ފުރިހަމަ ވަގުތު ހަމަނުވަނީސް ކުޑަހުވަދޫ އަދި މިލަންދޫ ބައްދަލު ކުރި މެޗު ހުއްޓާލައިފި

ފުރިހަމަ ވަގުތު ހަމަނުވަނީސް ކުޑަހުވަދޫ އަދި މިލަންދޫ ބައްދަލު ކުރި މެޗު ހުއްޓާލަން ޖެހިއްޖެ އެވެ.

ހުކުރު ދުވަހުގެ ރޭ ކުޅުނު މި މެޗުގެ ފުރިހަމަ ވަގުތު ހަމަނުވަނީސް ހުއްޓާލާފައިވާއިރު، 0-2 ގެ ނަތީޖާއިން ކުރީގައި އޮތީ މިލަންދޫ އެވެ.

ގަލޮޅު ދަނޑުގައި ކުޅުނު މި މެޗު ހުއްޓުމަކަށް އައީ މިލަންދޫ އިން ޖެހި ދެވަނަ ލަނޑަށް ފަހު، ކުޑަހުވަދޫ އިން ރެފްރީގެ ނިންމުންތަކާ ހިތްހަމަނުޖެހުން ފާޅުކޮށް، ކުޅެން ދަނޑަށް އަރަން ދެކޮޅު ހެދުމާއެކުގައެވެ. އެގޮތުން ރެފްރީ ވަނީ މެޗު ނިމުނުކަން އިއުލާން ކޮށްފައެވެ.

މުޅި މެޗުގައި ވެސް މިލަންދޫގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، ފުރަތަމަ ހާފްގައި އެޓީމަށް މެޗުގެ ލީޑު ނަގައިދިނީ އިޝާން އިބްރާހިމް (ސައްޓު) އެވެ. މި ލަނޑަށް ފަހު ވެސް މިލަންދޫ އަށް ވަނީ ލީޑު ފުޅާ ކުރުމަށް ވެސް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފްގައި ކުޑަހުވަދޫ އަށް ވެސް ވަނީ ލަނޑު ޖެހުމަށް ފުރުސަތުތަކެއް ލިބިފައެވެ. އެހެން ނަމަވެސް މިލަންދޫ އިން ވަނީ ކުޑަހުވަދޫ އިން ފޮނުވާލި ބޯޅަތައް ދިފާއުކޮށްފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ކުޑަހުވަދޫގެ މައްޗަށް މިލަންދޫ ކުރީގައި އޮވެގެންނެވެ.

ދެވަނަ ހާފް ފެށިގެން ވެސް މޮޅަށް ކުޅެމުން ދިޔައީ މިލަންދޫ އެވެ. އެގޮތުން އެޓީމުން ދިޔައީ ފުލުފުލުގައި ކުޑަހުވަދޫގެ ހާފަށް ބާރުބޮޑުކޮށް، ލަނޑު ޖެހުމަށް ފުރުސަތު ހޯދަމުންނެވެ. މިލަންދޫ އިން ލީޑު ފުޅާ ކުރީ، 75 ވަނަ މިނެޓުގައި ސައްޓު އެވެ.

މިއީ މި ސީޒަނުގެ އުރީދޫ ދިވެހި ޕްރިމިއާ ލީގުގައި ފުރިހަމަ ވަގުތު ހަމަނުވަނީސް ކުޅުން ހުއްޓާލަން ޖެހުނު ދެވަނަ މެޗެވެ. މީގެ ކުރިން ލީގުގައި މާޒިޔާ އަދި ކްލަބް ގްރީން ސްޓްރީޓް ބައްދަލު ކުރި މެޗުވެސް ކުރިޔަށް ނުގެންދެވިގެން ވަނީ ހުއްޓާލާފައެވެ. އެ މެޗުގެ ކުޅުން ހުއްޓާލަން ޖެހުނީ ގްރީން އިން މެޗުގެ ރެފްރީއާ އެކު އިތުރަށް ކުރިޔަށްދާން ދެކޮޅު ހެދުމުންނެވެ.

އެ މެޗަށް ފަހު އެފްއޭއެމް އިން އިންޑިއާގެ ރެފްރީން ލީގުގައި ބޭނުންކުރަން ފަށާފައިވާއިރު، މާޒިޔާ އަދި ގްރީން ބައްދަލު ކުރި މެޗުގައި 0-1 ގެ ނަތީޖާއިން މާޒިޔާ ކުރީގައި އޮތުމާއެކު، އެޓީމު މެޗުން މޮޅުވި ކަމަށް ނިންމިއެވެ. އަދި އެފްއޭއެމް އިން ވަނީ 25،000 ރުފިޔާ އިން ގްރީން ޖޫރިމަނާކޮށް، އިންޒާރު ވެސް ދީފައެވެ.