މެލޭޝިއާ އާއި ރާއްޖެއާ ދެމެދު ކާގޯ ފްލައިޓް މި މަހު ފަށަނީ

މެލޭޝިއާގެ ރާޔާ އެއާވޭސްއިން ރާއްޖެއާއި މެލޭޝިއާއާ ދެމެދު މުދާ އުފުލާ ހާއްސަ ފްލައިޓްތަކެއް ނުވަތަ ކާގޯ އޮޕަރޭޝަންތަކެއް ފެށުމަށް ނިންމައިފި އެވެ. މިއީ އެ އެއާލައިނުން ރާއްޖެއަށް މުދާ އުފުލުމަށް ހާއްސަކޮށްގެން ފަށާ ފުރަތަމަ ޝެޑިއުލް ކާގޯ ހިދުމަތެވެ.

މި އާ ހިދުމަތުގެ ދަށުން ފްލައިޓްތައް ދަތުރުކުރުމަށް ހަމަޖެހިފައިވަނީ މެލޭޝިއާގެ ޕިނޭންގުން ސީދާ ދިވެހިރާއްޖޭގެ މާލެއަށެވެ. މި ދަތުރުތައް ރަސްމީކޮށް ފެށުމަށް ތާވަލުކޮށްފައިވަނީ 2026 ވަނަ އަހަރުގެ އޮގަސްޓް މަހުގެ މެދުތެރޭގަ އެވެ. މިއީ އޭޝިއާ ސަރަހައްދުގައި ރާޔާ އެއާވޭސްއިން ދެމުންދާ ކާގޯ ހިދުމަތްތައް އިތުރަށް ފުޅާކުރުމުގެ ގޮތުން ފަށާ ދަތުރުތަކެކެވެ.

ރާޔާ އެއާވޭސްއަކީ އޭޝިއާ ޕެސިފިކް ސަރަހައްދުގައި ޝެޑިއުލް ކާގޯ އޮޕަރޭޝަންތަކާއި، އެކްސްޕްރެސް ފްރެއިޓް ހިދުމަތުގެ އިތުރުން އެއާކްރާފްޓް ޗާޓަރު ކުރުމުގެ ހިދުމަތް ދިނުމުގައި ފާހަގަކޮށްލެވޭ އެއާލައިނެކެވެ. މި އާ ރޫޓުގެ ސަބަބުން ދެ ގައުމުގެ ދެމެދުގައި މުދާ އުފުލުމަށް ހާއްސަ ވަސީލަތެއް ގާއިމުވެ، ވިޔަފާރިވެރިންނަށް މުދާ ގެނައުމުގައި އެހެން ގައުމުތަކަށް ބަރާސާވާންޖެހޭ މިންވަރު ކުޑަވެގެންދާނެ ކަމަށް ރިޕޯޓުތައް ބުނެ އެވެ.

މި ހިދުމަތުގެ މައިގަނޑު މަގްސަދަކީ ދެ ގައުމުގެ ދެމެދުގައި މުދާ އުފުލުމުގެ ނިޒާމު ހަރުދަނާކޮށް، ސަރަހައްދީ ގުޅުންތައް އިތުރަށް ބަދަހިކުރުމެވެ. މި އާ ކާގޯ ކަނެކްޝަނާއެކު މެލޭޝިއާއާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތަކަށް ފަސޭހަތަކެއް ލިބިގެންދާނެ ކަމަށް ބެލެވެ އެވެ.

ދުނިޔޭގެ ވައިގެ މަގުން މުދާ އުފުލާ މާކެޓުގެ 0.03 އިންސައްތަ ނުވަތަ ގާތްގަނޑަކަށް 9,470 ޓަނުގެ މުދާ ރާއްޖެއަށް އެތެރެކުރާ މުދަލުގެ ގޮތުގައި ހިމެނެ އެވެ.