އިޓަލީގެ މަޝްހޫރު ބްރޭންޑް އޯވީއެސް ފިހާރައިގައި ފިރިހެނުންނަށް ހާއްސަ ފަންގިފިލާއެއް ހުޅުވައިފި

އިޓަލީގެ މަޝްހޫރު ފެޝަން ބްރޭންޑް، އޯވީއެސް (OVS) އިން މާލޭގައި ހުންނަ އެ ބްރޭންޑްގެ ޝޯރޫމްގައި ފިރިހެނުންގެ ފޭރާމަށް ޚާއްސަ ފްލޯއެއް ހުޅުވައި، ރާއްޖޭގައި އެ ބްރޭންޑްގެ ވިޔަފާރި ފުޅާކޮށްފި އެވެ.

މިއީ އަގުހެޔޮކޮށް ޔޫރަޕްގެ ފެޝަން ރާއްޖޭގެ މާކެޓަށް ފޯރުކޮށްދިނުމުގައި އެ ބްރޭންޑުން ހޯދާފައިވާ މަގުބޫލުކަން އިތުރަށް ވަރުގަދަވެގެންދިޔަ ކަމެކެވެ.

ހ. އެސްޖެހިގެ، މެދުޒިޔާރަތް މަގުގައި ހުންނަ އޯވީއެސް ޝޯރޫމްގެ ތިންވަނަ ފްލޯގައި ފިރިހެނުންނަށް ޚާއްސަކޮށްގެން ތައްޔާރުކުރި މި ބައި ރަސްމީކޮށް ހުޅުވާފައިވަނީ ޖުލައި މަހުގެ 26 ވަނަ ދުވަހު އެވެ. މިއީ 2024 ވަނަ އަހަރު ރާއްޖޭގައި އެ ބްރޭންޑްގެ ޚިދުމަތް ފެށިފަހުން، އެ ބްރޭންޑުން ލިބޭ އުފެއްދުންތައް އިތުރުކުރުމަށް އެޅި މުހިންމު ފިޔަވަޅެކެވެ.

ދިވެހި ކަސްޓަމަރުންގެ ބޭނުންތަކަށް ރިއާޔަތްކޮށް ފަރުމާކޮށްފައިވާ މި އައު ކަލެކްޝަންގައި ކެޝުއަލް ފޭރާމާއި، އޮފީސް އަދި ބިޒްނަސްވެއަރގެ އިތުރުން ރަސްމީ މުނާސަބަތުތަކަށް ޚާއްސަ ހެދުމާއި ދިރިއުޅުމުގެ އެކި ބޭނުންތަކަށް ބޭނުންވާނެ ގިނަ ބާވަތްތަކެއް ހިމެނެ އެވެ. އިޓަލީގެ ޒަމާނީ ފަރުމާތަކާއެކު، ފެންވަރު ރަނގަޅު އަދި އަގުހެޔޮކޮށް ލިބެން ހުރި މި އުފެއްދުންތަކަކީ، ތަފާތު ދިރިއުޅުމުގެ ވައްޓަފާޅިތަކާއި އެކި މުނާސަބަތުތަކާ ގުޅޭގޮތަށް ފަރުމާކޮށްފައިވާ އުފެއްދުންތަކެކެވެ.

ސެޕްޓެމްބަރު 2024 ގައި މާލޭގައި ފުރަތަމަ ޝޯރޫމް ހުޅުވި ފަހުން، އޯވީއެސް އަށް ވަނީ ދިވެހި ކަސްޓަމަރުންގެ މެދުގައި ބޮޑު މަގުބޫލުކަމެއް ލިބިފަ އެވެ. ފުރަތަމަ އަންހެނުންނާއި ކުޑަކުދިންގެ ފޭރާމާއެކު ޚިދުމަތް ފެށި މި ބްރޭންޑުން ވަނީ، ބައިނަލްއަގުވާމީ ގޮތުން ބަލައިގަންނަ އިޓަލީގެ ފެޝަން، ފެންވަރު ރަނގަޅުކޮށް އަދި އަތްފޯރާ ފަށުގައި ރާއްޖެއިން ލިބޭނެ ގޮތް ހަދައިދީ، ގިނަ ބައެއްގެ އިތުބާރު ހޯދާފަ އެވެ.

ފިރިހެނުންގެ ފޭރާމަށް ޚާއްސަ ފްލޯއެއް ތައާރަފުކުރުމަކީ ރާއްޖޭގައި އޯވީއެސްގެ ވިޔަފާރި ފުޅާކުރުމަށް ކުރިއަށްގެންދާ މަސައްކަތުގެ އައު މަރުހަލާއެކެވެ. މި ބަދަލަކީ ކަސްޓަމަރުންގެ ބޭނުންތަކަށް ބަދަލު އަންނަމުންދާ މިންވަރަށް ބަލައި، މުޅި އާއިލާއަށް ބޭނުންވާ ހުރިހާ ފޭރާމެއް އެއް ފުރާޅެއްގެ ދަށުން ފޯރުކޮށްދިނުމަށް އެ ބްރޭންޑުން ގެންގުޅޭ ސިޔާސަތުގެ ދަށުން ގެނައި ކުރިއެރުމެކެވެ.

އިޓަލީގައި 1972 ވަނަ އަހަރު އުފެދުނު އޯވީއެސް އަކީ އެ ގައުމުގެ އެންމެ ބޮޑު ފެޝަން ރީޓެއިލާގެ އިތުރުން ޔޫރަޕްގައި ވެސް އެންމެ ފާހަގަކޮށްލެވޭ އެއް ބްރޭންޑެވެ. ޔޫރަޕާއި، މެދުއިރުމައްޗާއި އޭޝިއާގެ ގައުމުތަކުގައި ވިޔަފާރި ކުރަމުންދާ މި ކުންފުންޏަކީ އިޓަލީގެ ފަރުމާތަކާއި، ފެންވަރު ރަނގަޅު މަސައްކަތްތެރިކަން އަދި އަގުގެ ހަމަހަމަކަމަށް މަޝްހޫރު ކުންފުންޏެކެވެ. މީގެ އިތުރުން، ތިމާވެއްޓާ ރައްޓެހި މާއްދާތައް ބޭނުންކުރުމާއި ދެމެހެއްޓެނިވި ގޮތެއްގައި ވިޔަފާރި ހިންގުމަށް ކުރާ މަސައްކަތްތަކަށް ވެސް އޯވީއެސް ފާހަގަކޮށްލެވެ އެވެ.

ފިރިހެނުންގެ ބައި އިތުރުކުރުމާއެކު، މާލޭގައި ހުންނަ އޯވީއެސް ޝޯރޫމުން މިހާރު ފިރިހެނުންނާއި، އަންހެނުން އަދި ކުޑަކުދިންގެ ޚާއްސަ ކަލެކްޝަންތައް އެއްތަނަކުން ލިބެން ހުންނާނެ އެވެ. މި ފުޅާކުރުމާއެކު، ޒަމާނީ ޔޫރަޕްގެ ފެޝަން ދިވެހި ކަސްޓަމަރުންނަށް ފަސޭހައިން ލިބޭނެ މަގު ފަހިވެ، ދުނިޔޭގެ ފެންވަރުގައި އޯވީއެސްއަށް ލިބިފައިވާ އިތުބާރާއި މަގުބޫލުކަން ރާއްޖޭގައި ވެސް ދެމެހެއްޓިގެންދާނެ އެވެ.