ކޯރަމް ހަމަނުވެގެން މިއަދުގެ ޖަލްސާ ފެށުން ފަސްކޮށްފި
13 މެއި 2026 | ބުދަ 04:37ރައްޔިތުންގެ މަޖިލީހުގެ ކޯރަމް ހަމަނުވުމުގެ ސަބަބުން ބުދަ ދުވަހުގެ ޖަލްސާ ފެށުން އެއްގަޑިއިރަށް ފަސްކޮށްފައިވާއިރު، މިއީ މި ދައުރުގައި މަޖިލީހުގެ މަސައްކަތްތައް ހުއްޓި ނުވަތަ ލަސްވި ފުރަތަމަ ފަހަރެއް ނޫން. މި އަހަރުގެ ފުރަތަމަ ދައުރު ފެށުނު ފަހުން އެކަށީގެންވާ ސަބަބެއް ހާމަކުރުމެއްނެތި ގިނަ ޖަލްސާތަކެއް ކެންސަލްކޮށްފައިވާއިރު، ބައެއް ފަހަރު މަސް ދުވަހަށް ވުރެ ދިގު މެދުކެނޑުންތަކެއް ޖަލްސާތަކަށް އައިސްފައިވޭ. މިގޮތުން ޕީއެންސީގެ ސުޕަމެޖޯރިޓީ އޮތް މަޖިލީހުގެ މަސައްކަތްތައް ތާވަލާ އެއްގޮތަށް ކުރިއަށް ނުދާތީ ގިނަ ބައެއްގެ ފާޑުކިޔުން ވަނީ އަމާޒުވެފަ.
ރައްޔިތުންގެ މަޖިލީހުގެ ޖަލްސާގައި މަޖިލީހުގެ ނައިބު ރައީސް އަޙުމަދު ނާޒިމް ރިޔާސަތުގައި | މަޖިލިސް
ޕީއެންސީގެ ސުޕަމެޖޯރިޓީ އޮތް ރައްޔިތުންގެ މަޖިލީހުގެ ޖަލްސާގެ ކޯރަމް ހަމަ ނުވެގެން ޖަލްސާ ފަށާ ގަޑި ލަސް ކުރަން ނިންމާފައިވާ ކަމަށް ރިޔާސަތުން އިއުލާނު ކޮށްފި އެވެ.
ރައްޔިތުންގެ މަޖިލީހުގެ ޖަލްސާތައް ފަށަނީ ހެނދުނު 09:00 ގަ އެވެ. ބުދަ ދުވަހު 9 ޖެހި އިރު ކޯރަމް ހަމަވެފައި ނުވާ ކަމަށާއި ކޯރަމް ބެލް ޖެހުމަށް ފަހު ވެސް ކޯރަމް ހަމަވެފައި ނުވާތީ ބުދަ ދުވަހުގެ ޖަލްސާ 10:00 ފެށުމަށް ނިންމާފައިވާ ކަން ރިޔާސަތުގައި އިންނަވާ، މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް ވަނީ އިއުލާނު ކުރައްވާފަ އެވެ.
ބުދަ ދުވަހުގެ ޖަލްސާއަކީ 2026 ވަނަ އަހަރުގެ ފުރަތަމަ ދައުރުގައި ބާއްވާ 19 ވަނަ ޖަލްސާ އެވެ.
2026 ވަނަ އަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގައި ގިނަ ޖަލްސާތަކެއް ވަނީ ކެންސަލް ކޮށްފަ އެވެ. 2 މަސް ދުވަހުގެ ޗުއްޓީއަކަށް ފަހު މި އަހަރަށް މަޖިލިސް ހުޅުވީ މި އަހަރުގެ ފެބްރުއަރީ މަހުގެ 5 ވަނަ ދުވަހު އެވެ. މަޖިލީހުގެ ފުރަތަމަ ދައުރު ފެށިގެން 3 މަސް ވެފައިވާއިރު ޖަލްސާތައް ނުބާއްވާ ޖަލްސާތައް ކެންސަލް ކުރަމުން ދިއަ ސަބަބު ވެސް ހާމަ ކޮށްފަ އެއް ނުވެ އެވެ.
މި އަހަރުގެ ފުރަތަމަ ދައުރުގައި މިދިޔަ ފެބްރުއަރީ މަހުގެ 17 ވަނަ ދުވަހު ޖަލްސާއެއް ބޭއްވުމަށްފަހު، ދެން ޖަލްސާއެއް ބޭއްވީ ގާތްގަނޑަކަށް ތިން ހަފުތާގެ މެދުކެނޑުމަކަށްފަހު މާރިޗު 8 ގަ އެވެ. އޭގެ ފަހުން މަޖިލީހުގެ ޖަލްސާތައް އަލުން ފަށާފައި ވަނީ 35 ދުވަހަށް ފަހުގަ އެވެ.
