ވަޒީރުންގެ އދ. ދަތުރު، ބޭކާރު ހަރަދެއް!

އދ. 72 ވަނަ އާންމު ޖަލްސާއަށް ރާއްޖޭން ދިޔަ ވަފުދުގައި ހަތަރު ވަޒީރުންނާއި އެ ބޭފުޅުންގެ ސެކްރެޓަރީން ނުވަތަ އެހީތެރިން ހިމެނެ އެވެ. ނިއުޔޯކަށް ވަޑައިގެންނެވި ވަޒީރުންނަކީ ފޮރިން މނިސްޓަރު ޑރ. މުހައްމަދު އާސިމްގެ އިތުރުން ފިޝަރީޒް މިނިސްޓަރު ޑރ. މުހައްމަދު ޝައިނީ އާއި އެންވަޔަރަމަންޓް މިނިސްޓަރު ތޯރިގް އިބްރާހިމް އަދި ޖެންޑަ މިނިސްޓަރު އައިމިނަތު ޒެނީޝާ ޝަހީދު ޒަކީ ހިމެނިވަޑައިގަންނަވަ އެވެ.

އދ. ގެ އާންމު ޖަލްސާގައި އެންމެ ގިނަ މިނިސްޓަރުން ބައިވެރިވި ގައުމަކަށް ރާއްޖެ ވާނެ އެވެ. ނަމަވެސް ދެއްކުނު ނަތީޖާއެއް ނެތެވެ. ފެނިގެން ދިޔައީ ހަވާސާގައި، އެހެން ގައުމުތަކުގެ ބައެއް މިނިސްޓަރުންނާއި އޮފިޝަލުންނާއި ބައްދަލުކުރެއްވުމާއި، އަމިއްލަ ޖަމިއްޔާ ޖަމާއަތްތަކުގެ އިވެންޓްތަކުގައި ބައިވެރިވުމެވެ. ދުނިޔޭގެ ބާރެއްގެ ވެރިޔަކާ ބައްދަލެއް ނުކުރެވުނެވެ. ސަރަހައްދީ ބާރުގެ ވެރިޔަކާ ބައްދަލެއް ނުކުރެވުނެވެ. މިއިން ކޮންމެ ބައްދަލުވުމަކީ ބޮޑު ހަބަރަކަށް ދިޔައީ ހަދަމުންނެވެ.

ދުނިޔޭގެ އެންމެ އަގުބޮޑު ސިޓީގައި ތިއްބަވައިގެން ވަޒީރުން ހަރަދުކުރައްވަމުން ގެންދެވީ އެ ބޭފުޅުންގެ އަމިއްލަފުޅު ފައިސާއެއް ނޫނެވެ. ދިވެހިރައްޔިތުންގެ ފައިސާއިން ހަރަދުކުރައްވަމުން، ފަރިއްކުޅުވަމުން ގެންދަވާއިރު ދިވެހންގެ ހައްގުތަކުގެ ވާހަކަ އދ. ގައި ދެއްކެވުމަށް ހަނދުމަފުޅެއް ނެތެވެ. ރާއްޖެއާ ބެހޭ ގޮތުން އެންމެ ބޮޑު ފާޑުކިޔުމެއް އަމާޒުވެފައި ވަނީ އިންސާނީ ޙައްޤުތަކުގެ ހާލަތާއި، ސިޔާސީ މިނިވަންކަމާއި، ނޫސްވެރިކަމުގެ މިނިވަންކަން ނެތުމާއި ކޯޓްތައް ހަރާބުވެފައި އޮތުމެވެ. ރާއްޖެއާމެދު މުޅި ދުނިޔެ ކަންބޮޑުވާ މި ކަންކަމުގެ ވާހަކަ ދައްކަވަން ފޮރިން މިނިސްޓަރަށް މުހިންމެއް ނުވި އެވެ. ގަޓްހުރި ކަމަށް ބުނާ މި ސަރުކާރަށް، ދުނިޔެއިން ކުރާ ތުހްމަތުތަކަކީ ބުހުތާނު ދޮގެކޭ ވެސް ބުނެލާނެ ހިތްވަރެއް ނެތެވެ. ކެރިވަޑައެއް ނުގަތެވެ.

ޑރ. އާސިމްގެ ތަޤުރީރުގެ ބޮޑު ބައެއް ޚާއްސަ ކުރެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރުން ގެނެސްދެއްވާފައިވާ ތަރައްޤީގެ ގޮތުގައި ސަރުކާރުން ސިފަކުރާ ކަންކަމުގެ ވާހަކަ އާއި، މޫސުމީ ބަދަލާއި، ދެމެހެއްޓެނިވި މަސްވެރިކަމުގެ އިތުރުން ކަނޑުގެ ދިރުންތައް ހިމާޔަތްކުރުމުގެ ވާހަކައަށެވެ. މީގެ އިތުރުން އދ ގެ ސަލާމަތީ މަޖިލީހުގެ މެންބަރުކަން ހޯދުމަށް ރާއްޖެއިން ކުރަމުންދާ މަސައްކަތަށްވެސް ޑރ. އާސިމް އަލިއަޅުއްވާލެއްވިއެވެ.

