ސަރުކާރުގެ ޓެކްސީ ލައިންގެ ވެބްސައިޓް ތައާރަފުކޮށް، އަގު ނަގަން ފަށައިފި
18 އެޕްރީލު 2026 | ހޮނިހިރު 10:59ސަރުކާރުގެ "މާލެ ޓެކްސީ ލައިން" ގެ ޚިދުމަތަށް އަގު ނަގަން ފަށާފައިވާއިރު، ވެބްސައިޓާއި ހޮޓްލައިން މެދުވެރިކޮށް މިހާރު ދަތުރުތައް ބުކް ކުރެވޭނެ. ނަމަވެސް، ޚިދުމަތް ހޯދުމުގައި ދިމާވާ ލަސްތަކާއި ކުރިން ތައާރަފުކުރި އެޕްލިކޭޝަނުން މައުލޫމާތު ލީކުވި މައްސަލައިގައި އާންމުންގެ ބޮޑެތި ކަންބޮޑުވުންތަކެއް ވަނީ އުފެދިފަ. އެމްޓީސީސީން އުންމީދު ކުރަނީ އަލަށް އިފުތިތާހުކުރި ވެބްސައިޓާއެކު މި ޚިދުމަތް އިތުރަށް ހަރުދަނާވެ، އާންމުންނަށް ލުއިފަސޭހަވެގެންދާނެ ކަމަށް.
އެމްޓީސީސީ އިން ތައާރުފް ކުރި ޓެކްސީ ލައިންގެ ކާރެއް ދަތުރުކުރަނީ. | ރާއްޖެ އެމްވީ
ސަރުކާރުން އަލަށް ފެށި "މާލެ ޓެކްސީ ލައިން" ގެ ރަސްމީ ވެބްސައިޓް ތައާރަފްކޮށް، އެ ޚިދުމަތުގެ ދަތުރުތަކަށް އަގު ނަގަން ފަށައިފި އެވެ. މި ޚިދުމަތް ހިންގަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނީ، އަލަށް ތައާރަފުކުރި ވެބްސައިޓް މެދުވެރިކޮށް ކަސްޓަމަރުންނަށް މިހާރު ވަރަށް ފަސޭހަކަމާއެކު ޓެކްސީ ބުކްކުރުމުގެ އިންތިޒާމު ހަމަޖެހިފައިވާ ކަމަށެވެ.
އެމްޓީސީސީ އިން ހޮނިހިރު ދުވަހު އެކްސްގައި ކުރި ޕޯސްޓެއްގައި ބުނެފައިވަނީ، ވެބްސައިޓަށް ވަދެ މަދު ސިކުންތުކޮޅެއްގެ ތެރޭގައި ދަތުރު ބުކްކޮށް، ފައިސާ ދެއްކުމުގެ ކަންކަން ނިންމާލެވޭނެ ކަމަށެވެ. މީގެ އިތުރުން، ވެބްސައިޓްގެ އިތުރުން ހޮޓްލައިން ނަންބަރު 1655 އަށް ގުޅައިގެން ވެސް ޓެކްސީ ބުކް ކުރުމުގެ ފުރުސަތު އާންމުންނަށް ވަނީ ހުޅުވާލާފަ އެވެ. މި ޚިދުމަތުގެ ދަށުން ކުރާ ދަތުރުތަކަށް އަގު ނަގާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކަނޑައަޅާފައިވާ ރަސްމީ އަގުތަކުގައި ކަމަށް ވެސް އެ ކުންފުނިން ބުނެފައިވެ އެވެ.
މާލެ ޓެކްސީ ލައިންގެ ޚިދުމަތް ރަސްމީކޮށް ފެށި ނަމަވެސް، މި ޚިދުމަތާ މެދު އާންމުންގެ ބޮޑެތި ކަންބޮޑުވުންތަކެއް ވަނީ އުފެދިފަ އެވެ. އެގޮތުން ޚިދުމަތް ތައާރަފުކުރި ފުރަތަމަ ހަފުތާގެ ތެރޭގައި ވެސް ޚިދުމަތަށް ބާރުބޮޑުވެ، ހޮޓްލައިން ނަންބަރަށް ނުގުޅޭ ކަމުގެ ޝަކުވާ ގިނަ ބަޔަކު ވަނީ ކޮށްފަ އެވެ. ބައެއް އާންމުން ބުނާ ގޮތުގައި ފޯނު ކިއޫގައި ވިއްސަކަށް މިނެޓު މަޑުކުރަން ޖެހުމުގެ އިތުރުން، ކާރު އަންނަންދެން ވެސް ދިގު އިންތިޒާރެއް ކުރަން ޖެހެ އެވެ.
މީގެ އިތުރުން، މި ޚިދުމަތާ ގުޅިގެން އެމްޓީސީސީން ކުރިން ތައާރަފުކުރި ވެބް އެޕްލިކޭޝަނާ މެދު ވެސް ވަނީ ސުވާލު އުފެދިފަ އެވެ. އެ އެޕްލިކޭޝަން ތައާރަފުކުރިތާ މަދު ވަގުތުކޮޅެއްގެ ތެރޭގައި ވަނީ ބޭނުންކުރުން ހުއްޓާލައި ނަގާފަ އެވެ. އެއީ އެޕްލިކޭޝަންގައި ރަޖިސްޓްރީވުމަށް އާންމުން ދޭ މައުލޫމާތު ލީކުވާ ކަމުގެ ކަންބޮޑުވުން ސޯޝަލް މީޑިއާގައި ފާޅުކުރުމާ ގުޅިގެންނެވެ. ނަމަވެސް މިއަދު ތައާރަފުކުރި ވެބްސައިޓާއެކު ޚިދުމަތް އިތުރަށް ހަރުދަނާވެގެންދާނެ ކަމަށް ސަރުކާރުން އުންމީދު ކުރެ އެވެ.
