އިހުތިޖާޖުތަކުގައި ހައްޔަރުކުރާ މީހުން ކޯޓުން ދޫކޮށްލުމަށް އަމުރު ކުރި ނަމަވެސް އެތައް އިރަކު ހައްޔަރުކޮށްފައި ބަހައްޓާ، މިއީ ވަރަށް ނުރައްކާތެރި ކަމެއް: އިންތި
ސުލްހަވެރި އިހުތިޖާޖުތަކުން ހައްޔަރުކުރާ މީހުން ދޫކޮށްލުމަށް ކޯޓުން އަމުރުކުރުމުން ވެސް، ގިނަ އިރުތަކެއް ވަންދެން ބަންދުގައި ބައިތިއްބާ މައްސަލައިގައި ގާނޫނީ ވަކީލު އިމްތިޔާޒު ފަހުމީ ވަނީ ކަންބޮޑުވުންފާޅު ކުރައްވާފަ. މިއީ ގާނޫނުއަސާސީއާ ހިލާފު ނުރައްކާތެރި އަމަލެއްކަން ފާހަގަކުރައްވައި، ފުލުހުން ހާލަތާ ނުބައްދަލު ބާރުގެ ބޭނުންކޮށް ރައްޔިތުންގެ ހައްގުތަކަށް އަރައިގަންނަ ކަމަށް އޭނާ ވިދާޅުވި.
ނޫސްވެރިކަމުގެ ދިފާއުގައި ކުރިއަށް ގެންދިޔަ އިހުތިޖާޖެއްގެ ތެރެއިން ސޯޝަލް މީޑިއާ އެކްޓިވިސްޓު ޝަމްއޫނު ޖަލީލު (ލޫކަސް) ހައްޔަރުކުރި މައްސަލައާ ގުޅިގެން ހުރި ކަންބޮޑުވުންތައްފާޅު ކުރުމަށް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ކުރީގެ މެންބަރު އަދި ގާނޫނީ ވަކީލު އިމްތިޔާޒު ފަހުމީ ވާހަކަ ދައްކަވަނީ. | ރާއްޖެއެމްވީ
ސުލްހަވެރިކޮށް ކުރިއަށް ގެންދާ އިހުތިޖާޖުތަކުގައި ހައްޔަރުކުރާ މީހުން ކޯޓުން ދޫކޮށްލުމަށް އަމުރު ކުރި ނަމަވެސް މިނިވަން ނުކޮށް އެތައް އިރަކު ހައްޔަރުކޮށްފައި ބަހައްޓާ ކަމަށާއި، މިއީ ވަރަށް ނުރައްކާތެރި ކަމެއް ކަމަށް ރައްޔިތުންގެ މަޖިލީހުގެ ކުރީގެ މެންބަރު އަދި ގާނޫނީ ވަކީލު އިމްތިޔާޒު ފަހުމީ (އިންތި) ވިދާޅުވެއްޖެ އެވެ.
ނޫސްވެރިކަމުގެ ދިފާއުގައި ކުރިއަށް ގެންދިޔަ އިހުތިޖާޖެއްގެ ތެރެއިން ސޯޝަލް މީޑިއާ އެކްޓިވިސްޓު ޝަމްއޫނު ޖަލީލު (ލޫކަސް) ހައްޔަރު ކުރުމާ ގުޅިގެން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އިންތި ވަނީ ސުލްހަވެރިކޮށް ކުރިއަށް ގެންދާ އިހުތިޖާޖުތަކުގައި މީހުން ހައްޔަރު ކުރުމާއި، އެއްވުންތަކަށް ފުލުހުން ހުރަސްއަޅަމުންދާތީ އެކަމުގެ ކަންބޮޑުވުން ފާޅު ކުރައްވާފަ އެވެ.
އިންތި ވިދާޅުވީ ހާލަތާއި ނުބައްދަލު ބާރުގެ ބޭނުންކޮށް، ރައްޔިތުންގެ ހައްގުތަކަށް ވަރަށް ބޮޑަށް އަރައިގަންނަ ކަމަށެވެ.
ސުލްހަވެރިކޮށް ކުރިއަށް ގެންދާ އިހުތިޖާޖުތަކުގައި ހައްޔަރުކުރާ މީހުން ކޯޓުން ދޫކޮށްލުމަށް އަމުރު ކުރި ނަމަވެސް މިނިވަން ނުކޮށް އެތައް އިރަކު ހައްޔަރުކޮށްފައި ބައިތިއްބާކަން ފާހަގަކުރައްވައި އިންތި ވިދާޅުވީ، މިއީ ވަރަށް ނުރައްކާތެރި ކަމެއް ކަމަށާއި، ގާނޫނު އަސާސީއާ ހިލާފު ޣައިރު ގާނޫނީ ކަމެއް ކަމަށެވެ. މިގޮތަށް މިކަން ނުކުރެވޭނެ ކަމަށާއި، ކޯޓުން އެމީހަކު މިނިވަން ކުރާ ހިސާބުން އެއީ މިނިވަނެއް ކަމަށް އޭނާ ވިދާޅުވި އެވެ.
ނަމަވެސް މިގޮތަށް ފުލުހުން އަމަލު ނުކުރާތީ، ހައްގުތައް ހޯދުމަށް އެމައްސަލަ ކަމާގުޅުންހުރި މުއައްސަސާތަކަށް ހުށަހެޅުމަށް އިންތި ގޮވާލެއްވި އެވެ.
