ޕީއެންސީގެ ސުޕަމެޖޯރިޓީ އޮތް މަޖިލީހުގެ ޖަލްސާގެ ކޯރަމް ހަމަ ނުވެގެން ކެންސަލް ކޮށްލައިފި
ކޯރަމް ހަމަނުވުމުގެ ސަބަބުން ބުދަ ދުވަހުގެ މަޖިލިސް ޖަލްސާ ކުރިއަށް ނުގެންދެވި ކެންސަލްކޮށްފައިވާއިރު، މިއީ މި ދައުރުގައި ޖަލްސާތައް މެދުކެނޑުނު ފުރަތަމަ ފަހަރެއް ނޫން. ޖަލްސާ ފެށުމަށް ދެ ފަހަރެއްގެ މަތިން ވަގުތު އިތުރުކޮށް ރަނގަބީލު ޖެހި ނަމަވެސް، ބޭނުންވާ އަދަދަށް މެންބަރުން ހާޒިރުނުވުމުން ޖަލްސާ ބޭއްވޭގޮތް ވަނީ ނުވެފަ. މި އަހަރުގެ ފުރަތަމަ ދައުރުގެ ތެރޭގައި އެކި ސަބަބުތަކާ ހުރެ ގިނަ ދުވަސްތަކެއް ވަންދެން ޖަލްސާތައް މެދުކެނޑިފައިވާކަން ފާހަގަކުރެވޭ.
ދިވެހިރާއްޖޭގެ ރައްޔިތުންގެ މަޖިލިސް ކުރާގެ | ރާއްޖެއެމްވީ
ސަރުކާރު ހިންގާ ޕީއެންސީގެ ސުޕަމެޖޯރިޓީ އޮތް ރައްޔިތުންގެ މަޖިލީހުގެ ޖަލްސާގެ ކޯރަމް ހަމަ ނުވެގެން، ޖަލްސާ ނުބޭއްވި ކެންސަލް ކޮށްލައިފި އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާ ކެންސަލް ކޮށްލާފައިވާއިރު ޖަލްސާ ފެށުމަށް ރިޔާސަތުން ނިންމާފައި ވަނީ ހެނދުނު 10:00 ގަ އެވެ.
ރައްޔިތުންގެ މަޖިލީހުގެ ޖަލްސާތައް ފަށަނީ ހެނދުނު 09:00 ގަ އެވެ. ބުދަ ދުވަހު 9 ޖެހި އިރު ކޯރަމް ހަމަވެފައި ނުވާ ކަމަށާއި ކޯރަމް ބެލް ޖެހުމަށް ފަހު ވެސް ކޯރަމް ހަމަވެފައި ނުވާތީ ބުދަ ދުވަހުގެ ޖަލްސާ 10:00 ފެށުމަށް ނިންމާފައިވާ ކަން ރިޔާސަތުގައި އިންނަވާ، މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް ވަނީ އިއުލާނު ކުރައްވާފަ އެވެ.
ނަމަވެސް 10:00 އިރު ވެސް ކޯރަމް ހަމަވެފަ އެއް ނުވެ އެވެ. އޭގެ ފަހުން ކޯރަމް ރަނގަބީލު ޖެހުމަށްފަހު ވެސް ކޯރަމް ހަމަވެފައި ނުވާތީ ޖަލްސާ ކެންސަލް ކުރުމަށް ނިންމަވާފައިވާ ކަމަށް ނާޒިމް ވިދާޅުވި އެވެ. ދެން ޖަލްސާ އެއް ބާއްވާނީ ބުރާސްފަތި ދުވަހު ކަމަށް ވެސް ނާޒިމް އިއުލާނު ކުރެއްވި އެވެ.
ބުދަ ދުވަހުގެ ޖަލްސާއަކީ 2026 ވަނަ އަހަރުގެ ފުރަތަމަ ދައުރުގައި ބާއްވާ 19 ވަނަ ޖަލްސާ އެވެ.
2026 ވަނަ އަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގައި ގިނަ ޖަލްސާތަކެއް ވަނީ ކެންސަލް ކޮށްފަ އެވެ. 2 މަސް ދުވަހުގެ ޗުއްޓީއަކަށް ފަހު މި އަހަރަށް މަޖިލިސް ހުޅުވީ މި އަހަރުގެ ފެބްރުއަރީ މަހުގެ 5 ވަނަ ދުވަހު އެވެ. މަޖިލީހުގެ ފުރަތަމަ ދައުރު ފެށިގެން 3 މަސް ވެފައިވާއިރު ޖަލްސާތައް ނުބާއްވާ ޖަލްސާތައް ކެންސަލް ކުރަމުން ދިއަ ސަބަބު ވެސް ހާމަ ކޮށްފަ އެއް ނުވެ އެވެ.
މި އަހަރުގެ ފުރަތަމަ ދައުރުގައި މިދިޔަ ފެބްރުއަރީ މަހުގެ 17 ވަނަ ދުވަހު ޖަލްސާއެއް ބޭއްވުމަށްފަހު، ދެން ޖަލްސާއެއް ބޭއްވީ ގާތްގަނޑަކަށް ތިން ހަފުތާގެ މެދުކެނޑުމަކަށްފަހު މާރިޗު 8 ގަ އެވެ. އޭގެ ފަހުން މަޖިލީހުގެ ޖަލްސާތައް އަލުން ފަށާފައި ވަނީ 35 ދުވަހަށް ފަހުގަ އެވެ.
