ޕީއެންސީން ހައިކޯޓަށް އައި ފަނޑިޔާރުގެ ތާއީދާއެކު ވޭވަށު ކައުންސިލް ގޮނޑި އެމްޑީޕީއަށް ގެއްލި، ޕީއެންސީއަށް
ވޭވަށު ކައުންސިލްގެ ގޮނޑި އެމްޑީޕީގެ ކެންޑިޑޭޓަށް ލިބުނު 3 ވޯޓެއް ބާތިލުކުރުމަށް ހައިކޯޓުން ނިންމުމާ ގުޅިގެން، އެ ދާއިރާގެ ނަތީޖާ އަލުން އިއުލާނުކުރަން އިލެކްޝަންސް ކޮމިޝަނަށް އަންގައިފި. މި ވޯޓުތައް ބާތިލުކުރަން ނިންމީ ކަރުދާހުގައި ހުރި ތިކިތަކެއްގެ ސަބަބުން ވޯޓުގެ ސިއްރުކަން ގެއްލޭ ކަމަށް ބުނެ ޕީއެންސީގެ ކެންޑިޑޭޓު ހުށަހެޅި މައްސަލައަކާ ގުޅިގެން. މި ނިންމުމާއެކު ނަތީޖާއަށް އަންނަ ބަދަލުން އެ ގޮނޑި ކާމިޔާބު ކުރާނީ ޕީއެންސީގެ ކެންޑިޑޭޓް.
ވޭވަށު ކައުންސިލު އިންތިޚާބާ ގުޅިގެން ކުރިއަށްދިޔަ އަޑުއެހުން | ރާއްޖެ އެމްވީ
ވޭވަށު ކައުންސިލު މެމްބަރަކު ހޮވުމަށް ނެގުނު ވޯޓުގެ ނަތީޖާ އަލުން އިއުލާނު ކުރުމަށް ދިވެހިރާއްޖޭގެ ހައިކޯޓުން އަންގައިފި އެވެ.
މި މައްސަލައަކީ ނިމިދިޔަ ލޯކަލް ކައުންސިލް އިންތިޚާބުގައި ވޭވަށުގައި ބެހެއްޓުނު ފޮށީގެ ނަތީޖާއާ ގުޅިގެން ދިވެހިރާއްޖޭގެ ހައިކޯޓަށް ހުށަހެޅިފައިވާ މައްސަލައެކެވެ. މި މައްސަލަ ހުށަހަޅާފައިވަނީ ޕީއެންސީގެ ކެންޑިޑޭޓުގެ ފަރާތުންނެވެ. އެ ދާއިރާގެ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓެވެ.
އެހެންކަމުން މި މައްސަލައިގައި އެމްޑީޕީގެ މަސްލަހަތު ހިމެނޭތީ އެ ޕާޓީން ވަނީ މި މައްސަލައަށް ތަދައްޚުލުވެސް ވެފަ އެވެ. އަދި މި މައްސަލައިގައި ތަދައްޚުލުވި އެމްޑީޕީން އެދިފައިވަނީ އީސީން އިއުލާނުކޮށްފައިވާ ނަތިޖާއަކީ ދާއިމީ ނަތީޖާކަމަށް ކަނޑައަޅައިދިނުމަށެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، މައްސަލަ ދިމާވެގެން އުޅޭ ވޯޓުފޮށި ގުނިއިރުވެސް އެމްޑީޕީގެ ކެންޑިޑޭޓު 2 ވޯޓުގެ ފަރަޤަކުން ވަނީ އިންތިޚާބު ކާމިޔާބުކޮށްފަ އެވެ. އަދި ޕީއެންސީގެ ކެންޑިޑޭޓު ޝަކުވާ ހުށަހަޅައިގެން ވޯޓު އަލުން ގުނުމުންވެސް އެމްޑީޕީގެ ކެންޑިޑޭޓު ވަނީ 2 ވޯޓުން އިންތިޚާބު ކާމިޔާބު ކޮށްފަ އެވެ.
