ލަންޑަންގެ ރޭލް ހަމަލާ: ގަސްތުގައި މީހަކު މެރުމުގެ ދައުވާ 18 އަހަރުގެ މީހެއްގެ މައްޗަށް އުފުލައިފި
މި ބޮމުގެ ހަަމަލާގައި 30 މީހަކު ޒަޚަމްވި
ހަމަލާއަށް ފަހު އޮފިޝަލުން ހަރަކާތްތެރި ވަނީ
އިނގިރޭސި ވިލާތުގެ ވެރިރަށް ލަންޑަނުގެ ހުޅަނގު ދެކުނު ސަރަހައްދުގެ ބިމު އަޑީ ރޭލު މަގު ނުވަތަ "ޓިއުބް" އިން ދަތުރުކުރި ރޭލެއްގައި ބޮން ގޮއްވި ހާދިސާއާ ގުޅިގެން ގަސްތުގައި މީހަކު މެރުމުގެ ދައުވާ 18 އަހަރުގެ މީހެއްގެ މައްޗަށް އުފުލައިފިއެވެ.
އިނގިރޭސި ވިލާތުގެ ސަރީ ކައުންޓީގެ ސަންބްރީ ޓައުންއަށް ނިސްބަތްވާ އަހްމަދު ހަސަން އަށް ވަނީ އިތުރު ދައުވާއެއް ވެސް ކޮށްފައެވެ. އެ ދައުވާއަކީ ގޮވުމެއް ގޮއްވާލާ ބައެއްގެ ފުރާނައަށް ގެއްލުން ދޭން އުޅުން ނުވަތަ ބަޔަކު ޒަޚަމްކޮށްލުމަށް މަސައްކަތް ކުރުމެވެ.
ޝަރީއަތުގެ މަޖިލީހުގައި ޕްރޮސިކިއުޓަރުން ބުނެފައި ވަނީ ބޮން ރަނގަޅަށް ގޮވާފައިނުވާ ކަމަށާއި ބޮމާ އެކު ވަޅި އާއި އިސްކުރުތަކެއް ވެސް ޕެކްކޮށްފައިވާ ކަމަށެވެ. އިތުރަށް ޕްރޮސިކިއުޓަރުން ބުނެފައި ވަނީ ކުށެއް ނެތް އާންމުންތަކެއް މަރާލަން އަހްމަދު ހަސަން އުޅުނީ، އޭނާގެ "ސިޔާސީ ވިސްނުންތަކެއްގެ ސަބަބުން ކަމަށެވެ."
އިނގިރޭސި ފުލުހުން ހުކުރު ދުވަހު ބުނެފައި ވަނީ ބޮމުގެ ހަމަލާއާ ގުޅިގެން ހައްޔަރު ކުރެވުނު 17 އަހަރުގެ ކުއްޖެއް ދޫކޮށްލާފައިވާ ކަަމަށެވެ.
ހަމަލާއާ ގުޅިގެން ފުލުހުންގެ ބަންދުގައި މިހާރު ތިބީ 25 އަހަރާއި 30 އަހަރުގެ ދެ ފިރިހެނުންނެވެ.
