އެމްޑީޕީ ކުއްލި ހަރަކާތް: ފުލުހުންގެ ކަރަންޓް މުގުރުން ބައިވެރިއެއް ގައިގައި ޖެހުމުން ފިޓް ޖެހިގެން އައިޖީއެމްއެޗްގައި ފަރުވާ ދެނީ
21 އެޕްރީލު 2026 | އަންގާރަ 19:31އެމްޑީޕީން ކުރަމުންދާ އިހުތިޖާޖުތަކުގައި ފުލުހުން ނުބައްދަލު ބާރު ބޭނުންކުރާކަމުގެ ޝަކުވާ ބޮޑުވެފައިވާއިރު، ކަރަންޓް މުގުރުން ޖެހުމުގެ ސަބަބުން ހާލު ދެރަވި މީހަކަށް އައިޖީއެމްއެޗްގައި ދަނީ ފަރުވާދެމުން. މި ހާދިސާގައި އަނިޔާވި މީހާ ހޮސްޕިޓަލަށް ގެންދިއުމަށް ފުލުހުން ހުރަސްއެޅި ކަމަށް މުޒާހަރާގެ ބައިވެރިން ތުހުމަތުކުރާއިރު، ފަހަކަށް އައިސް މުޒާހަރާތައް ރޫޅާލުމުގައި ފުލުހުން ހަރުކަށި ފިޔަވަޅުތައް އަޅަމުންދާކަން ފާހަގަކުރެވޭ. މިފަދަ އަމަލުތަކުގެ ސަބަބުން މުޒާހަރާގެ ބައިވެރިންނަށް އެކިވަރުގެ އަނިޔާލިބި، އިހުތިޖާޖުތަކުގައި ބޭނުންކުރާ ތަކެއްޗަށް ވެސް ފުލުހުން ގެއްލުންދޭ ކަމަށް އެމްޑީޕީން ބުނޭ.
ފުުހުން ކަރަންޓް މުގުރުން ޖެހުމުގެ ސަބަބުން ފިޓް ޖެހުނު އިހުތިޖާޖުގެ ބައިވެރިއާއަށް އައިޖީއެމްއެޗްގެ އެމަރޖެންސީގައި ފަރުވާދެނީ. | ރާއްޖެ އެމްވީ
އެމްޑީޕީ އިން މާލޭގައި ކުރަމުންދާ އިހުތިޖާޖުގައި ފުލުހުން ހާލަތާއި ނުބައްދަލު ބާރު ބޭނުންކޮށް، ކަރަންޓް މުގުރު ބޭނުން ކުރުމުގެ ސަބަބުން މުޒާހަރާގެ ބައިވެރިއެއް ފިޓްޖެހިގެން އައިޖީއެމްއެޗްގައި ފަރުވާދޭން ފަށައިފި އެވެ.
އެމްޑީޕީއިން ސިލްސިލާކޮށް ކުރަމުންދާ އިހުތިޖާޖަށް ފުލުހުން ހުރަސް އަޅައި މުޒާހަރާގެ ބައިވެރިންނާއި ދެކޮޅަށް ނުބައްދަލު ބާރު ބޭނުން ކުރަމުން އަންނަ ކަމަށް އެމްޑީޕީ އިން ވެސް ވަނީ ބުނެފަ އެވެ. އެގޮތުން އަންގާރަ ދުވަހުގެ ރޭ ކުރި އިހުތިޖާޖުގައި މުޒާހަރާގެ ބައިވެރިއަކަށް ފުލުހަކު ކަރަންޓް މުގުރުން ޖެހުމުގެ ސަބަބުން އެމީހާ ފިޓް ޖެހިގެން ވަނީ އައިޖީއެމްއެޗްއަށް ގެންގޮސްފަ އެވެ.
އެގޮތުން ކަރަންޓް މުގުރުން ޖެހުމުގެ ސަބަބުން އޭނާގެ ހަބަރު ހުސްވެގެން ވެއްޓުމުން ވެސް ފުލުހުން ވަނީ އޭނާ އެތަނުން ހޮސްޕިޓަލަށް ގެންދިއުމަށް އެދުމުން އެކަމަށް ވެސް ހުރަސް އަޅާފަ އެވެ. އަދި ފަހުން އޭނާ ގެންދަން ޖެހުނީ ކޮނޑަށް ލައިގެން ދުއްވާ އެއްޗެއް ލިބޭ ހިސާބަކަށެވެ. އަދި ޕިކަޕެއްގައި އޭނާ އައިޖީއެމްއެޗްއަށް ގެންގޮސް މިހާރު ދަނީ އެމަރޖެންސީގައި ފަރުވާ ދެމުންނެވެ.
މީގެ ކުރިން ވެސް ބޭއްވި އިހުތިޖާޖުތަކުގައި ފުލުހުން ހާލަތާއި ނުބައްދަލު ބާރު ބޭނުން ކުރުމުގެ ސަބަބުން މުޒާހަރާގެ ބައިވެރިންނަށް ވަނީ އެކިވަރުގެ އަނިޔާވެފަ އެވެ. އަދި ފުލުހުން އަންނަނީ އިހުތިޖާޖަށް ހުރަސް އަޅައި އިހުތިޖާޖުގައި ބޭނުން ކުރާ ބައެއް ސާމާނު ވެސް އަތުލަމުންނެވެ.
