ވަތަނީ ޚިދުމަތުގެ ބިލު ބަލައިގަނެ 241 ކޮމިޓީއަށް ފޮނުވައިފި
ޒުވާނުން ބާރުވެރިކުރުވައި، ޤައުމީ ޚިދުމަތަށް އަހުލުވެރި ޖީލެއް ބިނާކުރުމަށްޓަކައި ސަރުކާރުން ހުށަހެޅި "ވަތަނީ ޚިދުމަތުގެ ބިލު" ގައިވާ ގޮތުން، މި ޕްރޮގްރާމްގައި ބައިވެރިވެވޭނީ 16 އަހަރާއި 28 އަހަރާ ދެމެދުގެ ޒުވާނުންނަށް. މި ޕްރޮގްރާމްގެ ސިޔާސަތުތައް ކަނޑައަޅާނީ ރައީސުލްޖުމްހޫރިއްޔާ ރިޔާސަތު ބަލަހައްޓަވާ ޚާއްޞަ ގަވަރނިންގ ކައުންސިލަކުން ކަމަށް ބިލުގައި ބަޔާންކޮށްފައިވޭ.
ރައްޔިތުންގެ މަޖިލީހުގެ ޖަލްސާގެ ތެރެއިން | ރާއްޖެއެމްވީ
ވަތަނީ ޚިދުމަތުގެ ބިލު ރައްޔިތުންގެ މަޖިލީހުން ބަލައިގަނެ، ބިލު އިތުރަށް ދިރާސާ ކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވައިފިއެވެ.
ބުދަ ދުވަހުގެ މަޖިލިސް ޖަލްސާގައި މި ބިލު ބަލައިގަތުމަށް ފާސްކޮށްފައިވަނީ 50 މެމްބަރުންގެ ވޯޓާއެކުއެވެ.
މި ބިލަކީ ވަތަނީ ޚިދުމަތުގެ ޕްރޮގްރާމެއް ތައާރަފްކޮށް، ހަރުދަނާ ޤާނޫނީ އޮނިގަނޑެއްގެ ދަށުން އެ ޕްރޮގްރާމް ފަރުމާކޮށް ހިންގުމަށް އެކުލަވާލާ ބިލެކެވެ.
ބިލުގައި ބުނެފައި ވަނީ ވަތަނީ ޚިދުމަތުގެ ޕްރޮގްރާމް ހިންގުމާއި ގުޅޭ ސިޔާސަތުތައް ކަނޑައަޅާނީ ގަވަރނިންގ ކައުންސިލުން ކަމަށެވެ. އެ ކައުންސިލްގައި ތިއްބަވާނީ ރައީސް އާއި ނައިބު ރައީސްގެ އިތުރުން ދާހިލީ ވަޒީރު، ފިނޭންސް މިނިސްޓަރ، ޗީފް އޮފް ޑިފެންސް ފޯސް އަދި ކޮމިޝަނަރ އޮފް ޕޮލިސް އެވެ. އެ ކައުންސިލްގެ ރައީސް އަކީ ވެސް ރައީސުލްޖުމްހޫރިއްޔާއެވެ.
މި ޕްރޮގްރާމްގެ ސިޔާސަތުތައް އެކުލަވާލުމަށް ލަފާދިނުމަށް ލަފާ ދޭ ކޮމިޓީ އެއް އެކުލަވާލުމަށް ވަނީ ހިމަނާފަ އެވެ.
ސަރުކާރުގެ ފަރާތުން މި ބިލް ހުށަހަޅަނީ ދައުލަތުގެ ޔުނިފޯމް އެޅި ޚިދުމަތްތަކުގެ އަދި އެ ނޫން ދާއިރާތަކުގައި ޚިދުމަތް ކުރަން އެދޭ ޒުވާނުންނަށް އެ ފުރުސަތު ފަހިކޮށްދިނުމަށް ކަމަށް މި ބިލުގައި ވަނީ ބުނެފަ އެވެ. މީގެ އިތުރުން ޒުވާނުން ބާރުވެރިކުރުވާ، ޤައުމަށާއި މުޖުތަމައު އަށް ޒުވާން ޖީލެއް ބިނާކުރުމުގެ ގޮތުން ޤާބިލްކަން އަށަގެނެވުމަކީ ބިލުގެ މަގްސަދެއް ކަމަށް ބުނެފައި ވެ އެވެ.
މި ބިލުގައި ބުނެފައި ވަނީ އެ ބިލު ތައާރަފްކުރުމުގެ މަގްސަދަކީ ވަތަނީ ޚިދުމަތުގެ ދަށުން ހިމެނޭ ދާއިރާތަކުގައި ވަތަނީ ޚިދުމަތް ފޯރުކޮށްދިނުމަށް، ޖިސްމާނީ އަދި ފިކުރީ ޤާބިލްކަން އެ ފަރާތްތަކަށް ފޯރުކޮށްދިނުމަށް ވަތަނީ ޚިދުމަތުގެ ޕްރޮގްރާމް ތައާރަފްކޮށް ތައުލީމާއި، ތަމްރީނު އަދި ތަޖުރިބާ ފޯރުކޮށްދިނުން ކަމަށެވެ.
ވަތަނީ ޚިދުމަތުގެ ޕްރޮގްރާމްގައި އެކުލެވިގެންވާ ބައިތައް ވެސް އެ ބިލުގައި ހިމަނާފައި ވެއެވެ. މި ޕްރޮގްރާމްގައި ބައިވެރިވެވޭނީ އުމުރުން 16 އަހަރާއި 28 އަހަރާއި ދެމެދުގެ ފަރާތްތަކަށެވެ.
މި ބިލުގައިވާގޮތުން ވަތަނީ ޚިދުމަތުގެ ޕްރޮގްރާމް އެކުލެވިގެންވަނީ ދެ ބައެއްގެ މައްޗަށެވެ. އެއީ އަސާސީ ތައުލީމާއި ތަމްރީނުގެ ކޯހުގެ އިތުރުން، ދައުލަތުގެ ޔުނިފޯމް އެޅި ޚިދުމަތްތަކުގެ ތެރެއިން ކަނޑައެޅޭ ޚިދުމަތެއްގައި މަސައްކަތް ކުރުމެވެ. މިހާރު ބިލު އޮތްގޮތުން މި ޕްރޮގްރާމްގައި ބައިވެރިވުމަކީ އިޚްތިޔާރީ ކަމެކެވެ.