ހަމައެއާއެކު ފާހަގަކޮށްލަން ބޭނުންވޭ ވަރަށް ސީރިއަސް އެއް ކަމެއް ހިނގާ ވަރަށް ނުރައްކާތެރި. މިސުލްހަވެރި އިހުތިޖާޖުތަކުން ގެންދާ ބައެއް ފަރާތްްތައް ދޫކޮށްލަން ފަނޑިޔާރު އެބަ އަންގަވާ. އަންގަވަނީ މިސާލަކަށް މެންދުރުގެ ވަގުތުގައި އޮންނަ ޝަރީއަތުގެ އަޑު އެހުމުގައި. އެހެންނަމަވެސް އެފަރާތްތައް ދޫކޮށްލަނީ، ހައްޔަރުގެ ކުޑަ ގޮޅިން މި ދޫކޮށްލަނީ ރޭގަނޑުގެ މެންދަމު 3 ޖަހާއިރު ނޫނިއްޔާ 1:30 ގައި. އެންމެފަހުން ވެސް ލޫކަސް ޖަލީލުމެން ހައްޔަރު ކުރިއިރުގައި ހައްޔަރަށް ގެންދެވުނު ބައެއް ފަރާތްތައް ދޫކޮށްލި އެދުވަހުގެ މެންދުރުހާއިރު ބޭއްވި ޝަރީއަތުގެ މަޖިލީހުގެ ތެރެއިން. ދޫކޮށްލީމަ އެބޭފުޅުންނަށް މިނިވަން ވެގެން ނުކުމެވެނީ މެންދަމު އެކެއް ޖެހިފަހުން. ބައެއް އަންހެން ބޭފުޅުން ވެސް މީގެ ތެރޭގައި ހިމެނޭ.ރައްޔިތުންގެ މަޖިލީހުގެ ކުރީގެ މެންބަރު އަދި ގާނޫނީ ވަކީލު އިމްތިޔާޒު ފަހުމީ (އިންތި) ވިދާޅުވެއްޖެ އެވެ.
އިންތިގެ މިވާހަކަތަކަށް އިޝާރާތްކޮށް ލޫކަސް ބުނީ، ސުލްހަވެރި އިހުތިޖާޖުގެ ތެރެއިން ހައްޔަރުކުރި މީހުން ކޯޓުން މިނިވަން ކުރި ނަމަވެސް ވަރަށް ގިނައިރު އަތޮޅުވެހީގެ ކުޑަ ގޮޅީގެ އެންމެން ބޭއްތިބި ކަމަށެވެ. އަދި އެމީހުން ދޫކޮށްލީ ވަރަށް ގަދައަށް އެތަނުގެ ތެރޭގައި އަޑު އުފުލަން ފެށިފަހުން ކަމަށާއި، އެރޭ މާލޭގައި އޮތް އިހުތިޖާޖު ނިމުނުފަހުން ކަމަށެވެ.
އެވަގުތު އަޅުގަނޑާއެކު އަތޮޅުވެހީގައި އެވަގުތު ތިބި 10 މީހުން. އެ ދުވަހު ހަވީރު، ދެން އެދުވަހުގެ މެންދުރުން ފެށިގެން ކޯޓުގެ ހިޔަރިންގތައް ގޮސްފައި ގިނަ މީހުން ދޫކޮށްލަން ހުކުމް ކޮށްފައި އޮތީ. އެހެންނަމަވެސް އަޅުގަނޑަށް ހީވަނީ އެ ރޭ މާލޭ ތެރޭގައި މުޒާހަރާއެއް ހިނގާތީހެން މިނިވަން ކުރުން ދޫކޮށްލަން ގާޒީ އެންގީމަ ވެސް އަތޮޅުވެހީގެ ކުޑަ ގޮޅީގެ ތެރޭގައި އެންމެން ތާށި ކޮށްގެން ތިބީ އެ ރޭ 1:00 ވަން ދެން. ދެން އެ ރޭ އެމީހުން ދޫކޮށްލީ ގޮޅީގައި އެމީހުން ވަރަށް ބޮޑަށް އިހުތިޖާޖު ކުރަމުން ދިޔައީ. ފުލުހުންގެ ވެރިންގެ އިސްތިއުފާ އަށް އަދި ގޭޓްތައް ތެޅުވުމާއި ވަރަށް ވަރުގަދަ އިހުތިޖާޖެއް ދިޔަ. ދެން ބޭރުގައި ތިބި ބަޔަކަށް ނުފެންނާނެ.ސޯޝަލް މީޑިއާ އެކްޓިވިސްޓު ޝަމްއޫނު ޖަލީލު (ލޫކަސް)
މި މަހުގެ 13 ވަނަ ދުވަހުގެ ރޭ ލޫކަސް ހައްޔަރުކޮށްފައި ވަނީ މަޖިދީ މަގު ޗާންދަނީ މަގު ކަންމަތީގައި ކުރި މުޒާހަރާ އެއްގައި ނޫސްވެރިން ހައްޔަރުކުރުމާއި ދެކޮޅަށް އަޑު އުފުލަމުން ދަނިކޮށެވެ. އޭނާ ގެ ބަންދަށް ކޯޓުން ޖަހާފައި ވަނީ 10 ދުވަހެވެ. ފުލުހުން ބުނީ އެ މުޒާހަރާ އިން ހައްޔަރު ކުރި މީހުން ހައްޔަރުކޮށްފައި ވަނީ، އަމުރަށް ނުކިޔަމަންތެރިވުމުގެ ސަބަބުން ކަމަށެވެ.
ބަންދުގެ މުއްދަތު ހަމަވުމާ ގުޅިގެން އޭނާ މިނިވަން ކުރީ 24 މެއި 2026 ގަ އެވެ.
