ހޯރަފުށީ މަގު ހެދުމުގެ ދެވަނަ ފިޔަވަހީގެ މަސައްކަތް ނުނިމޭ. ތިންވަނަ ފިޔަވަހި އިއުލާން ކުރި އިރު ތަރައްގީ ކުރާނެ މަގެއް ކޮންސެޕްޓެއް ނޭނގޭ.
ހޯރަފުށީ މަގު ހެދުމުގެ ދެވަނަ ފިޔަވަހީގެ މަސައްކަތް ލަސްވަމުންދާތީ އާއި، ތިންވަނަ ފިޔަވަހީގެ އެއްވެސް މައުލޫމާތެއް ކައުންސިލާ ހިއްސާކޮށްފައި ނުވާތީ އެ ރަށު ކައުންސިލުން ކަންބޮޑުވުން ފާޅުކޮށްފި. ތަރައްގީގެ މަޝްރޫއުތައް ކުރިއަށްގެންދާއިރު ކައުންސިލާއި ރައްޔިތުންގެ މަޝްވަރާ ހޯދަންޖެހޭނެ ކަމަށާއި، މިހާރުގެ ސަރުކާރުން ކައުންސިލާ ދުރުން މަސައްކަތް ކުރަމުންދާކަން ކައުންސިލްގެ ރައީސް ފާހަގަކުރެއްވި. އެހެންކަމުން މަގުތަކުގެ މަސައްކަތް އަވަސްކޮށް، ރައްޔިތުންނަށް އޭގެ ފައިދާ ވީހާވެސް އަވަހަކަށް ލިބިގެންދިއުމަކީ ކައުންސިލްގެ ބޮޑު އުންމީދެއް.
ހއ. ހޯރަފުށީ މަގު ތަރައްގީ ކުރުމުގެ ދެވަނަ ފިޔަވަހީގެ މަސައްކަތް ފެށުމަށް ރަސްމިއްޔާތު ބޭއްވި ސަރަހައްދު. | ރާއްޖެ އެމްވީ
ހއ. ހޯރަފުށީގެ މަގު ހެދުމުގެ ދެވަނަ ފިޔަވަހީގެ މަސައްކަތް ސްޕީޑް ލަސްވެ ނުނިމޭ ކަމަށާއި، ތިން ވަނަ ފިޔަވަހި އިއުލާން ކުރި އިރު ތަރައްގީ ކުރާނެ މަގެއް ކޮންސެޕްޓެއް ނޭނގޭ ކަމަށް އެ ރަށު ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.
ރާއްޖެޓީވީގެ ހާލު ކިހިނެއް ޕްރޮގްރާމުގައި ހޯރަފުށީގެ މަގު ހެދުމުގެ ދެވަނަ ފިޔަވަހީގެ އަމަލީ މަސައްކަތް ފެށިތަނުގައި ހުންނަވާ ވާހަކަ ދައްކަވަމުން ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވީ މަޖިލިސް އިންތިހާބަށް އެ މަގުގައި ތާރު އެޅުމަށްޓަކައި ރަސްމިއްޔާތު ބޭއްވުނު ކަމަށެވެ. އަދި މިހާތަނަށް މި މަސައްކަތުގައި ކުރެވުނު ކަމަކީ ރަސްމިއްޔާތެއް ބާއްވާ އިއުލާނުކުރުން އެކަނި ކަމަށާއި، އޭގެ ފަހުން މަސައްކަތް ނުފެށި ދިގުލައިގެން ދިއުމަށްފަހުގައި މަގުގައި ކާބް ސްޓޯން ޖެހުމާއި، ހޮޅިތައް ވަޅުމުގެ މަސައްކަތް ކުރިއަށްދާ ކަމަށެވެ.
ވަހީދު ވިދާޅުވީ ދެވަނަ ފިޔަވަހީގެ މަސައްކަތް ނުނިމި އޮއްވާ މަގު ހެދުމުގެ 3 ވަނަ ފިޔަވަހީގެ މަސައްކަތް އިއުލާނު ކުރިތަން ދުށް ކަމަށެވެ. ނަމަވެސް ހޯރަފުށީ ކައުންސިލަށް އެކަމުގެ މައުލޫމާތެއް ލިބިފައި ނުވާ ކަމަށާއި، 3 ވަނަ ފިޔަވަހީގައި ހަދަނީ ކޮން މަގުތަކެއް ކަމެއް ވެސް އަދި މަގުތަކުގެ ކޮންސެޕްޓެއް ވެސް ޑިޒައިނެއް ވެސް ހޯރަފުށީ ކައުންސިލަށް ހިއްސާކޮށްފައި ނުވާ ކަމަށެވެ.
ހަމައެކަނި ކުރެވުނީ އިއުލާނެއް. ދެން އުއްމީދުކުރެވެނީ ދެވަނަ ފިޔަވަހީގެ މަސައްކަތް މިއަށްވުރެ ބާރު ސްޕީޑުގައި ވީހާވެސް އަވަހަކަށް ނިންމާލާ ރައްޔިތުންނަށް މަގުތަކުގެ ހިތް ފަސޭހަކަން ލިބިގެންދިއުން.ހޯރަފުށީ ކައުންސިލްގެ ރައީސް މުހައްމަދު ވަހީދު
ވަހީދު ވިދާޅުވީ ފުރަތަމަ ފިޔަވަހީގެ މަސައްކަތް ކުރިއަށް ދިޔަ އިރުގައި، އެމްޓީސީސީ އާއި ކައުންސިލާއި މިނިސްޓްރީ އަދި ކުރީގެ މެންބަރާ ގުޅިލާ މެހިގެން ކުރެވުނު މަސައްކަތުން ކޮންސެޕްޓަށް ރައްޔިތުންގެ އެދެމުން ދިޔަ ބަދަލެއް ނަމަ އެ ބަދަލެއް ގެންނަމުން ދިޔަ ކަމަށެވެ. ނަމަވެސް އެއާ ހިލާފަށް މިހާރުގެ ސަރުކާރުގެ ތަރައްގީގެ ޕްރޮޖެކްޓް ކުރިއަށްދާއިރު ކައުންސިލާއި ވަރަށް ދުރު ކަމަށެވެ. އަދި ހޯރަފުށީގެ އެންމެ އިސް މުއައްސަސާއަކީ ކައުންސިލް ކަމަށާއި، އެންމެ އިސްވާނީ ހޯރަފުށީ ރައްޔިތުން ކަމަށެވެ. އެހެންކަމުން އެ ފަރާތްތަކުގެ ހިޔާލާ މަޝްވަރާ މިފަދަ ކަންކަންމުގައި ހޯދަންޖެހޭނެ ކަމަށް ވަހީދު ވިދާޅުވި އެވެ.
