ބޮޑެތި މައްސަލަތައް ނިންމުމުގެ ގާބިލުކަން ހުރި ފަނޑިޔާރުން ކޯޓުތަކަކު ނެތް: މެންބަރު ނާޒިމް
18 ނޮވެމްބަރު 2025 | އަންގާރަ 08:02އަންނަ އަހަރުގެ ބަޖެޓުގައި ޝަރުއީ ދާއިރާއަށް 808 މިލިއަން ރުފިޔާގެ ހިލޭ ކަނޑައަޅާފައިވޭ
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ނާޒިމް
ކޯޓުތަކުގައި މައްސަލަތައް އެކަށީގެންވާ ގޮތެއްގައި ނުހިނގާއިރު އެ މައްސަލަތައް އަވަހަށް ނިންމުމުގެ ގާބިލުކަން ހުރި ފަނޑިޔާރުން ކޯޓުތަކުގައި ތިބިކަމާއި މެދު ސުވާލު އުފެދޭ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެއްޖެ އެވެ.
އަންގާރަ ދުވަހުގެ މަޖިލީހުގެ ޖަލްސާގައި ބަޖެޓު ބަހުސްގައި ބައިވެރިވެވަޑައިގެން ވާހަކަދައްކަވަމުން ނާޒިމް ވިދާޅުވީ އަންނަ އަހަރުގެ ބަޖެޓުގައި ޝަރުއީ ދާއިރާއަށް 808 މިލިއަން ރުފިޔާގެ ހިލޭ އެހީ ކަނޑައަޅާފައިވާއިރު މި ސަރުކާރުން ޖުޑީޝަރީ މިނިވަން ކޮށްދީފައިވާ ކަމަށެވެ.
މިހާރު ދިމާވާ މައްސަލައަކީ މައްސަލަތައް ނުހިނގާތީ. ނޫނީ މައްސަލަތައް ނިންމުމުގެ ގާބިލުކަން ތިބި ފަނޑިޔާރު ތިބިކަމާ ދޭތެރޭގަ އުފެދޭ ސުވާލު މައްސަލައަކީ. އެ ސުވާލަށް ޖަވާބު ލިބެނީ ކޯޓުތަކުން ނިންމާފަ ހުރި މައްސަލަތަކުގެ ތަފާސްހިސާބުން. ކޮމިޓީއަށް ލިބިފަ އެބަހުރި ކޯޓުތަކުން ނިންމާފަހުރި މައްސަލަތަކުގެ ތަފާސްހިސާބުތައް. މި ތަފާސްހިސާބުގެ ތެރެއިން ނިންމާފަ ހުރި މައްސަލައިގެ ތަފާސްހިސާބެއް ނޫން އަޅުގަނޑުމެން ބަލަން ވީ. ނުނިންމާ ހުރި މައްސަލަތަކަކީ ކޮބައިތޯ. ނުނިންމާ ހުރީ އެންމެ ބޮޑެތި މައްސަލަތައް،ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް
ނާޒިމް ވިދާޅުވީ މި ތަފާސްހިސާބުން ހާމަވަނީ މި މައްސަލަތައް ބަލައި، އެ މައްސަލަތައް ނިންމުމުގެ ގާބިލުކަން ފަނޑިޔާރުންގެ ކިބައިގައި ނެތް ކަން ކަމަށެވެ. އެހެންކަމުން އެފަދަ ބޮޑެތި މައްސަލަތައް ނިންމޭނެ ގޮތެއް ހޯދަން ޖެހިފައިވާ ކަމަށް ވެސް ނާޒިމް ވިދާޅުވި އެވެ.
މި ފަހުން ފާސްކުރި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލަށް އިޝާރާތް ކުރައްވާ ނާޒިމް ވިދާޅުވީ އެ ގާނޫނަށް ހުށަހެޅި އިސްލާހުގެ ސަބަބުން، ކަމަށް ގާބިލު ނޫން ފަނޑިޔާރުން ވަކި ކުރުމަށް މަގުފަހިވެގެން ދާނެ ކަމަށެވެ.
މި މަހުގެ 10 ވަނަ ދުވަހު މަޖިލީހުން ފާސްކުރި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު ރައީސް ޑރ. މުހައްމަދު މުއިއްޒު ވަނީ ތަސްދީގު ކުރައްވާފަ އެވެ. އެ އިސްލާހުގައި ވަނީ ފަނޑިޔާރުންގެ މަސައްކަތުގެ ފެންވަރު ބެލުމަށް ކަނޑައަޅާފައިވާ އުސޫލުތައް އިތުރަށް ތަފްސީލު ކޮށްފަ އެވެ.
އަދި ފަނޑިޔާރުން އައްޔަނު ކޮށްފައިވާ ކޯޓު ނޫން އެހެން ކޯޓަކަށް ބަދަލުކުރުމުގެ އުސޫލުތަކާއި ވަގުތީގޮތުން އެހެން ކޯޓެއްގެ މަސައްކަތްތައް ހަވާލު ކުރުމުގެ އުސޫލުތައް ކަނޑައެޅި، ފަނޑިޔާރުން ވިޔަފާރިކުރުމާއި މާލީ ބަޔާން ހުށަހެޅުމާގުޅޭ އުސޫލުތައް މުރާޖައާ ކޮށްފައި ވެއެވެ.
