮންޓޭ އިތުރަށް ވާހަކަ ދައްކަމުން ބުނީ މޮރާޓާ އަކީ ދުނިޔޭގެ ފެންވަރުގައި ކާމިޔާބީތައް ހޯދޭނެ ފެންވަރުގެ ހުނަރެއް ލިބިފައިވާ މޮޅު ކުޅުންތެރިއެއް ކަމަށާއި އެކަން އޭނާ ސާބިތުކޮށްދެމުން އެބަދާ ކަމަށެވެ.
" ތަފާތު ލީގެއްގައި ކުޅެން ޖެހުމުން ބަދަލުތަކެއް އަންނާނެ. އެއީ ހަމަ ކޮންމެ ކުޅުންތެރިއަކަށް ވެސް ދިމާވާނެ ކަމެއް. އެހެން ނަމަވެސް މިހާރު މޮރާޓާގެ އަސްލުކުޅުން މަޑުމަޑުން ފެންނަމުން އެބަދޭ." ކޮންޓޭ ބުންޏެވެ.
ސްޕްއެއިންގެ ޗެމްޕިއަން ރިއަލްމެޑްރިޑުން ޕްރިމިއާ ލީގުގެ ޗެމްޕިއަން ޗެލްސީއަށް 80 މިލިއަން ޕައުންޑަށް ބަދަލުވި އަލްވާރޯ މޮރާޓާ ޗެލްސީގައި ފަހަކަށް އައިސް ރަނގަޅު ކުޅުމެއް ދައްކަމުން އަންނައިރު، އޭނާ ވަނީ އެންމެ ފަހުން ސްޓޯކް ސިޓީއާ ދެކޮޅަށް ކުޅުނު މެޗުގައި 3 ގޯލް ޖަހާ ހެޓްރިކް ވެސް ފުރިހަމަ ކޮށްފައެވެ.
ލޯން އެއްބަސް ވުމުގެ ދަށުން 2014 ވަނަ އަހަރު އިޓަލީގެ ޗެމްޕިއަން ޖުވެންޓަސްއަށް ވެސް ކުޅެފައިވާ އުމުރުން 24 އަހަރުގެ މޮރާޓާ ވަނީ މިހާތަނަށް ލީގުގައި ކުޅުނު 6 މެޗުގައި 6 ގޯލް ޖަހާފައެވެ.
