ވަތަނީ ހިދުމަތުގެ ކުދިންތަކެއް ދަތުރުކުރަމުންދިޔަ ލޯންޗެއް ފަޅައިގެންގޮސްގެން ފުލުހުން ހަރަކާތްތެރިވަނީ
18 މެއި 2026 | ހޯމަ 14:31ޅ. މާފިލާފުށިން ފުރައިގެން މާލެއަށް ދަތުރުކުރި ލޯންޗެއް ފަޅައިގެން ގޮސް އަޑިއަށް ދިޔަ ހާދިސާއެއްގައި ކަނޑުވި މީހުން ސަލާމަތްކުރުމުގެ މަސައްކަތް މެރިން ޕޮލިހުން ފަށައިފި. ސޯޝަލް މީޑިއާގައި ދައުރުވާ ވީޑިއޯތަކުން ލޯންޗުގެ ބައެއް އަޑިއަށް ގޮސް، ގިނަ ބަޔަކު ލައިފް ޖެކެޓާއެކު މޫދުގައި ތިބި މަންޒަރު ފެނުނު ނަމަވެސް، މި ހާދިސާގައި އެއްވެސް މީހަކަށް އަނިޔާއެއް ލިބުނުކަން އަދި ސާފެއް ނުވޭ. ފުލުހުންގެ ދެ ލޯންޗެއް އެ ސަރަހައްދުގައި މިހާރު ދަނީ ހަރަކާތްތެރިވަމުން.
ޅ. މަފިލާފުށިން މާލެ ދަތުރުކުރަމުން ދަނިކޮށް ފަޅައިގެންދިޔަ ލޯންޗް | ސޯޝަލް މީޑިއާ
ޅ. މާފިލާފުށިން ވަތަނީ ހިދުމަތުގެ ޓްރެއިނިންގ ނިންމި ދަރިވަރުންތަކެއް ގޮވައިގެން މާލެއަށް ދަތުރުކުރަމުން ދިޔަ ލޯންޗެއް ފަޅައިގެން ގޮސް ހިނގި ހާދިސާއަކާ ގުޅިގެން މެރިން ޕޮލިސް އިން އެ ސަރަހައްދުގައި ހަރަކާތްތެރިވާން ފަށައިފި އެވެ.
ފުލުހުން މައުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ މާފިލާފުށިން މާލެއަށް ދަތުރުކުރި ލޯންޗެއް ފަޅައިގެން ދިއުމުގެ ސަބަބުންނެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ލޯންޗު ފަޅައިގެން ދިއުމުގެ ސަބަބުން އޭގެ އެއްބައި ވަނީ އަޑިއަށް ގޮސްފައެވެ. އަދި ލޯންޗުން ދަތުރުކުރި ގިނަ އަދަދެއްގެ މީހުން ކަނޑުވެފައިވާ މަންޒަރު ފެންނައިރު، އެ މީހުން ތިބީ ލައިފް ޖެކެޓުގެ އެހީގައި ފެންމަތީގަ އެވެ.
ފުލުހުން ބުނީ މި ހާދިސާގެ ރިޕޯޓު ލިބުމާއެކު މެރިން ޕޮލިސްގެ ދެ ލޯންޗެއް އެ ސަރަހައްދަށް ގޮސް މީހުން ސަލާމަތްކުރުމުގެ މަސައްކަތް ފަށާފައިވާ ކަމަށެވެ. މި ހާދިސާގައި އެއްވެސް މީހަކަށް ގެއްލުމެއް ލިބުނު ކަމެއް ނުވަތަ ނޫންކަން އަދި ސާފެއް ނުވެ އެވެ.
