މާފުށީ ޖަލަށް 17 ފޯނާއި އެހެނިހެން މަނާތަކެތި އެތެރެކުރަން އުޅުނު މީހަކު ހައްޔަރުކޮށްފި
މާފުށީ ޖަލަށް ގިނަ އަދަދެއްގެ ފޯނާއި އެހެނިހެން އާލަތްތައް އެތެރެކުރަން އުޅުނު މީހަކު ހައްޔަރުކޮށް، އޭނާގެ ބަންދަށް ކޯޓުން ވަނީ 15 ދުވަސް ޖަހާފައި. މި މައްސަލައިގައި ހައްޔަރުކުރި ޝަހީރުގެ އަތުން 17 ސްމާޓް ފޯނާއި، ޗާޖަރުގެ އިތުރުން މަސްތުވާތަކެތި ކަމަށް ބެލެވޭ 29 ޖޮއިންޓް ފެނިފައިވާ ކަމަށް ފުލުހުން ބުނޭ. ޖަލަށް މަނާތަކެތި ވެއްދުމުގެ މައްސަލަތައް އިތުރުވަމުންދާއިރު، މިކަމުގައި ޖަލު އޮފިސަރުންގެ އެހީތެރިކަން ލިބޭ ކަމުގެ ތުހުމަތުތައް އަބަދުވެސް ކުރެވޭ.
މާފުށީ ޖަލަށް 17 ފޯނާއި އެހެނިހެން މަނާތަކެތި އެތެރެކުރަން އުޅުނު ކަމުގެ ތުހުމަތުގައި ހައްޔަރުކުރި މީހާ. | މޯލްޑިވްސް ޕޮލިސް ސާރވިސް
ބަންދު މީހުން ތިބޭ މަރުކަޒަކަށް އެތެރެކުރުން މަނާތަކެތި މާފުށީ ޖަލަށް އެތެރެކުރަން އުޅުނުކަމުގެ ތުހުމަތުގައި މީހަކު ހައްޔަރުކޮށްފި އެވެ.
އާދިއްތަ ދުވަހު ފުލުހުން ބުނީ، މި މަހުގެ 2 ވަނަ ދުވަހު މާފުށީ ޖަލު ގޭޓު ކައިރިން ހައްޔަރުކޮށްފައި ވަނީ ރ. މަޑުއްވަރި / މާސް، 28 އަހަރުގެ މުޙައްމަދު ޝަހީރު ކަމަށެވެ.
އޭނާ ހައްޔަރުކޮށް ބަލައިފާސްކުރިއިރު 17 ސްމާޓް ފޯނާއި، 35 ޗާޖިންގ ކޭބަލާއި، 29 ޖޮއިންޓާއި، އެޑަޕްޓަރަކާއި، ހަތަރު ކައްޓާއާއި، ޕެން ޑްރައިވްގެ އިތުރުން އެހެނިހެން ތަކެތި ފެނިފައިވާ ކަމަށް ފުލުހުން ބުނެ އެވެ.
މި މައްސަލައާ ގުޅިގެން ޝަހީރުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދު ކުރުމަށް އަމުރު ކޮށްފައިވާ ކަމަށް ވެސް ފުލުހުން ބުނެ އެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
ދޭތެރެދޭތެރެއިން މާފުށީ ޖަލަށް މަނާތަކެތި އެތެރެ ކުރަން އުޅުނުކަމުގެ ތުހުމަތުގައި މީހުން ހައްޔަރުކޮށް، ޖަލުގެ ގޮޅިތަކުން ވެސް ގިނަ އަދަދެއްގެ އާލަތްތައް އަތުލައިގަނެ އެވެ. އަދި ޖަލަށް މިފަދަ ތަކެތި ވައްދަނީ ވެސް ޖަލުގައި ހަރަކާތްތެރިވާ ޖަލު އޮފިސަރުންގެ އެހީތެރިކަމާއެކު ކަމަށް ވެސް ގިނަ ބަޔަކު ތުހުމަތު ކުރެ އެވެ.
