ބިން ކަނޑައަޅާ ދިނުމުން ވެސް އައުޓްޑޯ ޖިމުގެ މަސައްކަތް ސަރުކާރަކަށް ނުވި: ވަހީދު
ހޯރަފުށީގައި އައުޓްޑޯ ޖިމެއް އެޅުމަށް ބިން ހަމަޖައްސައިދިންތާ ގިނަ ދުވަސްތަކެއް ވީއިރު ވެސް ސަރުކާރަށް އެ މަސައްކަތް ނިންމައި ނުލެވުމުން ކައުންސިލުން ވަނީ ކަންބޮޑުވުން ފާޅުކޮށްފައި. ސަރުކާރުގެ މަސައްކަތް ލަސްވުމުން، ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ ގުޅިގެން އެންމެ 30 ދުވަހުގެ ތެރޭގައި އައުޓްޑޯ ޖިމެއް ތަރައްޤީކޮށް މިހާރު ވަނީ ރައްޔިތުންނަށް ޚިދުމަތް ދޭން ފަށާފައި. ރަށުގެ ތަރައްޤީގެ ކުދި މަޝްރޫޢުތައް ކައުންސިލާ ހަވާލުކުރާ ނަމަ، މާ އަވަހަށް އެ މަސައްކަތްތައް ނިންމާލެވޭނެ ކަމަށް ކައުންސިލްގެ ރައީސް ވިދާޅުވި.
ހއ. ހޯރަފުށީގައި ސަރުކާރުން ތަރައްގީ ކުރަން ފެށި އައުޓްޑޯ ޖިމްގެ މަސައްކަތް ހުއްޓިފައި. | ރާއްޖެ އެމްވީ
ހއ. ހޯރަފުށީގައި އައުޓްޑޯ ޖިމެއް އަޅަން ބިން ކަނޑައަޅާ ދިނުމުން ވެސް އައުޓްޑޯ ޖިމުގެ މަސައްކަތް ސަރުކާރަކަށް ނުވި ކަމަށް ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.
ރާއްޖެ ޓީވީގެ ހާލު ކިހިނެއް ޕްރޮގްރާމްގައި ވާހަކަދައްކަވަމުން ވަހީދު ވިދާޅުވީ ހޯރަފުށީ ރައްޔިތުން ފުރިހަމަ ސިއްހަތެއްގެ ދެމިތިބުމަށްޓަކައި ވަރަށް ގިނަ ރައްޔިތުން ބޭނުންވާ ކަމެއް ކަމަށެވެ. އަދި ހަށިގަނޑުގެ ކަސަރަތު ކޮށް، ފުރިހަމަ ސިއްހަތެއްގެ ދެމިތިބުމަށް އެދޭތީ، ސަރުކާރުން އައުޓްޑޯ ޖިމެއް ހެދުމަށް ބިމަކަށް އެދުނު ތާރީހުން ފެށިގެން 6 ދުވަހުގެ ތެރޭގައި ކައުންސިލުން ބިންކަނޑައަޅާ ހަމަޖައްސައިދީފައިވާނެ ކަމަށެވެ.
އައުޓްޑޯ ޖިމަށް ބިންކަނޑައަޅާ ހަމަޖައްސާފައި ހުރި ސަރަހައްދުގައި ހުންނަވައި ވަހީދު ވިދާޅުވީ އެ ސަރަހައްދުން މިހާރު ފެންނަނީ އަމަލީ މަސައްކަތް ފަށައި މަސައްކަތް ހުއްޓާލި ގޮތަށް އޮތް ތަން ކަމަށެވެ. އަދި އެ މަސައްކަތް ލަސްވަމުންދާތީ ހޯރަފުށީ ކައުންސިލާއި ހޯރަފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ނިންމީ، އެ މަސައްކަތް އަވަހަކަށް ނުނިމޭނެތީ، ރައްޔިތުން ބޭނުންވާ ޚިދުމަތް ކައުންސިލުން ފޯރުކޮށްދެވޭތޯ މަސައްކަތްކުރުމަށެވެ.
އެގޮތަށް އަޅުގަނޑުމެން ނިންމައި، ދެބައިމީހުން ގުޅިގެން ހޯރަފުށީގެ އުތުރު ބީޗް ސަރަޙައްދުގައި މިހާރު ޤާއިމުކޮށްފައި އޮތް އައުޓްޑޯ ޖިމަކީ އަޅުގަނޑުމެން ތިރީސް ދުވަހުން ޤާއިމުކުރި އައުޓްޑޯ ޖިމެއް. ކައުންސިލާއި ޑަބްލިއުޑީސީން ތިރީސް ދުވަސް ތެރޭގައި އައުޓްޑޯ ޖިމެއް ޤާއިމުކޮށް، ނިންމައި ރައްޔިތުންނަށް ޚިދުމަތް ދިން. ސަރުކާރުން އެތައް މަހެއް ވެގެންދާއިރު އައުޓްޑޯ ޖިމެއް ގާއިމް ނުކުރެވުމަކީ އަޅުގަނޑުމެން ހޯރަފުށީ ރައްޔިތުންނަށް ވަރަށް ލަދުވެތިކަމެކޭ ދަންނަވާނީ އިނގޭތޯ.ހޯރަފުށީ ކައުންސިލްގެ ރައީސް މުހައްމަދު ވަހީދު
ވަހީދު ވިދާޅުވީ ރަށުގައި ކުރިއަށްދާ ކޮންމެ ޕްރޮޖެކްޓެއް ވެސް ފެންނަނީ އެއްގޮތަކަށް ކަމަށެވެ. މުޅިން ވެސް ހާވާލާފައި ދޫކޮށްލާފައި އޮންނަތަން ފެންނަ ކަމަށާއި، އޭގެ ބަދަލުގައި ކުދި ޕްރޮޖެކްޓްތައް ކައުންސިލާއި ހަވާލުކުރާނަމަ އެ ކަންކަން ނިންމާނެ ކަމަށެވެ.
އަދި އައުޓްޑޯ ޖިމް ވެސް ކައުންސިލާއި ހަވާލުކުރި ނަމަ 30 ދުވަހުގެ ތެރޭގައި މަސައްކަތް އޮންނާނީ ނިންމާފައި ކަމަށް އޭނާ ވިދާޅުވި އެވެ.