އދ އަކީ، "ވައުދުވާ، އަދި ވައުދު ފުއްދާ" ޖަމްޢިއްޔާއަކަށް ވާތަން ދެކެން ދިވެހިރާއްޖެއިން އުއްމީދުކުރާ ކަމަށް މިނިސްޓަރު އާސިމް ވިދާޅުވިއިރު، އެ މަނިކުފާނު ތަމްސީލްކުރައްވާ މި ސަރުކާރުގެ ހާލަތެއް ހަނދުމަފުޅެއް ނެތެވެ. ފާޑުކިޔުމަކީ މައްސަލައެއް ނޫނެވެ. ނަމަވެސް، ތިމާގެ ހާލަތާމެދު ވެސް ވިސްނާލާނަމަ ތަންކޮޅެއް ތާހިރު ވާނެވެ. މި ސަރުކާރަކީ ވައުދުވެ، ވައުދު ނުފުއްދާ ސަރުކާރެކެވެ.

އަމިއްލަ ގައުމުގެ މައްސަލަތައް ހައްލު ނުކުރެވިގެން އުޅޭ މި ސަރުކާރުގެ ފޮރިން މިނިސްޓަރު، ދުނިޔޭގެ ގައުމުތަކުގައި ހުރި މައްސަލަތައް ހައްލުކުރަންވީ ގޮތް ކިޔަދިނެވެ. ލަދެއްވެސް ނެތީ އެވެ. އަދި އދ.ގެ ސަލާމަތީ މަޖިލީހުގެ ގޮޑިއަކަށް ފައި ފައިވެސް ވަނީ ނަގައިފަ އެވެ. ސަލާމަތީ މަޖިލީހުގައި ދިވެހިރާއްޖެ ހިމެނުމަކީ ފަހުރެއް ކަމަށް ވިޔަސް، ލަދުގަންނަންޖެހެނީ މި ސަރުކާރަށް ދުނިޔޭގެ ގައުމުތަކުގެ ގޮވާލުމުގެ އަޑު ނީވޭތީ އެވެ. ކަންފަތް ބީރުވެ، ބޯހަރުބައެއްގެ އާދޭހަށް ދުނިޔޭގެ ވިސްނުން ދީލާލައި، މި ސަރުކާރާރުން އެދޭ ގޮތަށް ސަލާމަތީ މަޖިލީހުގެ ގޮނޑިއެއް ދޭނެ ކަމަށް ނުވިސްނާށެވެ. ދުނިޔެއިން މިނާނީ މިރާއްޖެއިން ވެސް މިނާ ނާޅިންނެވެ.

ހައިބަތުހުރި އދ. އެ ބިޔަ ހޯލުގައި ޑރ. އާސިމް ތަގުރީރު ކުރެއްވިއިރު ތިބީ ވަރަށް މަދު ގައުމުތަކެކެވެ. ގިނަ ގައުމުތަކުގެ ޝައުގުވެރިކަމެއް ރާއްޖެއަށް ނެތެވެ. މިނިސްޓަރުގެ ވާހަކައަށް ޝައުގެއް ނެތެވެ. ޝައުގުވެރިކަން ހުރި ނަމަ، މާލަމުން އެކަން އެނގޭނެ އެވެ. މާލަމުގައި ރާއްޖޭގެ މިނިސްޓަރުންނާއި ނިއުޔޯގައި ހުންނަ ދިވެހި މިޝަންގެެ އޮފިޝަލުންނާއި ދިވެހި ވަފުދުގެ މަންދޫބުން ތިއްބެވި އެވެ. ކަސަބުން ޖަރީކޮށްފައިވާ ބޯވަޅުއެޅި ލިބާހުގައި އަންހެން ބޭފުޅުން ތިއްބެވި އެވެ. ގޮތްގޮތަށް އަރިއަރި މައްޗަށް ފޮޓޯ ނެގުމާއި ސެލްފީ ނެގުން އެއީ ފަހުރަކަށް ވާނަމަ، މިފަހަރުގެ ދަތުރުން އެކަން ދިވެހިންނަށް ކާމިޔާބުވެއްޖެ އެވެ. އެއީ ފަހުރަކަށް ވާނަމަ އެކަން ވެސް ވެއްޖެ އެވެ. ދެން އަތްޖަހާށެވެ.