މި މައްސަލައިގައި ހިލާފު އުފެދިފައިވަނީ ބާތިލު ވޯޓު ކަނޑައެޅުމުގައިކަމަށްވާއިރު، އީސީން އަލުން ވޯޓު ގުނި މާލަމުގައި އެ ވޯޓުތައް ސައްޙަކަމަށް ކަނޑައަޅާފައިވަނީ ކިހިނެއްކަން ސާފުކޮށް ކިޔާދީފައިވެ އެވެ. އެގޮތުން ވޯޓު ކަރުދާހުގައި ފާހަގަވެފައި ހުރީ ކުރެހުމެއް ނޫނެވެ. އެއީ ވޯޓު ކަރުދާސް ޕްރިންޓު ކުރުމުގައި ދެލި ފޭދިފައިވާ ކަރުދާސްކަމަށްވާތީ އީސީން ވަނީ އެ ކަރުދާސްތައް ސައްޙަކަމަށް ބަލައިގެންފައެވެ. އެއީ 3 ކަރުދާހެކެވެ.
އީސީން އެގޮތަށް ނިންމީ ވޯޓު ލުމަށް ބޭއްވިފައި އޮތީ ނޫކުލައިގެ ގަލަމަކަށްވެފައި، އެ ތިކިތައް ހުރީ ކަޅުކުލައިންކަމަށް ވުމާއި، އެ ތިކިތައް ގަލަމެއްގެ ތުނޑަށްވުރެ ކުޑަވުމުގެ ސަބަބުންނެވެ.
މައްސަލަ ހައިކޯޓުގައި ކުރިއަށްދިޔައިރު ނޮވެލްޓީން ދިން ޖަވާބުގައި ބުނެފައިވަނީ ކަރުދާސް ޕްރިންޓު ކުރުމުގެ ތެރޭގައި އެގޮތަށް ކުޑަ ތިއްކެއް ހުރުމަކީ އެކަށީގެންވާ ކަމެއްކަމަށެވެ.
ހައިކޯޓުގެ ފަނޑިޔާރު މުޙައްމަދު ޝަނީޒު ވިދާޅުވީ، ވޯޓު ކަރުދާހެއްގައި ފާހަގައެއް ނުވަތަ ނިޝާނެއް އޮވެގެން ނުވާނެކަމަށް ޤާނޫނުގައި ބަޔާންކޮށްފައިވާ ކަމަށާއި، ވަކި ނިޝާނެއް ހުރުމަކީ ވޯޓުގެ ސިއްރުކަންވެސް ގެއްލޭނެ ކަމެއް ކަމަށެވެ. އަދި ވަކިވަކިން ކަރުދާސްތައް ޗެކްކޮށް، އެފަދަ ނިޝާނެއް ނެތްކަން ކަށަވަރު ކުރުމަކީ އީސީގެ ޒިންމާއެއްކަން ޝަރީއަތުން ފާހަގަކުރި އެވެ.
އެއީ ޕްރިންޓު ކުރުމުގައި ދިމާވި ކަމެއްނަމަވެސް، އޭގެ ސަބަބުން ވޯޓުގެ ސިއްރުކަން ގެއްލޭނަމަ އެއީ ސައްޙަ ވޯޓުކަމަށް ބަލައިގަނެވިގެން ނުވާނެކަންވެސް ޝަރީއަތުން ފާހަގަކުރި އެވެ. އެހެންވެ ފަނޑިޔާރު ނިންމެވީ އެމްޑީޕީއަށް ލިބިފައިވާ 3 ވޯޓު ބާތިލު ކުރުމަށެވެ.
އެ ނިންމުމަށް ފަނޑިޔާރު އަބްދުއްރައޫފް އިބްރާހިމް ތާއީދު ކުރެއްވި އެވެ. އޭނާއަކީ ޕީއެންސީ ޓިކެޓުގައި ނިމިދިޔަ މަޖިލިސް އިންތިޚާބުގައި ވާދަކުރެއްވި ބޭފުޅެކެވެ.
އެހެންކަމުން މި ނިންމުމާއެކު ނަތީޖާ އަލުން ގުނުމުން ޕީއެންސީ ކެންޑިޑޭޓު ވޯޓުން ކުރިހޯދާނެ އެވެ. ހައިކޯޓުގައި މި މައްސަލަ ނިންމެވީ ފަނޑިޔާރު އަލްއުސްތާޛު މުޙައްމަދު ޝަނީޒް ޢަބްދުﷲ, ފަނޑިޔާރު އަލްއުސްތާޛު އިބްރާހީމް މާހިރު އަދި ފަނޑިޔާރު އަލްއުސްތާޛު ޢަބްދުއްރައޫފު އިބްރާހީމް އެވެ.
