މަޖިލީހުގެ އެންމެ މުހިއްމު ދެ ކޮމިޓީ އިން ނާޒިމް ވަކިކޮށް އެންވަޔަރމަންޓް ކޮމިޓީއަށް!
މާލިއްޔަތު ކޮމިޓީއަށް މެންބަރު އަހްމަދު ޒަމީރު އަދި 241 ކޮމިޓީއަށް މެންބަރު ހަމަދު އަބްދުﷲ އައްޔަނުކުރައްވައި، އެންވަޔަރމަންޓް ކޮމިޓީއަށް ނާޒިމް ވަނީ ބަދަލުކުރައްވާފައި. މަޖިލީހުގެ ނައިބު ރައީސްކަމުން ނާޒިމް ވަކިކުރަން އުޅޭކަމުގެ އަޑުތަކެއް ފެތުރިފައިވީ ނަމަވެސް، ޕީއެންސީގެ ބައެއް މެންބަރުން ވަނީ އެކަން ދޮގުކުރައްވާ.. މި ބަދަލުތައް ގެނެސްފައިވާކަން މަޖިލީހުގެ ރިޔާސަތުން ބުދަ ދުވަހުގެ ޖަލްސާގައި ވަނީ ރަސްމީކޮށް އިޢުލާނުކުރައްވާފައި.
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ނާޒިމް | މަޖިލިސް
ރައްޔިތުންގެ މަޖިލީހުގެ އެންމެ މުހިއްމު ދެ ކޮމިޓީ ކަމަށް ވާ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އާއި މާލިއްޔަތު ކޮމިޓީ އިން މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވަކިކޮށް، ބަދަލުގައި އެހެން މެމްބަރުން އައްޔަނު ކުރެވިފައިވާކަން ރިޔާސަތުން އިއުލާނުކޮށްފިއެވެ.
ނާޒިމްގެ ބަދަލުގައި މާލިއްޔަތު ކޮމިޓީ އަށް ޕީއެންސީގެ ފަރާތުން ހަމަޖައްސާފައި ވަނީ މައްޗަންގޮޅި މެދު ދާއިރާގެ މެންބަރު އަހްމަދު ޒަމީރު އެވެ. އަދި ނާޒިމް ގެ ބަދަލުގައި 241 ކޮމިޓީ އަށް ޕީއެންސީގެ ފަރާތުން ހަމަޖައްސާފައި ވަނީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ.
މީގެ އިތުރުން، އެންވަޔަރމަންޓް އެންޑް ކްލައިމެޓް ޗޭންޖް ކޮމިޓީއަށް ފުނަދޫ ދާއިރާގެ މެމްބަރު މުޙައްމަދު މަމްދޫހުގެ ބަދަލުގައި ނާޒިމް ވަނީ ހިމަނުއްވާފައެވެ.
މި ބަދަލުތައް ބުދަ ދުވަހުގެ މަޖިލީހުގެ ޖަލްސާގައި ރިޔާސަތުން ވަނީ އިއުލާނުކޮށްފައެވެ.
ނާޒިމް މަޖިލީހުގެ ނައިބްރައީސްކަމުން ވަކި ކުރުމުގެ މަސައްކަތް ޕީއެންސީގެ ތެރެއިން ފަށާފައިވާކަމަށް އަޑުތައް ވަނީ ފެތުރިފައެވެ. ނަމަވެސް ރާއްޖެއެމްވީން ގުޅާލުމުން ޕީއެންސީގެ ބައެއް މެމްބަރުން ވަނީ އެކަން ދޮގު ކުރައްވާފައެވެ.
